འབྲི་མཁན། དཔལ་ལྡན་རྒྱལ། on January 10th, 2012
གསར་འགྱུར།
ཟླ་འདིའི་༨་ཉིན་ཨ་མདོ་མགོ་ལོག་ཁུལ། དར་ལག་རྫོང་དུ། དགུང་ལོ་༤༢ ཡིན་པའི་དུང་སྐྱོབ་དགོན་པའི་སྤུལ་སྐུ། བསོད་ནམས་དབང་རྒྱལ་འམ། སྤྲུལ་སྐུ་བསོད་བྷ་ཡིས་ལུས་ལ་ཆོས་གོས་སེར་པོ་གྱོན་པའི་སྟེང་། ས་སྣུམ་བླུགས་ནས་མེ་སྤར་ཏེ་རང་ ལུས་མེར་བསྲེགས་བཏང་ནས་དགོངས་པ་རྫོགས་འདུག ས་གནས་བོད་མི་ཞིག་གིིས་བརྗོད་པར་གཞིགས་ན། ཁོང་གིས་ཡི་གེ་ཞིག་བཀྲམས་ཡོད་པའི་ནང་། བོད་ལ་རང་དབང་དང་བདེ་སྐྱིད་ཐོབ་ཆེད་དང་། བོད་ནང་རང་ལུས་མེར་བསྲེགས་བཏང་མཁན་གྱི་བོད་མི་ཚོར་དྲན་གསོ་ཞུ་ཆེད། དེ་བཞིན་རྒྱལ་བ་རིན་པོ་ཆེ་འཇིག་རྟེན་འདིའི་ཐོག་ཡུན་རིང་བཞུགས་ཐུབ་ཆེད་རང་སྲོག་དོར་བ་ཡིན། བོད་མི་ཚོས་མ་འོངས་པའི་མདུན་ལམ་ལ་ཡིད་ཆེས་མ་བརླག་པ་ཡིན་ན། བདེ་སྐྱིད་ཀྱི་ཉིན་མོ་ཞིག་ཤར་ངེས་རེད་ཅེས་སོགས་བྲིས་ཡོད་འདུག ཉིན་དེར་རྒྱ་ནག་གི་ས་གནས་ཉེན་རྟོགས་པས། ཁོང་གི་སྐུ་ཕུང་འཁྱེར་ཡོད་ནའང། བོད་མི་ཚོ་ས་གནས་ཉེན་རྟོགས་ལས་ཁུངས་སུ་བསྐྱོད་དེ་། བསོད་བྷ་སྤྲུལ་སྐུའི་སྐུ་ཕུང་སྤྲོད་དགོས་པའི་ཞུ་འབོད་དང། ངོ་རྒོལ་བྱས་བར་བརྟེན་སྐུ་ཕུང་མི་མང་ལ། རྩིས་སྤྲོད་བྱས་ཡོད་འདུག་ལ། མི་མང་སྟོང་ཕྲག་ཁ་ཤས་མཉམ་དུ་འཛོམས་ནས་ སྤྲུལ་སྐུ་བསོད་བྷ་ཡི་ཆེད་དུ་མ་ཎི་བསོགས་སྒྲུབ་བྱེད་བཞིན་ཡོད་པ་རེད་འདུག
རྔ་པ་རྫོང་བར་མ་ཞང་ནས་ཡིན་པ། རང་ལོ་༢༠ སོན་པའི་ཚུལ་ཁྲིམས་དང་། རྔ་པ་རྫོང་མཐའ་བ་གོང་མ་ནས་ཡིན་པ། རང་ལོ་༢༠ ཡས་མས་ཡིན་པའི་བསྟན་ཉི་གཉིས་ཀྱིས་ཕྱི་ཟླ་ དང་པའི་ཚེས་དྲུག་ཉིན། རྔ་པ་རྫོང་མཁར་གྱི་བཞི་མདོའི་མགྲོན་ཁང་ཞིག་གི་ར་སྐོར་ནང་། རང་ལུས་མེར་སྲེག་བཏང་སྟེ། རྒྱལ་བ་རིན་པོ་ཆེ་བོད་ལ་ཕེབས་དགོས། རྒྱལ་བ་རིན་པོ་ཆེ་སྐུ་ཚེ་བརྟན་པར་ཤོག ཅེས་སྐད་འབོད་བྱེད་སྐབས་། བསྟན་ཉི་ལགས་ཉིན་དེར་གྲོངས་ཡོད་པ་དང་། ཚུལ་ཁྲིམས་ཚེས་ ༧ ཉིན་གྱི་མཚན་མོ་གྲོངས་ཡོད་འདུག གཞན་ཡང་ན་ནིང་ཕྱི་ཟླ་ ༡༠ ཚེས་ ༡༥ ཉིན་རང་ལུས་མེར་སྲེག་བཏང་ནས་སྐད་འབོད་བྱེད་མཁན། རྔ་པ་རྫོང་སོ་རུ་མ་ནས་ཡིན་པའི་ ནོར་བུ་དགྲ་འདུལ་ལགས་ཟླ་འདི་ཚེས་ ༥ ཉིན་འབར་ཁམས་སྨན་ཁང་དུ་འདས་གྲོངས་སུ་གྱུར་ཡོད་ཀྱང་ཁོང་གི་སྐུ་ཕུང་ནང་མིར་ཕྱིར་སྤྲོད་མ་བྱས་པར། རྒྱ་གཞུང་གིས་མེར་སྲེག་བཏང་ནས་རུས་ཐལ་ཞིག་ནང་མིར་སྤྲད་འདུག ཡང་ཨ་མི་རི་ཀའི་ཕྱི་སྲིད་ལྷན་ཁང་མགྲིན་ཚབ་པས། འདས་པའི་ཉིན་ཁ་ཤས་རིང་། སླར་ཡང་བོད་མི་གསུམ་གྱིས་རང་ལུས་མེ་བསྲེག་བཏང་བའི་དོན་རྐྱེན་བྱུང་བའི་ཐོག ཨ་མི་རི་ཀས་བློ་འཚབ་ཆེན་པོ་བྱེད་ཀྱིན་ཡོད་ལ། ཨ་མི་རི་ཀའི་ཕྱོགས་ནས་དོན་རྐྱེན་དེའི་ཐད་། རྒྱ་ནག་གི་དཔོན་རིགས་ཚོ་དང་ལྷན་དུ་ངེས་པར་དུ་གླེང་སློང་གནང་གི་ཡིན་ཞེས་གསུངས་འདུག
བླ་བྲང་ཨ་མཆོག་ཏུ་རྒྱ་ནག་ཉེན་རྟོག་པས། བོད་མི་གཅིག་དམར་གསོད་དང་སྡེ་བའི་མཐའ་བསྐོར་ནས་དམ་དྲག་བྱེད་བཞིན་ཡོད་ཡོད་འདུག བོད་ནས་ཐད་ཀར་གནས་ཚུལ་འབྱོར་བ་ལྟར་ན། བླ་བྲང་ཨ་མཆོག་ཚོ་བ་བརྒྱད་ཀྱི་གནས་རི། ཨ་མྱེས་གོང་སྔོན་ཞེས་པའི་ཉེ་འདབས་ན་ཡོད་པའི་རྩྭ་ཐང་དུ། རྒྱ་ནག་གཞུང་གིས་གནམ་ཐང་ཞིག་འཛུགས་སྐྲུན་བྱེད་ཀྱིན་ཡོད་པར། ས་གནས་ཨ་མཆོག་མི་མང་གིས། དེར་ངོ་རྒོལ་བྱེད་བཞིན་ཡོད་འདུག ཉེ་ཆར་གནམ་ཐང་འཛུགས་སྐྲུན་གྱི་ལས་ཀ་བྱ་ཡུལ་ནས། གུར་གཉིས་བོར་བརླག་ཏུ་སོང་ཡོད་པས། སྤྱི་བདེ་ཚན་པས་གུར་དེ་གཉིས་རྐུ་མཁན་བླ་བྲང་ཨ་མཆོག་རང་སྒོ་སྡེ་བའི། གུར་མགོ་ཚེ་བརྟན་དང་། ནན་བྷ་སྡེ་བའི་མགོན་པོ་སྐྱབས་གཉིས་ཡིན་པར་དོགས་པ་ཟས་ནས་ ཚེས་༨་ཀྱི་མཚན་མོར་རྒྱ་ནག་ཉེན་རྟོག་དམག་མི་དང་། སྤྱི་བདེ་མི་སྣ་སྐོར་ཞིག བླ་བྲང་ཨ་མཆོག་ཞང་གི་ནན་བྷ་སྡེ་བར་ཡོང་ནས། མགོན་པོ་སྐྱབས་ཚང་གི་མགྲོན་པོ་བྱས་ནས། བསྡད་ཡོད་པའི་གུར་མགོ་ཚེ་བརྟན་ལགས་ལ་མེ་མདས་བརྒྱབ་ནས་བསད་པ་དང༌། མགོན་པོ་སྐྱབས་འཛིན་བཟུང་གིས་བཙན་ཁྲིད་བྱས་ཡོད་འདུག དོན་རྐྱེན་དེ་ལ་བརྟེན་ནས། ས་གནས་མི་མང་གིས་། སྤྱི་བདེ་ལས་ཁུངས་ཀྱི་སྒོ་དང་། སྒེའུ་ཁུངས་སོགས་བཅག་ནས་ངོ་རྒོལ་བྱས་སྟབས། རྒྱ་ནག་གི་ཆེད་ལས་དམག་དཔུང་དང་། ཉེན་རྟོག་དམག་མིའི་རླངས་འཁོར་༢༠ལྷག་ཚེས་༩འི་ཉིན་གྱི་ཕྱི་དྲོར་བླ་བྲང་ཨ་མཆོག་ཏུ་ཡོང་ནས་དམ་དྲག་བྱེད་བཞིན་ཡོད་འདུག
