གནས་བསྐོར་ཟིན་ཐོ།

...now browsing by category

 

ཝེ་ཐི་ནམ་གྱི་ནང་བའི་དགོན་པ།

Sunday, March 29th, 2015

 

image
དེ་རིང་རེས་གཟའ་ཉི་མའི་ཉིན།  (༢༠༡༥ ལོའི་སྤྱི་ཟླ་༣པའི་ཚེས༢༩) ཨ་རིའི་རྒྱལ་ས་ཝ་ཞིན་ཀྲོན་དུ་ཡོད་པའི་ཝེ་ཐི་ནམ་གྱི་ནང་བའི་དགོན་པ་ཞིག་ལ་སླེབས་སོང་། དགོན་པ་འདི་ནི་རྒྱལ་ས་ཝ་ཞིན་ཀྲོན་གྱི་ནུབ་བྱང་ཁུལ་གྱི་སྲང་ལམ་བཅུ་དྲུག་པའི་སྟེང་གནས་ཡོད་པ་དང་སྒོ་བྱང་༥༤༠༡ རེད།  དགོན་པ་འདི་ཝེ་ཐི་ནམ་གྱི་དམར་ཕྱོགས་དབང་བསྒྱུར་དྲག་གནོན་ལས་ཨ་རིའི་ནང་བཙན་བྱོལ་དུ་ཕེབས་པའི་གྲ་བ་གཉིས་ཀྱིས་༡༩༧༦ ལོར་གསར་བཞེངས་གནང་བ་དང་། དགོན་པའི་མིང་ལ་ Chùa Giác Hoàng ཟེར། དགོན་པ་འདི་རྒྱལ་སའི་མངའ་ཁུལ་དུ་ཡོད་པའི་ཝེ་ཐི་ནམ་མི་མང་གི་རིག་གཞུང་ལྟེ་གནས་ཁང་ལྟ་བུ་ཞིག་་ཀྱང་རེད།  ༢༠༡༠ ལོའི་ཨ་རིའི་མི་གྲངས་རྩིས་བཤེར་སྐབས་ཨ་རིའི་རྒྱལ་ཡོངས་སུ་ཝེ་ཐི་ནམ་གྱི་མི་གྲངས ༡༥༤༨༤༤༩ ཡོད་པ་དང།  རྒྱལ་ས་ཝ་ཞིན་ཀྲོན་ཀྱི་མངའ་ཁུལ་དུ་ཝེ་ཐི་ནམ་གྱི་མི་གྲངས་ ༥༨༧༦༧ ཡོད་འདུག
image

བྱ་ཁྲུང་ཁྲུང་ཨེ་རེད།

Wednesday, December 17th, 2014

དེ་རིང་ཟླ་བ་ ༡༢ ཚེས་༡༧ ཉིན། འཇུ་མེ་ཁའི་Jamaica གླིང་ཕྲན་གྱི་མོན་ཐི་འགོ་ Montego Bay ས་གནས་སུ Holiday Inn SunSpree མགྲོན་ཁང་དུ་ཞོགས་པ་སྔ་མོ་ནས་ཡར་ལངས་ཏེ།  ནང་མི་ཚང་མ་མཚོ་འགྲམ་བརྒྱུད་ནས་སྤྲོ་འཆམ་དུ་སོང་བ་ཡིན།  མཛེས་སྡུག་ཡིད་དུ་འོང་ཞིང་། རྣ་བར་སྙན་པའི་རྒྱ་མཚོའི་རྦ་རླབས་དང་། གནམ་གཤིས་ཚ་བའི་ས་ཁུལ་དུ་སྐྱེས་ཡོད་པའི་མིང་མི་ཤེས་པ་དང་། སྔར་མཐོང་མ་མྱོང་བའི་ཤིང་སྡོང་དང་མཛེས་ལྗོངས་ལ་རོལ་སྐབས་ཡིད་ལ་བག་ཕེབས་ཀྱི་ཚོར་སྣང་བྱུང་། ང་ཚོའི་སྡོད་སའི་མཚོ་འགྲམ་གྱི་མགྲོན་ཁང་འདི་ནས་རྒྱ་མཚོར་བརྒལ་ནས་འགྲོ་ཐུབ་སར་གླིང་ཕྲན་ཞིག་འདུག  དེ་ནི་རང་བྱུང་གི་གླིང་ཕྲན་ཞིག་ཡིན་ནམ། ཡང་ན་མིས་བཟོས་གླིང་ཕྲན་ཞིག་ཡིན་པ་བརྗོད་དཀའ།  ང་ཚོ་རྒྱ་མཚོར་བརྒལ་ནས་གླིང་ཕྲན་དེར་སོང་ནས་བག་ཕེབས་ལྷོད་གཡེང་ངང་སྡོད་སྐབས།  དྲི་བ་འདོན་རྒྱུ་དགའ་བའི་ངའི་བུ་ཆུང་གིས། ཨ་ཕ། ཨ་ཕ་ཟེར་བཞིན་བྱ་དཀར་པོ་ཞིག་ལ་མཛུབ་མོ་འཛུགས་ནས།   བྱ་འདིའི་མིང་ག་རེ་རེད་ཟེར། ངའི་བུ་ཆུང་ལ། ཁ་རོགས་ཟེར་བཞིན། པར་ཆས་བཟུང་ནས་བྱ་དེའི་ཕྱོགས་སུ་རྒྱུགས་པ་ཡིན། བྱ་འདི་ཁྲུང་ཁྲུང་དཀར་མོ་ཨེ་རེད།