གནས་མཆོག་རྡོ་རྗེ་གདན་དུ་གོང་ས་མཆོག་གིས་ཆོས་ཞུ་ཉིས་འབུལ་ཙམ་ལ། དཔལ་དུས་ཀྱི་འཁོར་ལོའི་བཀའ་དབང་གནང་གྲུབ་ནས། ཚེས ༡༠ ཉིན་ཆོས་ཞུ་བ་ཚོར་སྒྲོལ་དཀར་ཡིད་བཞིན་འཁོར་ལོའི་ཚེ་དབང་གནང་རྗེས། བརྟན་ཞུགས་ཕུལ་འདུག
༧གོང་ས་མཆོག་གིས་ཆོས་ཞུ་ཚོར་ཚེ་དབང་གནང་རྗེས། བཀའ་སློབ་ཕེབས་དོན་ལ། ད་རེས་གནས་རྩ་ཆེན་པོ་འདིར་སྔོན་འགྲོའི་གསུང་ཆོས་ཁག་དང་། དུས་འཁོར་བཀའ་དབང། སྒྲོལ་དཀར་ཡིད་བཞིན་འཁོར་ལོའི་ཚེ་དབང་བཅས་ཡོངས་སུ་གྲུབ་ཏེ་དགེ་བ་ཕུན་སུམ་ཚོགས་པ་བྱུང་ཡོད་པ་རེད། དུས་འཁོར་བཀའ་དབང་གི་ཁས་ལེན་དམ་བཅའ་ནི། འདོན་པ་འདོན་རྒྱུ་དེ་ཁོ་ན་མ་ཡིན་པར། གཙོ་བོ་སྟོང་ཉིད་དང་། བྱང་ཆུབ་སེམས་ཉམས་ལེན་བྱེད་རྒྱུ་དེ་རེད། སྟོང་ཉིད་དང་བྱང་ཆུབ་སེམས་ཀྱི་ཉམས་ལེན་ཇི་ཙམ་བྱས་པ། དེའི་ཚོད་ཀྱིས་ཁ་འདོན་དགེ་སྦྱོར་བྱ་རྒྱུར་ནུས་པ་ལྡན་པ་ཞིག་ཡོང་གི་ཡོད། ང་ཚོ་ཚང་མས་འདིར་དགེ་བ་ཆེན་པོ་བསྒྲུབ་རྒྱུའི་སྐལ་བ་བཟང་པོ་བྱུང་ཡོད་། ཞེས་བཀའ་སློབ་ཕེབས་འདུག དེ་ནས་གོང་ས་མཆོག་གི་སྐུ་ཚེ་ཞབས་པད། བསྐལ་བརྒྱར་བརྟན་ཅིང་ཐུགས་ཀྱི་བཞེད་དགོངས་མཐའ་དག་ལྷུན་གྱིས་འགྲུབ་པ་དང་། སྐྱེ་འགྲོ་ཡོངས་ཀྱི་བསོད་ནམས་གོང་མཐོར་འཕེལ་སླད་། བརྟན་བཞུགས་ཕུལ་ཡོད་པ་རེད།
རྩོམ་རིགས། གསར་འགྱུར། | བསམ་ཚུལ། »
འབྲི་མཁན། དཔལ་ལྡན་རྒྱལ། on December 27th, 2011
༡ ཨ་མདོ་རྔ་པ་རྫོང་འབྲིང་རིམ་མི་མང་ཁྲིམས་ཁང་གིས། བོད་མི་ཞིག་ལ་ལོ་ ༥ བཙོན་འཇུག་ཁྲིམས་ཐག་བཅད་འདུག འདི་གར་གནས་ཚུལ་འབྱོར་བ་ལྟར་ན། ཕྱི་ཟླ་ ༡༡ ཚེས་ ༢༩ ཉིན་རྔ་པ་རྫོང་། གཅའ་ཞང་རྭ་རུ་བའི་བློ་རིས་ཚང་གི་བུ་ཚེ་རིང་། རང་ལོ་ ༢༦ ཡིན་པ་ཁོང་ལ། རྔ་པ་རྫོང་འབྲིང་རིམ་མི་མང་ཁྲིམས་ཁང་གིས་ལོ་ལྔའི་བཙོན་འཇུག་ཁྲིམས་ཐག་བཅད་ཡོད་པ་དང་། མི་རིང་བར་ས་གནས་གཞན་དུ་སྐྱེལ་རྒྱུ་ཡིན་འདུག ཁོང་ཆུང་དུས་ནས་རྔ་པ་ཀིརྟི་དགོན་པར་གྲྭ་པ་བྱས་ཤིང་། ཕྱི་ལོ་ ༢༠༠༧ ཙམ་ལ་གྲྭ་པ་ལོག་ནས། འབྲོག་སར་ནང་མི་དང་མཉམ་དུ་བསྡད་འདུག ཕྱི་ལོ་ ༢༠༠༨ ལོར་རྔ་བ་རྫོང་། གཅའ་ཞང་ཐོག་ཏུ། ངོ་རྒོལ་གྱི་སྣེ་ཁྲིད་པ་དང་། ཉེས་ཅན་གཏེ་བོ་ཡིན་ཟེར་ནས་རྒྱ་ནག་གི་འབྲེལ་ཡོད་ཚན་པས་རྩད་གཅོད་རིམ་པར་བྱས་ཏེ། ༢༠༡༠ ཟླ་ ༤ བའི་ནང་རྔ་པ་རྫོང་ཐོག་གི་ཟ་ཁང་ཞིག་ཏུ། ཚེ་རིང་འཛིན་བཟུང་བྱས་ནས་ལོ་གཅིག་དང་ཕྱེད་ཀ་ལྷག་གི་རིང་། ཐག་གཅོད་གང་ཡང་མ་བྱས་པར་རྔ་པ་རྫོང་ཏུ་བཀག་ཉར་བྱས་ཡོད་འདུག
༢ རྒྱ་ནག་གཞུང་གིས་འཛིན་བཟུང་བཙོན་འཇུག་བྱས་ཡོད་པའི། ལི་ཐང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ། བཙོན་ཁང་ནང་
སྙུང་གཞི་བཞེས་ནས་སྐུ་གཟུགས་ཀྱི་གནས་སྟངས་སྡུག་ཏུ་སོང་་ཡོད་པ་རེད་འདུག གནས་ཚུལ་ཡོངས་ཁུངས་ལྟར་ན། ཉེ་ཆར་ལི་ཐང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་ཡི་སྲིང་མོ་གཉིས་བཙོན་ཁང་དུ། ཁོང་ལ་མཇལ་འཕྲད་གནང་སྐབས། ཁོང་གི་རྐང་པར་སྙུང་གཞི་བྱུང་ཡོད་པ་དང་། སྐུ་གཟུགས་གནས་སྟངས་སྔར་ལས་ཇེ་སྡུག་ཏུ་སོང་ཡོད་པ་དངོས་སུ་མཐོང་འདུག རྒྱ་ནག་གཞུང་གིས་ལི་ཐང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་ལ། ༢༠༠༢་ལོར་ས་གནས་དེར། འབར་རྫས་སྤར་བའི་ཉེས་འཛུགས་བྱས་ནས་སྲོག་ཁྲིམས་བཅད་ཡོད་པ་དང་། ༢༠༠༥ ལོར་ཁོང་གི་སྲོག་ཁྲིམས་དེ་ཚེ་བཙོན་དུ་བསྒྱུར་ཡོད་པ་རེད། རྒྱལ་སྤྱིའི་སྟེང་གི་འགྲོ་བ་མིའི་ཐོབ་ཐང་ཚོགས་པ་ཁག་གིས། རྒྱ་ནག་གཞུང་གིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་ལ། དྲང་བདེན་གྱི་ཁྲིམས་བཤེར་བྱས་མེད་པར་སྐྱོན་བརྗོད་བྱེད་བཞིན་ཡོད་པ་རེད།
༣ བོད་མི་མང་སྤྱི་འཐུས་ཚོགས་གཙོ་མཆོག་གིས། གནས་མཆོག་རྡོ་རྗེ་གདན་དུ་བོད་ནས་དུས་འཁོར་དབང་ཆེན་ལ་ཕེབས་པ་ཚོར་། བཙན་བྱོལ་ཏུ་ཡོད་པའི་བོད་མིའི་སྒྲིག་འཛུགས་ཀྱི་གནས་སྟངས་སོགས་ངོ་སྤྲོད་གནང་ཡོད་འདུག
རེས་གཟའ་ཉི་མའི་ཉིན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་ལགས་ཀྱིས། གནས་མཆོག་རྡོ་རྗེ་གདན་དུ་དཔལ་དུས་ཀྱི་འཁོར་ལོའི་དབང་ཆེན་ཞུ་བར་བཅར་མཁན་བོད་ནས་ཕེབས་པ་ཚོར། ཐོག་མར་བོད་མི་ཚོ་བཙན་བྱོལ་དུ་འབྱོར་བ་ནས་བཟུང་ཆབ་སྲིད་དང་། སྤྱི་ཚོགས་ཀྱི་འཕོ་བསྒྱུར་སོགས་ཀྱི་གནས་སྟངས་ངོ་སྤྲོད་གནང་འདུག གནས་མཆོག་རྡོར་རྗེ་གདན་དུ་གོང་ས་མཆོག་གིས། ཟླ་འདིའི་ཚེས་ ༣༡ ནས་བཟུང་། ཉིན་གྲངས་བཅུའི་རིང་དཔལ་དུས་ཀྱི་འཁོར་ལོའི་དབང་ཆེན་གནང་རྒྱུ་ཡིན་པ་དང་། ད་ལྟ་ནས་འཛམ་གླིང་གི་ས་ཕྱོགས་གང་ས་ནས་ཆོས་ཞུ་བ་ཧ་ཅང་མང་པོ་གནས་མཆོག་རྡོ་རྗེ་གདན་ལ་འདུ་འཛོམས་བྱུང་ཡོད་པ་རེད
༤ ཐེ་ཝན་ནང་རྒྱ་ནག་གི་མང་གཙོའི་ལས་འགུལ་དང་། མ་འོངས་པའི་བོད་ཅེས་པའི་རྒྱལ་སྤྱིའི་རང་བཞིན་གྱི་ཚོགས་འདུ་ཞིག་ཚོགས་འདུག།
ཐེ་ཝན་དུ་ཡོད་པའི་བོད་རིགས་ཚོགས་པ་དང༌། བོད་རྒྱ་མཐུན་ཚོགས་གཉིས། མཉམ་འབྲེལ་གྱིས་གོ་སྒྲིག་བྱས་པའི་། རྒྱ་ནག་གི་མང་གཙོའི་ལས་འགུལ་དང་། མ་འོངས་པའི་བོད་ཅེས་པའི་ཚོགས་འདུར་དེར། ཨ་རི་དང་། རྒྱ་གར། ཧོང་ཀོང་ རྒྱ་ནག་སྐམ་ས་ཆེན་མོ་སོགས་ནས་ དགེ་རྒན་ཆེན་མོ་དང་ ཉམས་ཞིབ་པ་མང་པོ་ཞིག་གིས་རྒྱ་ནག་གི་མང་གཙོ་དང་། བོད་ཀྱི་གནད་དོན་སྐོར་ལ་གསུང་བཤད་གནང་ཡོད་པ་དང་། ཐེངས་འདིའི་བགྲོ་གླེང་ཚོགས་འདུའི་སྐབས། ཚོགས་ཞུགས་ཡོངས་ནས་། ཕན་ཚུན་བསམ་ཚུལ་བརྗེ་རེས་དང་། བགྲོ་གླེང་ལྷུག་པོ་གནང་ཡོད་པའི་སྐོར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་གིས་གནས་ཚུལ་སྤེལ་འདུག
རྩོམ་རིགས། གསར་འགྱུར། | བསམ་ཚུལ། »
འབྲི་མཁན། དཔལ་ལྡན་རྒྱལ། on November 22nd, 2011
ཨ་མདོ་མགོ་ལོག་རྭ་རྒྱ་དགོན་པའི་ཚོགས་ཆེན་འདུ་ཁང་གི་གསེར་ཏོག་སྟེང་། བོད་ཀྱི་རྒྱལ་དར་གཉིས་ཀྱི་བར་དུ་༧གོང་ས་མཆོག་གི་སྐུ་པར་བཅས་གཤམས་ཡོད་འདུག་། བོད་ནས་གནས་ཚུལ་འབྱོར་པ་ལྟར་ན། ཨ་མདོ་ཁུལ་གྱི་ལོ་ཐོ་བརྩི་སྟངས་ལྟར་ན། ཟླ་བ་འདིའི་ཚེས ༢༠ཉིན་ནི། ཧོར་ཟླ་བཅུ་བའི་ཚེས་ ༢༥ ལྔ་སྟེ། དགའ་ལྡན་ལྔ་མཆོད་ཆེན་མོའི་དུས་ཆེན་ལ་འཁེལ་ཡོད་སྟབས། ཉིན་དེའི་ཞོགས་པར། རྭ་རྒྱ་དགོན་པའི་གྲྭ་མང་དང་མཇལ་སྐོར་བ་ཚོས། འདུ་ཁང་གསེར་ཏོག་སྟེང་གི་བོད་ཀྱི་རྒྱལ་དར་དང་༧གོང་ས་མཆོག་གི་སྐུ་པར་བཅས་གསལ་བོར་མཐོང་ཡོད་ཀྱང་། ཅུང་མ་འགོར་པར་རྭ་རྒྱ་དགོན་པའི་ཉེ་འཁྲིས་སུ་ཡོད་པའི། རྒྱུད་མགོ་ཞང་གི་ཉེན་རྟོག་པ་དང་། དགོན་པའི་དོ་དམ་ཁང་གི་མི་སྣ་ཡོང་སྟེ་བོད་ཀྱི་རྒྱལ་དར་དང་། གོང་ས་མཆོག་གི་སྐུ་པར་སོགས་མར་བླངས་ཏེ་གཞུང་ལས་ཁང་དུ་འཁྱེར་ཡོད་པ་དང་། ད་ལྟའི་ཆར་རྒྱ་ནག་གཞུང་གིས་དོན་རྐྱེན་འདིའི་ཐད་ཞིབ་འཇུག་བྱེད་བཞིན་ཡོད་འདུག
ཨ་རིའི་གྲོས་ཚོགས་འཐུས་མི་ཁག་ཅིག་གིས་རྒྱ་ནག་ནང་། ཡོད་པའི་ཨ་རིའི་གཞུང་ཚབ་པ་ཆེན་མོ་དངོས་ཡོད་གནས་སྟངས་རྟོག་ཞིབ་ཆེད་བོད་ནང་ཕེབས་དགོས་པའི་འབོད་སྐུལ་གནང་ཡོད་འདུག
ཨ་མི་རི་ཀའི་གྲོས་ཚོགས་ཀྱི་Tom Lantos འགྲོ་བ་མིའི་ཐོབ་ཐང་ཚོགས་ཆུང་གི་འཐུས་མི་སྐུ་ཞབསFrank Wolf གཙོས་པའི་གྲོས་ཚོགས་ཀྱི་འཐུས་མི་གསུམ་གྱི་མཚན་ཐོག། རྒྱ་ནག་ནང་ཡོད་པའི་ཨ་རིའི་གཞུང་ཚབ་པ། སྐུ་ཞབས་གྷེ་རི་ ལོཀ་ལ་ཡི་གེ་ཞིག་གནང་ཡོད་པའི་ནང་། བོད་ནང་གི་དངོས་ཡོད་གནས་སྟངས་རྟོག་ཞིབ་ཆེད། བོད་ནང་ཕེབས་དགོས་པ་མ་ཟད་། རྒྱ་ནག་གཞུང་གིས་བོད་ནང་དྲག་གནོན་གྱི་སྲིད་བྱུས་འཛིན་བཞིན་པ་དེའི་ཐོག། ཐུགས་འཚབ་ཡོད་པ་རྒྱ་ནག་གི་དཔོན་རིགས་ཚོར་གསལ་སྟོན་དགོས་པ་དང་། ལྷག་པར་དུ་བོད་ནང་གི་བོད་མི་ཚོར་། ཨ་རིའི་ནང་བོད་ལ་རྒྱབ་སྐྱོར་བྱེད་མཁན་གྱི་གྲོགས་པོ་ཡོད་པའི་གནས་ཚུལ་གསལ་པོར་ཤེས་ཐུབ་པ་བྱེད་དགོས་ཞེས་བཀོད་འདུག།
ཚེས་ ༢༡ཉིན་སུད་ཝེ་སི་ཕྱི་སྲིད་ལྷན་ཁང་གིས། བོད་ནང་གི་ད་ལྟའི་གནས་སྟངས་ཐོག་སེམས་ཚབས་ཆེན་པོ་ཡོད་སྐོར་གྱི་གསལ་བསྒྲགས་ཞིག་སྤེལ་འདུག གསལ་བསྒྲགས་དེའི་ནང་། བོད་ནང་གི་བོད་མི་ཚོས་འུ་ཐུག་ཐབས་ཟད་ཀྱིས། རང་ལུས་མེར་སྲེག་བཏང་སྟེ། རྒྱ་ནག་གཞུང་གི་སྲིད་བྱུས་ལ། ངོ་རྒོལ་བྱས་པའི་གནས་སྟངས་དེ་ནི། ཧ་ཅང་སེམས་ཚབས་བྱེད་དགོས་པའི་གནད་དོན་ཞིག་ཆགས་ཡོད། རྒྱ་ནག་དང་། ལྷག་པར་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ནི། སུད་ཝེ་སི་དང་རྒྱ་ནག་གཞུང་དབར། གྲོས་མོལ་ཡང་ཡང་བྱེད་རྒྱུའི་གནད་དོན་ཞིག་ཡིན་ཞེས་འཁོད་འདུག། ཉིན་དེར་སུད་ཝེ་སི་ནང་གཞུང་དོན་དུ་ཕེབས་ཡོད་པའི་བཀའ་བློན་ཁྲི་བ་བློ་བཟང་སེང་གེ་ལགས་ སུད་སི་ཕྱི་སྲིད་ལྷན་ཁང་གི་ལས་བྱེད་མཐོ་གྲས་ཤིག་དང་ དེ་བཞིན་སུད་སི་གྲོས་ཚོགས་ཀྱི་། བོད་དོན་རྒྱབ་སྐྱོར་ཚོགས་པའི་། ཐུས་མི་ཁག་ཅིག་ལ་མཇལ་འཕྲད་གནང་ནས་བོད་དོན་སྐོར་གླེང་མོལ་གནང་འདུག