image

བྱ་དེ་ཁྲུང་ཁྲུང་དཀར་མོ།།  རྒྱ་མཚོའི་ཀློང་ལ་གཟིགས་པ།  གྲོགས་ལ་རེ་སྒུག་ཡིན་ནམ།། ཁ་ལ་ཟས་ཞིག་འདོད་དམ།།

འཇུ་མེ་ཁ Jamaica

Tuesday, December 16th, 2014

དེ ་རིང་ཟླ་བ་ ༡༢ ཚེས་༡༦ ཉིན། འཇུ་མེ་ཁའི་Jamaica གླིང་ཕྲན་གྱི་མོན་ཐི་འགོ་ Montego Bay ས་གནས་སུ Holiday Inn Sun Spree མགྲོན་ཁང་དུ་ཡུལ་སྐོར་སྣེ་ཤན་པར་སྒུག་ནས་སྡོད་སྐབས། ངའི་ཕ་ཡུལ་ཨ་མདོ་ས་ཁུལ་དུ་དེ་རིང་ཡང་ཕོ་གཞོན་ཞིག་གིས་རང་ལུས་མེ་བསྲེགས་བྱུང་ཞེས་པའི་གནས་ཚུལ་འབྱོར། སེམས་འཁྱག་སོས་སོབ་བྱུང་། གང་ལྟར་ང་ཚོ་གསོན་དགོས་ལ།  ཉིན་ལྟར་ང་ཚོ་འཚོ་དགོས། ངས་རང་གི་བཟའ་ཟླ་དང་བྱིས་པ་གཉིས་ལ་གནས་ཚུལ་འདིའི་སྐོར་ཅི་ཡང་མ་བཤད་པར་དེ་རིང་གི་འཚོ་བ་འགོ་ཚུགས་པ་ཡིན།