ཕ་རན་སིའི་སྲིད་འཛིན་ཟུར་པའི་ལྕམ་སྐུ་་རྡ་ཉེ་ལ། མེ་ཐི་རོན་ཚེས་ ༢༡ ཉིན་འདས་གྲོངས་སུ་གྱུར་བར། བོད་མིའི་སྒྲིག་འཛུགས་ཀྱི་བཀའ་ཤག་གིས་། ཐུགས་གསོའི་ཕྱག་བྲིས་ཤིག་ཕུལ་འདུག ཕྱག་ཡིག་དེའི་ནང་། ལྕམ་སྐུ་རྡ་ཉེ་ལ། མེ་ཐི་རོན་མཆོག་འདས་གྲོངས་སུ་གྱུར་བའི། ཡིད་སྐྱོའི་གནས་ཚུལ་ཐོན་པར་བོད་མིའི་སྒྲིག་འཛུགས་བཀའ་ཤག་གིས། གདུང་སེམས་མཉམ་སྐྱེས་དང་། མྱ་ངན་གུས་བཀུར་ཞུ་རྒྱུ་ཡིན། ལྕམ་སྐུ་དམ་པ་ཁོང་ནི་གོང་ས་སྐྱབས་མགོན་ཆེན་པོ་མཆོག་ལ། གུས་བཀུར་ཧ་ཅང་ཆེན་པོ་ཞུ་མཁན་ཞིག་ཡིན་པ་མ་ཟད། བོད་མི་ཚོར་ཧ་ཅང་སེམས་ཐག་ཉེ་བའི་མཛའ་གྲོགས་དང་། རྒྱབ་སྐྱོར་གནང་མཁན་ཞིག་ཀྱང་ཡིན། བོད་མིའི་སྒྲིག་འཛུགས་བཀའ་ཤག་གིས། དམ་པ་ཁོང་གི་རྗེས་ཤུལ་ནང་མི་སྤུན་མཆེད་ཚོར། གདུང་སེམས་མཉམ་སྐྱེའི་སེམས་གསོ་ཞུ་རྒྱུ་མ་ཟད། དམ་པ་ཁོང་ལ་གསོལ་འདེབས་སྨོན་ལམ་ཡང་ཞུ་རྒྱུ་ཡིན་ཞེས་བཀོད་འདུག ལྕམ་མེ་ཐི་རོན་༡༩༩༡ ལོར་བཞུགས་སྒར་རྡ་རམ་ས་ལར་ཆེད་ཕེབས་གནང་ནས་། བོད་དོན་ལ་རྒྱབ་སྐྱོར་ གནང་པར་མ་ཟད་། ཁོང་གི་སྐུ་ཚེ་ཧྲིལ་བོར་འགྲོ་བ་མིའི་ཐོབ་ཐང་དར་སྤེལ་ཆེད་ཕྱག་ལས་གནང་ཡོད་པ་རེད།
རྩོམ་རིགས། གསར་འགྱུར། | བསམ་ཚུལ། »
འབྲི་མཁན། དཔལ་ལྡན་རྒྱལ། on November 22nd, 2011
རྒྱ་ནག་གཞུང་གིས་བོད་ནང་། རྩོམ་པ་པོ་མི་ཉུང་བ་ཞིག་འཛིན་བཟུང་བཙོན་འཇུག་བྱས་ཡོད་པ་མ་ཟད། མུ་མཐུད་ནས་རྩོམ་པ་པོ་དང་། ཤེས་ཡོན་ཅན་ཚོའི་ཐོག་དམ་དྲག་བྱེད་བཞིན་པའི་ཐད་ལ། ཕེན་ཕྱི་སྡོད་བོད་མིའི་རྩོམ་པ་པོའི་མཐུན་ཚོགས་ཀྱི་ཚོགས་གཙོ་ཆབ་བྲག་ལྷ་མོ་ལགས་དང་མཉམ་དུ་དཔལ་ལྡན་རྒྱལ་གྱིས་གླེང་མོལ་བྱས་ཡོད།
སྦྲེལ་ཐག་འདིར་མཐུད་ནས་གསན་རོགས།
རྩོམ་རིགས། གླེང་མོལ། | བསམ་ཚུལ། »
འབྲི་མཁན། དཔལ་ལྡན་རྒྱལ། on November 4th, 2011
ཉེ་བའི་ཟླ་བ་ཁ་ཤས་རིང་ཨ་མདོ་རྔ་བ་གཙོས་པའི། བོད་གྱི་ས་ཁུལ་ཁག་ཅིག་ཏུ། རང་ལུས་མེ་བསྲེགས་བཏང་ནས། རྒྱ་ནག་གཞུང་གིས་བོད་ནང་དུ་ལག་བསྟར་བྱེད་བཞིན་པའི་སྲིད་ཇུས་ལ་ངོ་རྒོལ། གཅིག་རྗེས་ཉིས་མཐུད་དུ་བྱས་ཏེ། བོད་ནང་གི་ཛ་དྲག་གནས་སྟངས་སྐོར་ལ་ཨ་མདོ་རྔ་བ་ཀིརྟི་དགོན་པའི་དགོན་བདག བཙན་བྱོལ་བོད་གཞུང་གི་བཀའ་བློན་ཟུར་བ་ ཀིརྟི་རིན་པོ་ཆེ་ལ་བཅར་འདྲི་ཞུས་ཡོད།
རྩོམ་རིགས། གླེང་མོལ། | བསམ་ཚུལ། »
འབྲི་མཁན། དཔལ་ལྡན་རྒྱལ། on October 25th, 2011
༡ དཀར་མཛེས་དགོན་པའི་གྲ་པ་ཞིག་གིས་རང་ལུས་མེ་བསྲེགས་བཏང་ནས། རྒྱ་ནག་གཞུང་ལ་ངོ་རྒོལ་བྱས་འདུག ཚེས༢༥ཉིན་དཀར་མཛེས་དགོན་དུ། དུས་གཏོར་ཚོགས་ནས། གྲྭ་བ་དང་མི་མང་འཛོམས་ཡོད་སྐབས། རང་ལོ་༣༨་ཡིན་པའི་གྲ་བ་ཟླ་བ་ཚེ་རིང་ལགས་ཀྱིས། རང་གི་ལུས་སྟེང་དུ་རྡོ་སྣུམ་བླུགས་ནས་མེ་སྦར་ཏེ་མེ་ལྕེའི་ཁྲོད། རྒྱལ་བ་རིན་པོ་ཆེ། བོད་ལ་གདན་འདྲེན་ཞུ་དགོས་། བོད་ལ་རང་དབང་དགོས། མི་རིགས་འདྲ་མཉམ་དགོས། ཅེས་སྐད་འབོད་བྱས་ཡོད་པ་དང་། མེ་ཤུགས་ཆེན་འབར་ནས་ས་ལ་འགྱེལ་རྗེས། གྲ་པ་ཁག་གཅིག་གིས་ཁོང་སྨན་ཁང་དུ་སྐྱེལ་འདུག་ནའང། ཁོང་གི་རེ་འདུན་ལྟར་ཅུང་མ་འགོར་བར་ཕྱིར། དཀར་མཛེས་དགོན་པའི་ནང་ཁྲིད་ཡོང་འདུག་ལ། ས་གནས་སུ་རྒྱ་ནག་གི་ཉེན་རྟོག་དམག་མི་བཀྲམས་ནས་དམ་དྲག་ཆེན་པོ་བྱེད་བཞིན་ཡོད་པ་རེད་འདུག ཉེ་བའི་ཟླ་བ་ཁ་ཤས་རིང་ཨ་མདོ་རྔ་བ་དང་། གསེར་རྟ་སོགས་བོད་ནང་ནས་མི་བཅུ་ཡིས་རང་ལུས་མེ་བསྲེགས་ནས་རྒྱ་ནག་གཞུང་ལ་ངོ་རྒོལ་བྱས་ཡོད་པའི་ཁྲོད་ཨ་ནེ་གཅིག་ཐེ་བའི་མི་ལྔ་འདས་འགྲོངས་སུ་གྱུར་ཡོད་པ་རེད།
༢ རྒྱ་གར་གྱི་རྒྱལ་ས་ལྡི་ལིར་ཡོད་པའི་། རྒྱ་གཞུང་གི་གཞུང་ཚབ་ཁང་དུ་ངོ་རྒོལ་སྐད་འབོད་བྱས་བར་བརྟེན། བོད་མི་ཁག་གཅིག་རྒྱ་གར་གྱི་ས་གནས་ཉེན་རྟོག་པ་བཀག་ཉར་བྱས་འདུག ཚེས་༢༤ ཉིན་རྡེ་རུ་རྡུན་ས་གནས་ནས་ཕེབས་པའི་དགེ་འདུན་པ་བཞི་དང་། ཅན་རྡི་སྒར་མཐོ་རིམ་སློབ་གྲ་ནས་ཡིན་པའི་བོད་རིགས་སློབ་མ་ཁག་ཅིག གློ་བུར་དུ་ཡོང་ནས། རྒྱ་ནག་གཞུང་ཚབ་ནང། ་འཛུལ་ཐབས་བྱེད་སྐབས་ས་གནས་རྒྱ་གར་གྱི་ཉེན་རྟོག་པས་ཁོང་རྣམས་འཛིན་བཟུང་བཀག་ཉར་བྱས་འདུག་། ཡང་སུད་སིའི་གྲོང་ཁྱེར་ཇེ་ནེ་ཝའི་ནང་ཡོད་པའི་། མཉམ་སྦྲེལ་རྒྱལ་ཚོགས་མདུན་དུ་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྤེན་པ་ཚེ་རིང་གཙོས་བའི་། བོད་མི་ཆིག་སྟོང་ལྷག་འདུ་འཛོམས་ཀྱིས། མཉམ་སྦྲེལ་རྒྱལ་ཚོགས་ལ། རྔ་བ་ཀིརྟི་དགོན་པའི་དངོས་ཡོད་གནས་སྟངས་ལ་རྟོག་ཞིབ་ཆེད། རྒྱལ་ཚོགས་ཀྱི་སྐུ་ཚབ་ཚོགས་ཆུང་ཞིག་ངེས་པར་གཏོང་དགོས་བའི་འབོད་སྐུལ་ཞུས་འདུག