image

ཞོགས་པའི་ཆུ་ཚོད་དགུ་བའི་ཐོག་གནས་ཚང་མགྲོན་ཁང་ནས་མི་བཅོ་ལྔ་ཤོངས་པའི་རླངས་འཁོར་ཆུང་བ་ཞིག་ལ་བསྡད་ནས་ནས་འཚིག་ཇ་གྲགས་ཅན་ཐོན་ཡུལ Blue Mountain སྦི་ལོ་མོན་ཀྲོན་དང་།   དྲང་བདེན་མིན་པའི་འཛམ་གླིང་འདི་དཀྲུག་དཀྲུག་བཏང་ནས་ཉམས་ཆུང་ནུས་མེད་ཀྱི་མི་རྣམས་ལ་རང་ཉིད་ཀྱི་ཐོབ་ཐང་རྩོད་ལེན་ཆེད་བློ་སྤོབས་དང་། སྒུལ་ཤུགས་གནང་མཁན་གཞས་པ་གྲགས་ཅན་སྤ་སྦའུ་མར་ལེ་འཁྲུངས་ཡུལ་དང།  ཁོང་དུར་དུ་སྦས་ཡུལ་Nine Mile ཞེས་པའི་ས་གནས་སོགས་བརྒྱུད་ནས་གཡོན་ཕྱོགས་རྒྱ་མཚོ་དང་།  གཡས་ཕྱོགས་རི་ཡིན་པའི་གཞུང་ལམ་སྟེང་ཆུ་ཚོད་གཅིག་དང་ཕྱེད་ཀ་བསྐྱོད་རྗེས། Dunn River Fall ཞེས་པའི་རྦབ་ཆུ་ཡོད་སའི་ས་གནས་དེར་བསླེབས་། དེ་ནི་ཤིང་ནགས་་གི་དཀྱིལ་དུ་འབབ་བཞིན་པའི་རྦབ་ཆུ་ཞིག་རེད། གནས་དེ་རུ་ཡུལ་སྐོར་སྤྲོ་འཆམ་པ་བརྒྱ་ཕྲག་མང་པོ་ཐེམ་སྐས་ལྟ་བུའི་རྦབ་ཆུ་དེར་ཡར་འཛེགས་ནས་མཛེས་ལྗོངས་ལ་རོལ་བཞིན་འདུག ང་ཚོ་ཀྱང་ཡུལ་སྐོར་བཞིན་དག་འདྲ་བར་ཧ་ཅང་སྤྲོ་བོ་བྱུང་།

གནས་དེ་ནས་ཕྱིར་མགྲོན་ཁང་ཡོང་བའི་ཆུ་ཚོད་གཅིང་དང་ཕྱེད་ཀའི་རིང་གི་ལམ་བར་དུ། བཟའ་ཟླ་དང་།  བུ་མོ་གཉིས་གཉིད་ལ་རོལ་སོང་།  ལོ་དྲུག་སོན་ལ་ཉེ་བའི་བུ་ཆུང་གིས་། ཨ་ཕ། འཇུ་མེ་ཁ་ཆེན་པོ་རེད་དམ། མི་གྲངས་ག་ཚོད་ཡོད་པ་རེད་སོགས་དྲི་བ་མང་པོ་ཞིག་དྲིས་བྱུང་། སྟབས་ལེགས་པ་ཞིག་ང་ཚོ་ནང་མི་རྣམས་རྒྱལ་ཁབ་འདིར་གུང་གསེང་ལ་མ་ཡོང་གོང་། ངས་འཇུ་མེ་ཁའི་སྐོར་ཅུང་ཙམ་ལྟ་ཀློག་བྱས་པ་ཡིན། དེ་བས་ངས་བུ་ཆུང་དྲི་བ་ལན་འདེབས་རྒྱུར་དཀའ་ངལ་མེད་པར་འདི་ལྟར་ལན་འདེབས་བྱས་པ་ཡིན།

འཇུ་མེ་ཁ་གླིང་ཕྲན་ནང་མི་གྲངས་ས་ཡ་གཉིས་དང་འབུམ་བརྒྱད་ཡོད་པ་དང་། དེའི་ནང་མི་གྲངས་ས་གཅིག་ཙམ་རྒྱལ་ས་ཁིན་སེ་ཀྲོན་ནང་གནས་སྡོད་བྱས་ཡོད་པ་རེད།  གླིང་ཕྲན་རྒྱལ་ཁབ་འདིའི་ནང་གི་མི་གྲངས་བརྒྱ་ཆའི་དགུ་ཅུ་ཨ་ཧྥེ་རི་ཀའི་མིའི་རུས་བརྒྱུད་ཡིན་འདུག འཇུ་མེ་ཁ་ནི་མཐའ་ཕྱོགས་བཞི་མཚམས་བརྒྱད་རྒྱ་ཚོས་བསྐོར་ཡོད་པའི་གླིང་ཕྲན་ཞིག་ཡིན་ལ། གླིང་ཕྲན་འདིའི་ས་ཁྱོན་ལ་སྤྱི་ལེ་གྲུ་བཞི་མ་ ༡༠༩༩༠ ཡོད་པ་རེད། གནའ་སྔ་མོར་གླིང་ཕྲན་འདི་སི་པན་གྱིས་བདག་བཟུང་བྱས་ཡོད་པ་དང་། ༡༦༦༥ ལོར་དབྱིན་ཇིས་དབང་བསྒྱུར་བྱས་ནས་གླིང་ཕྲན་འདིའི་མིང་ལ་འཇུ་མེ་ཁ་ཞེས་བཏགས་འདུག ༡༩༦༢ ལོའི་ཟླ་བ་བརྒྱད་པའི་ཚེས་གཉིས་ཉིན་དབྱིན་ཇིས་དབང་བསྒྱུར་ལས་རང་བཙན་ཐོབ་ཡོད་པ་རེད།