༣ ཨ་མདོ་དྷཱི་ཚ་དགོན་པའི་དགེ་བཤེས་ཚུལ་ཁྲིམས་རྒྱ་མཚོ་དང་། གཞོན་སྐྱེས་རྩོམ་པ་པོ་གཅོད་པ་ཀླུ་རྒྱལ་། སྨྱུག་མིང་ལ་མེ་ལྕེ་ཞེས་པ་གཉིས་འཛིན་བཟུང་བྱས་འདུག
ཚེས་ ༡༤ ཉིན་ཨ་མདོ་དྷཱི་ཚ་དགོན་པའི། དགེ་བཤེས་ཚུལ་ཁྲིམས་རྒྱ་མཚོ་ད་ལྟ་དགུང་གྲངས་ ༤༠ ལྷག་ཙམ་ཡིན་པ། ཁོང་མཚོ་ལྷོ་ཁྲི་ཀ་རྫོང་དུ་མཚོ་སྔོན་ཞིང་ཆེན་གྱི་བདེ་འཇགས་མི་སྣས་འཛིན་བཟུང་བྱས་ནས་གར་ཡོད་ཤེས་རྟོགས་མེད་པར་གྱུར་ཡོད་འདུག དགེ་བཤེས་ཚུལ་ཁྲིམས་རྒྱ་མཚོ་ནི། ཤར་ཙོང་ཁ་སྐྱེས་རིའི་སྙིང་རྗེའི་རོགས་སྐྱོར་ཚོགས་པའི་། ཚོགས་གཙོ་གཞོན་ཡིན་པ་དང་། ཁོང་གིས་དབུལ་ཕོངས་སློབ་མ་དང་། རྒན་འཁོགས་བདག་མེད་རིགས་ལ་རོགས་སྐྱོར་གནང་བཞིན་ཡོད་པ་རེད། ཡང་བོད་ནས་གནས་ཚུལ་འབྱོརཔ་ལྟར་། ཚེས་༡༩ ཉིན་ཀན་སུའུ་མི་རིགས་དཔེ་སྐྲུན་ཁང་དུ། ལས་ཀ་བྱེད་བཞིན་པའི་། གཞོན་སྐྱེས་རྩོམ་པ་པོ་གཅོད་པ་ཀླུ་རྒྱལ་། སྨྱུག་མིང་ལ་མེ་ལྕེ་ཞེས་པ་ལན་ཀྲུའུ་གྲོང་ཁྱེར་ནང་གི་རང་ཁྱིམ་ནས་རྒྱ་ནག་བདེ་འཇགས་མི་སྣས་བཙན་ཁྲིད་བྱས་འདུག ཁོང་འཛིན་བཟུང་བྱེད་དགོས་པའི་རྒྱུ་མཚན་གང་ཡིན་ནང་མི་ལ་གསལ་བཤད་གང་ཡང་བྱས་མི་འདུག
༤ ལྷ་སར་གནས་སྡོད་རྫོགས་ཆེན་སྟོབས་ལྡན་ལགས་གཙོས་བའི། སྡེ་དགེ་ནས་ཡིན་པའི་མི་གྲངས་ཉི་ཤུ་ཙམ་གྱིས། བཀའ་ཁྲི་འཇུ་ཆེན་ཐུབ་བསྟན་རྣམ་རྒྱལ་དམ་པ་དེ་ཉིད། སྐུ་གཤེགས་ནས་ཉིན་ཞག་ཞེ་དགུ་ཚང་བའི་ཉིན་མོ་དང་བསྟུན་ནས། ཕྱི་ཚེས་༡༩ཉིན་ལྷ་ལྡན་གཙུག་ལག་ཁང་དུ། མཆོད་འབུལ་སྨོན་ལམ་ཞིག་གྲ་སྒྲིག་བྱས་ནས་འགོ་བཙུགས་མ་ཐག རྒྱ་མིའི་ཉེན་རྟོག་པ་དེ་གར་འབྱོར་ནས། བཀག་སྡོམ་བྱས་ཡོད་པ་མ་ཟད་། རྫོགས་ཆེན་སྟོབས་ལྡན་ལགས། མཆོད་འབུལ་གོ་སྒྲིག་བྱེད་མཁན་གཙོ་བོ་ཡིན་པར་རྩིས་ནས་ཁོང་འཛིན་བཟུང་བྱས་ཏེ། ད་བར་ས་གནས་གང་ཞིག་དུ་ཁྲིད་ཡོད་མེད་ཤེས་ཀྱི་མེད་པ་རེད།
རྩོམ་རིགས། གསར་འགྱུར། | བསམ་ཚུལ། »
འབྲི་མཁན། དཔལ་ལྡན་རྒྱལ། on October 11th, 2011
ཧྥ་རན་སི་གཙོས་བའི་ཕྱི་རྒྱལ་གྱི་སློབ་གྲ་ཆེན་མོ་ཁག་ཅིག་གི་བོད་ཡིག་སྦྱང་མཁན། སློབ་མ་ཁ་ཤས་ཀྱིས་རེ་སྐུལ་བཞིན། ཕྲན་གྱིས་བཤད་པའི་དྲ་བརྙན་གསར་འགྱུར་ཡིག་ཐོག་ཏུ་བཀོད་ནས་འདིར་བཞག་ཡོད།
༡ ཉེ་ལམ་རང་ལུས་མེར་སྲེག་བཏང་ནས། རྒྱ་གཞུང་ལ་ངོ་རྒོལ་བྱེད་མཁན། མཁའ་དབྱིངས་ལགས་དང་། ཆོས་འཕེལ་ལགས་གཉིས་འདས་གྲོངས་སུ་གྱུར་འདུག ཀིརྟི་བྱེས་པ་གྲྭ་ཚང་གི་བོད་གནས་འབྲེལ་མཐུད་ཁང་གིས། གནས་ཚུལ་སྤེལ་བ་ལྟར་ན། མཁའ་དབྱིངས་ལགས་ཚེས་བརྒྱད་ཉིན་འདས་གྲོངས་སུ་གྱུར་ཡོད་པ་དང་། སྐུ་ཕུང་ཁོང་གི་ནང་མིར་རྩིས་སྤྲོད་བྱེད་དགོས་པའི། རེ་འདུན་ཤུགས་ཆེ་བཏོན་ཡོད་ནའང་། རྒྱ་གཞུང་གིས་དེ་ལ་ཉན་འཇོག་མ་བྱས་པར་ཉིན་དེར། ཁོང་གི་སྐུ་ཕུང་མེར་སྲེག་བཏང་བའི་རུས་ཐལ། ནང་མིར་སྤྲད་ཡོད་འདུག ཡང་ཚེས་༡༡ཉིན་རང་ལུས་མེར་སྲེག་བཏང་ནས་རྒྱ་གཞུང་ལ་ངོ་རྒོལ་གནང་མཁན་ ཆོས་འཕེལ་ལགས་འདས་གྲོངས་སུ་གྱུར་ནས་། སྐུ་ཕུང་མེར་སྲེག་བཏང་ནས་རུས་ཐལ་ཁོང་གི་ནང་མིར་སྤྲད་ཡོད་པ། བོད་ནས་མི་ཞིག་གིས་གནས་ཚུལ་ངོ་སྤྲོད་གནང་བྱུང་། རྒྱ་ནག་གི་འབྲེལ་ཡོད་ཚན་པས་འདས་གྲོངས་སུ་གྱུར་བ། ཁོང་གཉིས་ཀྱི་ཁྱིམ་དུ་བསྔོ་སྨོན་གསུངས་ཆེད། དགེ་འདུན་པ་ལྔ་ལས་མང་བ་དུས་གཅིག་ལ། གདན་འདྲེན་ཞུ་མི་ཆོག་པ་དང༌། རྔ་པ་མི་མང་སེམས་གསོ་བྱེད་དུ་འགྲོ་མི་ཆོག་པ་སོགས་དམ་དྲག་ཆེན་པོ་བྱེད་མུས་ཡིན་འདུག
༢ དབུས་བོད་མིའི་སྒྲིག་འཛུགས་དང་། བོད་མི་མང་སྤྱི་འཐུས་ལྷན་ཚོགས་ཀྱིས་བོད་མི་ཚོ་དང་། བོད་དོན་རྒྱབ་སྐྱོར་བ་ཚོས། རྔ་པའི་མི་མང་ཚོར་གདུང་སེམས་མཉམ་སྐྱེད་ཀྱིས། བོད་ནང་གི་ཛ་དྲག་གི་གནས་སྟངས་དེ་བཞིན། རྒྱལ་སྤྱིའི་སྟེང་གསལ་སྟོན་བྱེད་དགོས་པའི་འབོད་སྐུལ་བྱས་འདུག ཕྱི་ཚེས་ ༡༠ ཉིན་དབུས་བོད་མིའི་སྒྲིག་འཛུགས་ཀྱིས། གསལ་བསྒྲགས་ཞིག་སྤེལ་ཡོད་པའི་ནང་། བོད་ནང་གི་ཛ་དྲག་གི་གནས་སྟངས་དེ་བཞིན། རྒྱལ་སྤྱིའི་སྟེང་གསལ་སྟོན་དང་། རྒྱལ་སྤྱིའི་ཚོགས་སྡེ་ཁག་ནས་བོད་ཀྱི་གནད་དོན་དེ་གྲོས་མོལ་གྱི་ལམ་ནས། སེལ་ཐབས་ཡོང་སླད་གནོན་ཤུགས་སྤྲོད་དགོས་པའི་འབོད་སྐུལ་ཞུ་རྒྱུ་ཡིན། ཞེས་འཁོད་འདུག ཡང་བོད་མི་མང་སྤྱི་འཐུས་ལྷན་ཚོགས་ཀྱིས་གསལ་བསྒྲགས་ཞིག་སྤེལ་ཡོད་པའི་ནང་། རྒྱ་བལ་འབྲུག་གསུམ་གྱི་བོད་མིའི་སྤྱི་ཚོགས་དང་། ཕྱི་རྒྱལ་ཡུལ་གྲུ་ཁག་ཏུ་ཡོད་པའི་བོད་རིགས་ཚོགས་པ་དང་། བོད་དོན་རྒྱབ་སྐྱོར་བྱེད་མཁན་ཚོགས་སྒེར་ཚང་མས། ནུས་པ་གཅིག་ཏུ་སྤུངས་ཏེ། བོད་ནང་ཛ་དྲག་གི་གནས་སྟངས་འདི་གང་མྱུར་སེལ་ཐབས་སུ། འཚེ་མེད་ཞི་བའི་ཐབས་ལམ་བརྒྱུད། ཡུལ་ཁྲིམས་དང་མཐུན་པའི་ཐོག་ནས་ལས་འགུལ་སྤེལ་དགོས་པའི་འབོད་སྐུལ་ནན་ཏན་ཞུ་བཞིན་ཡོད་ཞེས་བཀོད་འདུག། དེ་བཞིན་འཛམ་གླིང་རྒྱལ་ཁབ་མང་པོ་ཞིག་གི་ནང་དུ་རྒྱ་ནག་གཞུང་ཚབ་ཁང་གི་མདུན་ཏུ་བོད་མི་དང་། བོད་དོན་རྒྱབ་སྐྱོར་ཚོས་རྒྱ་ནག་གཞུང་ལ་ངོ་རྒོལ་ལས་འགུལ་སྤེལ་བཞིན་ཡོད་པ་རེད།
༣ རྒྱ་ནག་གི་གནོན་ཤུགས་ལ་བརྟེན་ནས། ལྷོ་ཨཕྷ་རི་ཀ་གཞུང་གིས་༧གོང་ས་མཆོག ཡི་ཤུའི་ཆོས་དཔོན་ཀྲུ་ཀྲུ་མཆོག། དགུང་ལོ་བརྒྱད་བཅུར་ཕེབས་པའི། འཁྲུངས་སྐར་གྱི་མཛད་སྒོར་ཆིབས་བསྒྱུར་སྐྱོང་རྒྱུར། ཐོང་ཆན་ཝི་ས་ཕུལ་མེད་ནའང་། ཚེས་ ༧ ཉིན་ཆོས་དཔོན་ཀྲུ་ཀྲུ་མཆོག་གི་འཁྲུངས་སྐར་ཉིན། རྣམ་པ་གཉིས་ཀྱི་དྲ་བརྙན་བརྒྱུད་ནས་བཀའ་མོལ་གནང་འདུག གོང་ས་མཆོག་གིས། ཆོས་དཔོན་ཀྲུ་ཀྲུ་མཆོག་ནི་བདེན་པ་གཙོ་བོར་འཛིན་ཅིང་། དཀོན་མཆོག་གི་བྱིན་གྱིས་རླབས་པ་ཞིག་ཡིན་པས། སྐུ་ཚེ་ཡུན་རིང་བཞུགས་དགོས་པའི་ཐུགས་སྨོན་གནང་འདུག ཡི་ཤུའི་ཆོས་དཔོན་ཀྲུ་ཀྲུ་མཆོག་གིས་གོང་ས་མཆོག་ལ། རྒྱ་ནག་གི་ངོས་ནས་གོང་ས་མཆོག་ལ། འཇིགས་སྣང་བྱེད་དགོས་དོན་ཇི་ཡིན་བཀའ་འདྲི་ཞུས་པར་། གོང་ས་མཆོག་གིས་ རྒྱ་ནག་གཞུང་གིས་ང་རང་བདུད་ཞིག་ཡིན་པའི་དྲིལ་བསྒྲགས་ཤུགས་ཆེན་བྱེད་བཞིན་ཡོད་པ་རེད་ཅེས་དང་། སྟབས་མ་ལེགས་པ་ཞིག་ལ། རྒྱ་ནག་དམར་ཤོག་ཚོགས་པའི་དཔོན་རིགས་དང་། སྲིད་དབང་གཅིག་སྡུད་ལམ་ལུགས་ཀྱི་འགོ་ཁྲིད་ཚོས་། རྫུན་བཤད་རྒྱུ་ནི་ཁོང་ཚོའི་མི་ཚེའི་ནང་གི། ཆ་ཤས་ལྟ་བུ་ཞིག་ཆགས་ཡོད་སྟབས་ ངས་སྐད་ཆ་དྲང་པོ་བཤད་པ་དེས་རྒྱ་ནག་གི་དཔོན་རིགས་ཚོར་མི་བདེ་བ་བཟོ་གི་ཡོད་པ་རེད་ཅེས་བཀའ་ལན་གནང་འདུག
༤ བོད་མིའི་སྒྲིགས་འཛུགས་ཀྱི་བཀའ་ཁྲི་གསར་པ་བློ་བཟང་སེང་གེ་ལགས་གིས། བོད་རྒྱ་འབྲེལ་མོལ་གྱི་ལས་དོན་བསྐྱར་ཞིབ་ཀྱི་ཚོགས་འདུ་ཞིག་བསྐོངས་འདུག་། ཚེས་ ༡༠ ་ཉིན་བཀའ་ཁྲི་བློ་བཟང་སེང་གེ་ལགས་དབུ་བཞུགས་ཀྱིས། བོད་རྒྱ་འབྲེལ་མོལ་གྱི་ལས་དོན་བསྐྱར་ཞིབ་ཀྱི་ལྷན་ཚོགས་ཐེངས་ ༢༣་ པ་དེ། རྡ་རམ་ས་ལར་འཚོགས་ཡོད་ཅིང་། ལྷན་ཚོགས་དེའི་ཐོག་ ༧གོང་ས་མཆོག་གི་དམིགས་བསལ་སྐུ་ཚབ། བཀའ་ཟུར་རྒྱ་རི་བློ་གྲོས་རྒྱལ་མཚན་ལགས་དང་། སྐུ་ཚབ་སྐལ་བཟང་རྒྱལ་མཚན་ལགས། ཕྱི་འབྲེལ་བཀའ་བློན་བདེ་སྐྱིད་ཆོས་དབྱངས་ལགས་སོགས་ཚོགས་མི་རྣམས་ཚོགས་ཞུགས་བྱས་ཡོད་འདུག། ཐེངས་འདིའི་ཚོགས་འདུའི་ཐོག་རྒྱ་བོད་གྲོིས་མོལ་ཐད། གོ་བསྡུར་བྱས་པའི་གནས་ཚུལ་ཞིབ་ཕྲ་གང་ཡང་བཀོད་མི་འདུག
རྩོམ་རིགས། གསར་འགྱུར། | བསམ་ཚུལ། »
འབྲི་མཁན། དཔལ་ལྡན་རྒྱལ། on September 30th, 2011
༡ ཨ་མདོ་རྔ་པ་ཀིརྟི་དགོན་པའི་གྲ་པ་གཉིས་ཀྱིས་རང་ལུས་མར་བསྲེགས་བཏང་ནས་རྒྱ་ནག་གཞུང་ལ་ངོ་རྒོལ་བྱས་འདུག ཚེས་༢༥ཉིན་ ཨ་མདོ་རྔ་པ་ཀིརྟི་དགོན་པའི་གྲ་པ། བློ་བཟང་སྐལ་བཟང་དང་། བློ་བཟང་དཀོན་མཆོག་གཉིས་ཀྱིས་རྔ་པ་རྫོང་གི་ཁྲོམ་གཞུང་དུ། རྒྱལ་བ་རིན་པོ་ཆེ་སྐུ་ཚེ་ཁྲི་ལོར་བརྟན་པར་ཤོག བོད་ལ་ཆོས་དད་རང་དབང་དགོས་སོགས་ཀྱི་སྐད་འབོད་བྱེད་བཞིན་རང་ལུས་མེར་བསྲེགས་བཏང་འདུག རང་ལུས་མེ་བསྲེགས་གཏོང་མཁན་ཁོང་གཉིས་ཆ་རང་ལོ་༡༨་ཡིན་པ་དང་། རྔ་པ་རྫོང་རྨེའུ་རུ་མའི་རུ་ཆེན་གཉིས་ནས་ཡིན་འདུག ནང་མི་ཉེ་འབྲེལ་རྣམས་ཀྱིས་ཁོང་གཉིས་གང་དུ་ཡོད་མེད་ཤེས་རྟོགས་མེད་ནའང། རྒྱ་ནག་གཞུང་འབྲེལ་ཤིན་ཧྭ་གསར་སྤེལ་ཁང་གིས། ཁོང་གཉིས་སྲོག་སྐྱོབ་བྱས་ཏེ་སྨན་བཅོས་བྱེད་བཞིན་ཡོད་པས། ད་ལྟ་སྲོག་གི་ཉེན་ཁ་ལས་ཐར་ཡོད་ཚུལ་གནས་ཚུལ་སྤེལ་འདུག
དབུས་བོད་མིའི་སྒྲིག་འཛུགས་དང་། བོད་མི་མང་སྤྱི་འཐུས་ལྷན་ཚོགས་ཀྱིས་སླར་ཡང་ཀིརྟི་དགོན་པའི་དགེ་འདུན་པ་གཉིས་ནས་རང་ལུས་མེར་སྲེག་བཏང་ནས། འུ་ཐུག་ཐབས་ཟད་ཀྱི་བྱ་སྤྱོད་དེ་ལྟར་སྤེལ་བཞིན་པ་དེས། བོད་མི་ཚོ་དཀའ་ངལ་གྱི་གནས་སྟངས་ཇི་འདྲ་ཞིག་གི་འོག་གནས་ཡོད་པ། ར་སྤྲོད་གསལ་པོ་བྱེད་ཐུབ་པས་རྒྱ་ནག་གཞུང་འཛིན་པ་ཚོར། བོད་ཀྱི་ས་ཁུལ་ཁྱོན་ཡོངས་སུ་འཛིན་པའི་། དམ་དྲག་ཅན་གྱི་སྲིད་བྱུས་ལག་བསྟར་བྱེད་བཞིན་པ་དེར་བསྐྱར་དུ་བསམ་ཞིབ་བྱ་དགོས་པ་དང་། བོད་མི་ཚོའི་དཀའ་ངལ་འཕྲལ་དུ་ཞི་བའི་ཐོག་ནས་སེལ་དགོས་པའི་རེ་འབོད་ཞུས་འདུག