འཇུ་མེ་ཁ་རྒྱལ་ཁབ་དང་།  སྤ་སྤའུ་མར་ལེ་ལགས།

བཀྲ་ཤིས་བདེ་ལེགས། ང་ཚོ་ནང་མི་ཚང་མ་ཁྱེད་ལ་ལྟ་སྐོར་དུ་སླེབས་ཡོད།

དཀྲུག་དཀྲུག་གཏོང་རོགས། Stir It Up. http://youtu.be/y5sOzbD29GQ

ཡར་ལོངས་དང་། ཁྱེད་ཀྱི་ཐོབ་ཐང་གི་ཆེད་དུ་ཡར་ལོངས། Get up Stand Up. http://youtu.be/Sbh3xV_93dg

ཨ་རིའི་གྲོས་ཚོགས་ཁང་དུ་ལྟ་བསྐོར།

Sunday, April 20th, 2014

ཟླ་ངོ་བརྒྱད་ལ་སོན་པའི་བུ་མོ་དང་། ལོ་ལྔ་ལྷག་ལ་སོན་པའི་བུ་གཉིས་ཁྲིད་ནས་ཡུལ་བསྐོར་དུ་འགྲོ་རྒྱུ་ནི་ལས་སླ་བོ་ཞིག་མ་རེད། ཡིན་ནའང་། འདས་པའི་ཉིན་ཁ་ཤས་རིང་བཟའ་ཟླ་དང་། བུ་ཕྲུག་གཉིས་མཉམ་དུ་ང་རང་ལོ་བཅོ་ལྔའི་རིང་རྒྱལ་ས་ཝ་ཞིན་ཀྲོན་དུ་གནས་སྡོད་བྱས་ཀྱང་། སོང་མ་མྱོང་བའི་གནས་ཆེན་ཁག་ཅིག་ཏུ་ལྟ་བསྐོར་དུ་སོང་བ་ཡིན། ད་ཐེངས་ཉིན་མཚན་གཉིས་ཀྱི་དུས་ཚོད་ཁོང་ཚོ་དང་མཉམ་དུ་བསྐྱལ་བ་འདིས་ང་ལ་ཞི་བདེ་བག་ལྷོད་དང་། སེམས་ཚོར་སྐྱིད་པའི་སྤྲོ་སྣང་ཞིག་སྤྲད་བྱུང་།