༢ གོང་ས་རྒྱལ་བ་རིན་པོ་ཆེ་ཡིས་། སྲིད་དོན་གྱི་དགོས་མཁོ་ལ་བརྟེན་ནས། སུ་ཞིག་གིས་ཁོང་གི་ཡང་སྤྲུལ་འདེམས་སྒྲུག་བྱས་པ་ཡིན་ན། དེ་ལ་སུས་ཀྱང་རྒྱལ་བའི་ཡང་སྤྲུལ་དུ་ངོས་འཛིན་དང་། དད་མོས་བྱེད་མི་དགོས། ཞེས་ཡོང་ཁྱབ་ཀྱི་གསུང་འཕྲིན་ཞིག་བསྩལ་འདུག
ཉེ་ལམ་རྡ་རམ་ས་ལར་འཚོགས་པའི་ཆོས་ལུཊ་ཚོགས་ཆེན་ཐེངས་བཅུ་གཅིག་པའི་ཐོག གོང་ས་མཆོག་གིས་བཀའ་ཡིག་བསྩལ་ཡོད་པ་དེའི་ནང༌། ཡང་སྲིད་གྱི་བྱུང་རབས་དང་། དགོས་མཁོ་སོགས་ངོ་སྤྲོད་གསལ་བཤད་གནང་བ་འབྲེལ། ༧སྐུ་ཕྲེང་བཅོ་ལྔ་པའི་ཡང་སྲིད་ངོས་འཛིན་བྱ་དགོས་ཀྱི་དུས་སྐབས་ཤིག་ཤར་ཚེ། དེའི་བྱེད་སྒོའི་འགན་ཁུར་གཙོ་བོ། ཏཱ་ལའི་བླ་མའི་བླ་བྲང་། དགའ་ལྡན་ཕོ་བྲང་ཡིད་ཆེས་དགེ་རྩའི་། དབང་ལྡན་འགན་འཛིན་རྣམས་ལ་ཡོད་པ་ཞེས་དང་། ཡང་གསུང་འཕྲིན་ནང་། ངོས་ནས་ཀྱང་བྱེད་ཕྱོགས་དེ་དག་ལམ་སྟོན་གསལ་བཀོད་ཀྱི་ཡིག་གེ་འཇོག་རྒྱུ་ཡིན་ཞིང༌། དེ་ལྟར་ཚུལ་མཐུན་རྩད་གཅོད་། ངོས་འཛིན་བྱུང་བའི་ཡང་སྤྲུལ་ཞིག་ལས། གཞན་དུ་སྲིད་དོན་གྱི་དགོས་མཁོ་ལ་བརྟེན་ནས། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་། ཆབ་སྲིད་དབང་འཛིན་པས་མཚོན། སྲིད་དབང་འཛིན་པ་སུ་ཞིག་གིས་ཡང་སྤྲུལ་འདེམས་སྒྲུག་བྱས་པ་བྱུང་ཚེ་། དེ་ལ་སུས་ཀྱང་རྒྱལ་བའི་ཡང་སྤྲུལ་དུ་ངོས་འཛིན་དང་། དད་མོས་བྱེད་མི་དགོས་པ་ཡིད་འཇགས་དགོས་ཅེས་བཀོད་འདུག ཡིན་ནའང། རྒྱ་ནག་གི་ཕྱི་སྲིད་ལས་ཁང་གི་མགྲིན་ཚབ་ཧོང་ལིས་ཡིས་། བླ་སྤྲུལ་གྱི་ཡང་སྲིད་ངོས་འཛིན་ཞུ་རྒྱུའི་བརྒྱུད་རིམ་དེ་ནི། རྒྱལ་ཁབ་ཀྱི་ཁྲིམས་ལུཌ་དང་། སྒྲིག་སྲོལ་གཏན་འབེབས་བྱས་པ་གཞིར་བཟུང་བྱེད་དགོས་པ་དང་། ཏ་ལའི་བླ་མའི་མཚན་གནས་དེ་རྒྱ་ནག་དབུས་གཞུང་གིས་ཕུལ་དགོས་གི་ཡོད་ལུགས་པེ་ཅིང་དུ། རྒྱུན་ལྡན་གྱི་གསར་འགོད་ལྷན་ཚོཌ་ཐོག་བརྗོད་འདུག་
༣ ཡང་ཟླ་བ་འདིའི་ཚེས༢༢་ནས་༢༤བར། ཉིན་གསུམ་རིང་བོད་བརྒྱུད་ནང་བསྟན་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི། ཆོས་ཚོགས་ཐེངས་བཅུ་གཅིག་པའི་ཐོག རྒྱ་བལ་འབྲུག་གསུམ་དུ་བཞུགས་པའི་རིས་མེད་ཆོས་བརྒྱུད་ཁག་གི་བླ་ཆེན་རྣམ་པ་དང་། ཆོས་ལུགས་སྤྱི་འཐུས་བཅས་ཁྱོན་མི་ ༥༠ ལྷག་འདུ་འཛོམས་བྱུང་ནས་། ཆོས་དོན་ལྷན་ཚོགས་དང་། དཔལ་རྒྱལ་བ་ཇོ་ནང་པ་སོགས་ཀྱི་སྐོར་ལ་བགྲོ་གླེང་གནང་ནས་མཇུག་སྡོམ་་གྲོས་ཆོད་བཞག་ཡོད་པ་ནི། བཙུན་མའི་རྒྱུགས་སྤྲོད་དང་། མཚན་གནས་ཁུངས་སོ་སོས་ཐག་གཅོད་བྱ་རྒྱུ་དང་། ཆོས་དོན་ལྷན་ཚོགས་ཀྱི་ཁྲིམས་གཞི་བསྐྱར་བཅོས་ཡོང་ཐབས་བྱ་རྒྱུ། ཇོ་ནང་པ་ནི་ལྟ་གྲུབ་དང་ཆོས་བརྒྱུད་གང་ཐད་ནས་རང་རྐང་ཚུགས་ཐུབ་པ་ཞིག་ཡིན་པར་ངོས་འཛིན་བྱས་ཡོད་པ་བཅས། ཐག་གཅོད་བྱས་འདུག།
༤ དགའ་ལྡན་བྱང་རྩེ་གྲྭ་ཚང་གི་དགེ་འདུན་པ་ ༡༡ གིས་ཕྱི་ཟླ་ ༨ ཚེས་ ༡༦ ནས་བཟུང་མྱ་ངན་གོམ་བགྲོད་ཞེས་པའི་། ལས་འགུལ་མགོ་འཛུགས་ཀྱིས་། རྒྱ་གར་གྱི་མངའ་སྡེ་མང་པོའི་ནང་གོམ་བགྲོད་གནང་མཐར་ཚེས་༢༧ཉིནརྡ་རམ་ས་ལར་འབྱོར་འདུག།
རྡ་རམ་ས་ལའི་དཔའ་བོའི་རྗེས་དྲན་རྡོ་རིང་གི་མདུན་ཐང་དུ་། གཞུང་འབྲེལ་མིན་པའི་ཚོགས་པ་ཁག་གི་དབུ་ཁྲིད་རྣམས་དང་། སྐྱ་སེར་མི་མང་བརྒྱ་ཕྲག་བརྒལ་བ་ཞིག་གི་ཕེབས་ མཇལ་དར་བསྒྲོན་ཏེ་ཕེབས་བསུ་དང་། རྒྱབ་སྐྱོར་གྱི་གཏམ་བཤད་བྱས་ནས་ ཁོང་ཚོའི་ལས་འགུལ་ལ་རྒྱབ་སྐྱོར་བྱས་ཡོད་པ་རེད ། གོམ་བགྲོད་གནང་མཁན་དགེ་འདུན་པ་དེ་དག་གིས་། སང་ཉིན་ནས་བཟུང་ཉིན་གསུམ་རིང་གཙུག་ལག་ཁང་གི་སྒོ་འགྲམ་དུ་ཟས་བཅད་ངོ་རྒོལ་གནང་རྒྱུ་ཡིན་འདུག
རྩོམ་རིགས། གསར་འགྱུར། | བསམ་ཚུལ། »
འབྲི་མཁན། དཔལ་ལྡན་རྒྱལ། on September 30th, 2011
ཡང་ཟླ་བ་འདིའི་ཚེས༢༢་ནས་༢༤བར། ཉིན་གསུམ་རིང་བོད་བརྒྱུད་ནང་བསྟན་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི། ཆོས་ཚོགས་ཐེངས་བཅུ་གཅིག་པའི་ཐོག རྒྱ་བལ་འབྲུག་གསུམ་དུ་བཞུགས་པའི་རིས་མེད་ཆོས་བརྒྱུད་ཁག་གི་བླ་ཆེན་རྣམ་པ་དང་། ཆོས་ལུགས་སྤྱི་འཐུས་བཅས་ཁྱོན་མི་ ༥༠ ལྷག་འདུ་འཛོམས་བྱུང་ནས་། ཆོས་དོན་ལྷན་ཚོགས་དང་། དཔལ་རྒྱལ་བ་ཇོ་ནང་པ་སོགས་ཀྱི་སྐོར་ལ་བགྲོ་གླེང་གནང་ནས་མཇུག་སྡོམ་་གྲོས་ཆོད་བཞག་ཡོད་པ་ནི། བཙུན་མའི་རྒྱུགས་སྤྲོད་དང་། མཚན་གནས་ཁུངས་སོ་སོས་ཐག་གཅོད་བྱ་རྒྱུ་དང་། ཆོས་དོན་ལྷན་ཚོགས་ཀྱི་ཁྲིམས་གཞི་བསྐྱར་བཅོས་ཡོང་ཐབས་བྱ་རྒྱུ། ཇོ་ནང་པ་ནི་ལྟ་གྲུབ་དང་ཆོས་བརྒྱུད་གང་ཐད་ནས་རང་རྐང་ཚུགས་ཐུབ་པ་ཞིག་ཡིན་པར་ངོས་འཛིན་བྱས་པ་བཅས་ཀྱི་ཐག་གཅོད་བྱས་འདུག
ཉེ་ལམ་རྡ་རམ་ས་ལར་འཚོགས་པའི་ཆོས་ལུཊ་ཚོགས་ཆེན་ཐེངས་བཅུ་གཅིག་པའི་ཐོག གོང་ས་རྒྱལ་བ་རིན་པོ་ཆེ་ཡིས་། སྲིད་དོན་གྱི་དགོས་མཁོ་ལ་བརྟེན་ནས། སུ་ཞིག་གིས་ཁོང་གི་ཡང་སྤྲུལ་འདེམས་སྒྲུག་བྱས་པ་ཡིན་ན། དེ་ལ་སུས་ཀྱང་རྒྱལ་བའི་ཡང་སྤྲུལ་དུ་ངོས་འཛིན་དང་། དད་མོས་བྱེད་མི་དགོས། ཞེས་ཡོང་ཁྱབ་ཀྱི་བཀའ་ཡིག་ཞིག་བསྩལ་འདུག གོང་ས་མཆོག་གིས་བཀའ་ཡིག་དེའི་ནང༌། ཡང་སྲིད་གྱི་བྱུང་རབས་དང་། དགོས་མཁོ་སོགས་ངོ་སྤྲོད་གསལ་བཤད་གནང་བ་འབྲེལ། ༧སྐུ་ཕྲེང་བཅོ་ལྔ་པའི་ཡང་སྲིད་ངོས་འཛིན་བྱ་དགོས་ཀྱི་དུས་སྐབས་ཤིག་ཤར་ཚེ། དེའི་བྱེད་སྒོའི་འགན་ཁུར་གཙོ་བོ། ཏཱ་ལའི་བླ་མའི་བླ་བྲང་། དགའ་ལྡན་ཕོ་བྲང་ཡིད་ཆེས་དགེ་རྩའི་། དབང་ལྡན་འགན་འཛིན་རྣམས་ལ་ཡོད་པ་ཞེས་དང་། ཡང་གསུང་འཕྲིན་ནང་། ངོས་ནས་ཀྱང་བྱེད་ཕྱོགས་དེ་དག་ལམ་སྟོན་གསལ་བཀོད་ཀྱི་ཡིག་གེ་འཇོག་རྒྱུ་ཡིན་ཞིང༌། དེ་ལྟར་ཚུལ་མཐུན་རྩད་གཅོད་། ངོས་འཛིན་བྱུང་བའི་ཡང་སྤྲུལ་ཞིག་ལས། གཞན་དུ་སྲིད་དོན་གྱི་དགོས་མཁོ་ལ་བརྟེན་ནས། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་། ཆབ་སྲིད་དབང་འཛིན་པས་མཚོན། སྲིད་དབང་འཛིན་པ་སུ་ཞིག་གིས་ཡང་སྤྲུལ་འདེམས་སྒྲུག་བྱས་པ་བྱུང་ཚེ་། དེ་ལ་སུས་ཀྱང་རྒྱལ་བའི་ཡང་སྤྲུལ་དུ་ངོས་འཛིན་དང་། དད་མོས་བྱེད་མི་དགོས་པ་ཡིད་འཇགས་དགོས་ཅེས་བཀོད་འདུག ཡིན་ནའང། རྒྱ་ནག་གི་ཕྱི་སྲིད་ལས་ཁང་གི་མགྲིན་ཚབ་ཧོང་ལིས་ཡིས་། བླ་སྤྲུལ་གྱི་ཡང་སྲིད་ངོས་འཛིན་ཞུ་རྒྱུའི་བརྒྱུད་རིམ་དེ་ནི། རྒྱལ་ཁབ་ཀྱི་ཁྲིམས་ལུཌ་དང་། སྒྲིག་སྲོལ་གཏན་འབེབས་བྱས་པ་གཞིར་བཟུང་བྱེད་དགོས་པ་དང་། ཏ་ལའི་བླ་མའི་མཚན་གནས་དེ་རྒྱ་ནག་དབུས་གཞུང་གིས་ཕུལ་དགོས་གི་ཡོད་ལུགས་པེ་ཅིང་དུ། རྒྱུན་ལྡན་གྱི་གསར་འགོད་ལྷན་ཚོཌ་ཐོག་བརྗོད་འདུག བོད་ཀྱི་ཆོས་བརྒྱུད་ཆེན་པོ་བཞི་དང་། གཡུང་དྲུང་བོན་གྱི་བླ་ཆེན་རྣམས་ལྷན་འཛོགས་ཀྱི་ཆོས་ལུཊ་ཚོགས་ཆེན་ཐེངས་བཅུ་གཅིག་པའི་ཐོག གོང་ས་རྒྱལ་བ་རིན་པོ་ཆེ་ཡིས་། ཁོང་གི་ཡང་སྲིད་ངོས་འཛིན་གནང་ཕྱོགས་སྐོར་ལ་བཀའ་སློབ་དང་། ཡོངས་ཁྱབ་གསུང་འཕྲིན་ཞིག་བསྩལ་ཡོད་པའི་གནས་ཚུལ་ ༼རང་དབང་གི་གླེང་སྟེགས་༽ ཞེས་པའི་ལེ་ཚན་ནང་རྒྱང་སྲིང་བྱས་པར་ཡོད་ཉན་འདོད་ན་སྦྲེལ་ཐག་འདིར་མཐུད་རོགས་ཞུ
རྩོམ་རིགས། གསར་འགྱུར། | བསམ་ཚུལ། »
འབྲི་མཁན། དཔལ་ལྡན་རྒྱལ། on June 7th, 2011
བློ་བཟང་རམས་པ།
ཚེས་༥སྟེ། རེས་གཟའ་ཉི་མའི་ཉིན་ཝ་ཤིན་ཏུང་གྲོང་ཁྱེར་སྲང་ལམ་ ༡༨ སྟེང་། ལོ་ན་གཉིས་དང་ཕྱེད་ཀར་སོན་པའི་བུ་ཆུང་ཉི་ཟླ་དང་། ངེད་གཉིས་དཔེ་དེབ་རྙིང་བ་བཙོང་སའི་ཚོང་ཁང་ཞིག་ཏུ་སོང་བ་ན། ༼ལྷ་ས་ནས་ཕེབས་པའི་སྨན་པ།༽ བློ་བཟང་རམས་པས་བརྩམས་ཞེས་པའི་དེབ་རྙིང་ཞིག་མཐོང་། དེབ་འདིས་ངའི་ཡིད་ཀྱི་དྲན་པ་ལོ་བཅུ་བཞི་ཡར་སྔོན་དུ་ཕྱིར་འཁྲིད་བྱས་སོང༌། དེ་ནི་༡༩༩༤་ལོའི་དབྱར་ཁའི་ཉིན་ཞིག་ལོན་དོན་གྲོང་ཁྱེར་ནང་དུ་དགོང་དྲོ་གསོལ་ཚིགས་ཞིག་གི་སྐབས་སུ། ལོ་ན་བཞི་བཅུ་ཡས་མས་ལ་སོན་པའི་དབྱིན་ཇུའི་བུད་མེད་ཞིག་གིས། “ངས་བློ་བཟང་རམས་པས་བརྩམས་པའི་སྦྱན་མིག་གསུམ་པ་དང༌། ལྷ་ས་ནས་ཕེབས་པའི་སྨན་པ་ཅེས་པའི་བོད་སྐོར་གྱི་དེབ་གཉིས་བཀླགས་མྱོང་། བོད་ནི་མཛེས་སྡུག་ཡིད་ཏུ་འོང་བའི་གནས་ཞིག་རེད། ཡིན་ནའང་བོད་མི་ཞིག་ལ་མཇལ་བ་ཐོག་དང་པོ་ཡིན་པས་ཧ་ཅང་དགའ་བོ་བྱུང་།” ཟེར།
དེ་ནི་ངའི་བློ་བཟང་རམས་པ་ཞེས་པའི་མིང་འདི་གོ་བ་ཐོག་མ་ཡིན། དེ་ནས་ངས་བློ་བཟང་རམས་པའི་སྐོར་ལ་ཉམས་འཇོག་བྱས་པ་ཡིན། ཁོང་ནི་དབྱིན་ཇུ་བ་ཞིག་ཡིན་པ་ལས་བོད་པ་མ་རེད། ཁོང་གི་དབྱིན་ཇུའི་མིང་ལ་Cyril Henry Hoskin (8 April 1910 – 25 January 1981)ཟེར་བ་དང་། བོད་ལ་ཕེབས་མྱོང་མེད་ནའང་། བོད་པའི་གྲྭ་བ་ཞིག་ལ་བརྫུས་ནས་བོད་ནང་གི་གནས་སྟངས་སྐོར་གྱི་དེབ་ཁ་ཤས་བརྩམས་འདུག དེབ་དེ་དག་གིས་སྤྱི་ལོ་༥༠་དང་༦༠་ནང་འཛམ་གླིང་དང་ཁེར་ཆད་དུ་གནས་པའི་བོད་གྱི་རྣམ་པ། གསང་བ་ལྐོག་གྱུར་ལྟ་བུའི་འཛམ་གླིང་མི་མང་དཀྱུས་མ་ཚོར་ངོ་སྤྲོད་བྱས་འདུག
དེ་རིང་དཔེ་དེབ་རྙིང་བ་བཙོང་ས་དེ་རུ ༼ལྷ་ས་ནས་ཕེབས་པའི་སྨན་པ།༽ བློ་བཟང་རམས་པས་བརྩམས་ཞེས་པའི་དེབ་དེ་ངས་བསམ་བློ་ཅི་ཡང་གཏོང་མ་དགོས་བར་རང་བཞིན་གྱིས་ཉོས་ཡོང་བ་ཡིན།
རྩོམ་རིགས། གནས་བསྐོར་ཟིན་ཐོ། | 4 Responses »