image

ཉེ་ལམ་ང་ཚོའི་ནང་མི་ཚང་མ་ཨ་རིའི་གྲོས་ཚོགས་ཁང་དུ་ལྟ་བསྐོར་དུ་སོང་བ་ཡིན། ང་ལ་མཚོན་ན་འདི་ག་རྒྱལ་ས་ཝ་ཤིན་ཀྲོན་ནང་ལོ་བཅོ་ལྔ་ལྷག་བསྡད་པའི་རིང་། ཨ་རིའི་གྲོས་ཚོགས་ནང་གསར་འགོད་ལས་དོན་ཆེད། ཐེངས་མང་བཅར་མྱོང་ཡོད་ནའང་། གྲོས་ཚོགས་ནང་གི་ཡུལ་བསྐོར་སྤྲོ་འཆམ་ལ་འགྲོ་སར་ཁྱོན་ནས་སོང་མྱོང་མེད། ད་ཐེངས་ནང་མི་དང་མཉམ་དུ་ཨ་རིའི་གྲོས་ཚོགས་ཁང་གི་ནང་། ཡུལ་བསྐོར་སྤྲོ་འཆམ་དུ་ཕྱིན་པ་འདི་ང་ལ་མཚོན་ན་དོན་སྙིང་ལྡན་པ་ཞིན་ཡིན། གང་ལ་ཟེར་ན། ལོ་བཅོ་ལྔའི་རིང་རང་ཉིད་བསྡད་ཡོད་སའི་ས་གནས་འདིར་ཡོད་པའི་ཨ་རིའི་གྲོས་ཚོགས་ནང་ལྟ་བསྐོར་དུ་ག་རེ་བྱས་ནས་མ་སོང་རེད། དྲི་བ་འདི་ལ་ང་ལན་འདེབས་རྒྱུ་མི་འདུག འོ་ན་ག་རེ་བྱས་ནས་ལོ་བཅོ་ལྔའི་རྗེས་ནས་དེ་རིང་ལྟ་བསྐོར་དུ་སོང་བ་ཡིན་ནམ། དེ་ནི་ངས་བུ་ཕྲུག་གཉིས་དང་འབྲེལ་བ་དམ་པོ་ཡོད་པ་འདྲ། འཛམ་གླིང་འདིའི་སྟེང་། སྟོབས་འབྱོར་མངའ་ཐང་དང་། དབང་ཤུགས་ཆེ་བའི་རྒྱལ་ཁབ་འདིའི་དམངས་གཙོའི་ལམ་ལུགས་ཀྱི་ཁྲིམས་དང་། སྒྲིག་གཞི་གཏན་འབེབས་བྱེད་སའི་གྲོས་ཚོགས་འདིའི་ནང་ལྟ་བསྐོར་དུ་བསྐྱོད་རྒྱུར་ངས་རང་གི་སྙིང་དང་འདྲ་བའི་བུ་དང་། བུ་མོ་གཉིས་ལ་ད་ལྟའི་བར་དུ་སྒུག་ནས་བསྡད་པ་ཡིན་ནམ། ཡིན་མིན་ང་ལའང་གསལ་བོར་བཤད་རྒྱུ་མེད། གང་ལྟར་ལོ་བཅོ་ལྔའི་རྗེས་ནས་ང་རང་བུ་ཕྲུག་གཉིས་དང་། རང་གི་བཟའ་ཟླའི་མཉམ་དུ་ཨ་རིའི་གྲོས་ཚོགས་ནང་ལྟ་བསྐོར་དུ་བསྐྱོད་པར་སེམས་པ་ཤིན་ཏུ་དགའ།
གྲོས་ཚོགས་ཁང་ལ་ལྟ་བསྐོར་བསྐྱོད་རྒྱུར་རིན་པ་སྤྲོད་མི་དགོས་པ་དང་། བདེ་འཇགས་ཆེད་ལུས་བཤེར་དམ་པོ་བྱེད་ཀྱིན་འདུག ལྟ་བསྐོར་འགོ་འཛུགས་སྐབས་གྲོས་ཚོགས་དང་། གྲོགས་ཚོགས་ཁང་གི་ལོ་རྒྱུས། བྱེད་ནུས། དགོས་དམིགས་སོགས་གསལ་སྟོན་ཐུབ་པའི་བརྙན་ཐུང་སྐར་མ་བཅུ་གསུམ་ཅན་ཞིག་བསྟན་བྱུང་། གྲོས་ཚོགས་འདི་ནི་ཨ་རིའི་མི་གྲངས་ས་ཡ་སུམ་བརྒྱའི་རང་ཉིད་ཀྱི་འཐུས་ཚབ་བརྒྱུད་ནས་བསམ་ཚུལ་བརྗོད་སའི་གླེང་སྟེགས་ཤིག་ཡིན། ཨ་རི་ནི་བསམ་ཚུལ་གཅིག་དང་། འབོད་སྒྲ་གཅིག་གི་ལྟ་བ་འཛིན་མཁན་མ་ཡིན་པར། བསམ་ཚུལ་འདྲ་མིན་དང་། འབོད་སྒྲ་སྣ་ཚོགས་གཞི་གཅིག་ཏུ་སྤུངས་ནས་གྲོས་བསྡུར་བྱས་ཏེ། ཨ་རིའི་མི་མང་ས་ཡ་སུམ་བརྒྱའི་ཐུན་མོང་གི་ཁེ་ཕན་བཙལ་གྱིན་ཡོད། གྲོས་ཚོགས་ཁང་འདི་ནི་ཨ་རིའི་དམངས་གཙོའི་ལམ་ལུགས་ཀྱི་རྨང་གཞིའི་རྩ་བ་དང་། ཨ་རིའི་མི་མང་ས་ཡ་སུམ་བརྒྱའི་ཐུན་མོང་གི་ཁེ་ཕན་བཙལ་སའི་གནས་ཡིན།

image
ཨ་རིའི་རྒྱལ་ཡོངས་གྲོས་ཚོགས་གོང་འོག་གཉིས་ཡོད། གྲོས་ཚོགས་འོག་མའི་ནང་འཐུས་མི་༤༣༥་ཡོད། འཐུས་མིའི་ཡོང་ཁུངས་ནི་མངའ་སྡེ་སོ་སོའི་མི་གྲངས་མང་ཉུང་ལ་གཞིགས་ནས་མངའ་སྡེ་རེ་རེ་ནས་འཐུསས་མིའི་གྲངས་ལ་མང་ཉུང་ཡོད། དཔེར་ན་མི་གྲངས་ཆེས་མང་བའི་ཁ་ལེ་ཧྤེ་ནེ་ཡའི་ནས་གྲོས་ཚོགས་ཀྱི་འཐུས་མི་ ༥༣ ཡོད་ལ། ཨ་ལ་སའེ་ཁ་དང་། མོན་ཀྲ་ན། ཝར་མ་ཀྲི་སོགས་མངའ་སྡེ་བདུན་ནས་གྲོས་ཚོགས་ནང་འཐུས་མི་གཅིག་རེ་ཡོད། གྲོས་ཚོགས་འོག་མའི་འཐུས་མིའི་ལས་ཡུན་ལོ་གཉིས་ཡིན། གྲོས་ཚོགས་གོང་མའི་ནང་འཐུས་མི་བརྒྱ་ཐམ་པ་ཡོད། འཐུས་མིའི་ཡོང་ཁུངས་ཨ་རིའི་མངའ་སྡེ་ལྔ་བཅུ་ཐམ་པའི་ནང་མི་གྲངས་མང་ཉུང་ལ་བལྟས་མེད་ཀྱིས་མངའ་སྡེ་རེ་ནས་འཐུས་མི་གཉིས་རེ་ཡོད། ལས་ཡུན་ལོ་དྲུག་ཡིན། གྲོས་ཚོགས་གོང་འོག་གཉིས་ཀྱི་འཐུས་མི་སུ་རུང་བསྐྱར་དུ་འདེམས་པར་དགག་བྱ་མེད།

གྲོས་ཚོགས་ལ་ཁྲིམས་བཟོ་ལྷན་ཁང་ཡང་ཟེར། གྲོས་ཚོགས་ཀྱིས་དབུས་གཞུང་གི་ཁྲིམས་གཞི་གཏན་འབེབས་བྱེད་ཀྱིན་ཡོད་ལ། གཏན་འབེབས་བྱས་པའི་ཁྲིམས་གཞི་དེ་ཨ་རིའི་མངའ་སྡེ་ལྔ་བཅུ་ཐམ་པ་དང༌། དམིགས་བསལ་ས་ཁུལ་རྒྱལ་ས་ཝ་ཞིན་ཀྲོན། ཨ་རིའི་མི་ཡོངས་ལ་ཁྱབ། ཁྲིམས་ཀྱི་བྱེད་ནུས་ནི། མི་ཡོངས་རྫོགས་ཁྲིམས་ལུགས་ཀྱི་རྗེས་སུ་འབྲངས་དགོས་པ་དང་། སྲིད་གཞུང་དང་དབུ་ཁྲིད་ཀྱིས་ཁྲིམས་ལུགས་ལ་བརྩི་བཀུར་བྱེད་དགོས་པ། མི་སུ་ཡང་ཁྲིམས་ཀྱི་སྒང་ན་མེད་པ་དེ་ཡིན།

image
༢༠༠༨ལོའི་ཟླ་བ་བཅུ་བའི་ཚེས་བཅུ་བདུན་ཉིན། ཨ་རིའི་གྲོས་ཚོགས་ཀྱི་ཆེས་མཐོའི་གསེར་གྱི་གཟེངས་རྟགས། ༧གོང་ས་མཆོག་ཕུལ་ཡོད། སྐབས་དེར་གོང་ས་མཆོག་གིས། ༼ང་ལ་གྲོས་ཚོགས་ཀྱི་གསེར་གྱི་རྟགས་མ་གནང་བ་འདིས་དོན་དམ་པའི་གཟེངས་བསྟོད་ཆེན་པོ་ཐོབ་བྱུང༌། ངོས་འཛིན་འདིས་ང་ལ་དམིགས་བསལ་འགན་འཁྲི་ཡོད་པའི་བོད་མི་ཚོར་བློ་སྤོབས་དང་། དགའ་སྤྲོ་ཚད་མེད་སྐྲུན་ངེས། ཁོང་ཚོའི་བདེ་དོན་སྒྲུབ་རྒྱུ་ནི་ངའི་རྒྱུན་གྱི་ཀུན་སློང་ཞིག་ཡིན་པ་དང༌། ངས་རྒྱུན་དུ་རང་ཉིད་བོད་མི་མང་གི་རང་དབང་ལྡན་པའི་མགྲིན་ཚབ་པ་ཞིག་ལ་ངོས་འཛིན་བྱེད་ཀྱི་ཡོད། གཟེངས་བསྟོད་འདིས་འཛམ་གླིང་ཞི་བདེ་དང༌། འཚེ་བ་མེད་པ། དེ་བཞིན་དུ་མི་རིགས་ཕན་ཚུན་དང་ཆོས་ལུགས་མཐུན་ལམ་བཅས་ཀྱི་ཆེད་འབད་བརྩོན་གནང་མཁན་རྣམས་ལ་རྒྱབ་སྐྱོར་གྱི་བརྡ་ལན་ཤུགས་ཆེ་གཏོང་བའི་ཡིད་ཆེས་ཡོད།༽ཞེས་གསུངས་ཡོད།
ཡང་༡༩༨༧ལོའི་ཟླ་བ་དགུ་བའི་ཚེས་༢༧ ཉིན་། ༧གོང་ས་མཆོག་གིས་ཨ་རིའི་གྲོས་ཚོགས་འདིའི་འགྲོ་བ་མིའི་ཐོབ་ཐང་ཚོགས་ཆུང་ནང་། བོད་

དོན་ཐག་གཅོད་ཆེད། ཞི་བའི་གྲོས་འཆར་དོན་ཚན་ལྔ་གསལ་བསྒྲགས་བྱས་ཡོད། དེ་ནི་དེང་ཀྱི་དབུ་མའི་ལམ་གྱི་རྩ་བའི་རྨང་གཞི་ཡིན། ཡིན་ནའང་། དེང་གི་དབུ་མའི་ལམ་གྱིས་རྩ་བ་དོར་ནས་ཡལ་ག་ལ་འཇུས་ནས་བསྡད་ཡོད། ཕྱོགས་ཡོངས་ཀྱི་འཁོར་བསྐྱོད་ལ་བལྟས་ན། རྗས་ཕྱོགས་ཡལ་ག་དོར་ནས་ལོ་མ་ལ་མི་འཇུ་བའི་ངེས་བ་མི་འདུག

ཨ་རིའི་སྲིད་འཛིན་གཉིས་པ་འཇོན་ཨ་ཀྲེམ(John Adams) གྱིས།“ང་ཚོའི་རྒྱལ་ཁབ་ནི་ཁྲིམས་ཀྱིས་སྐྱོང་བའི་སྲིད་གཞུང་ཅིག་ཡིན་པ་ལས་མིས་སྐྱོང་བའི་གཞུང་ཅིག་མིན།”ཞེས་གསུངས་ཡོད། མི་ཚང་མ་ཁྲིམས་ལུགས་གཅིག་མཚུངས་ཀྱིས་འཛིན་སྐྱོང་བྱས་པ་ཡིན་ན་མི་སྒེར་གྱི་ཐོབ་ཐང་དང་རང་དབང་ལ་སྲུང་སྐྱོབ་ཡག་པོ་བྱེད་ཐུབ།

image ༡༧༩༣ ལོར་ཨ་རིའི་གྲོས་ཚོགས་ཁང་གི་འཛུགས་སྐྲུན་འགོ་ཚུགས་ཡོད་པ་དང་། ༡༨༠༠ལོར་གྲོས་ཚོགས་ཁང་འདིའི་ནང་གྲོས་ཚོགས་ཀྱི་ཚོགས་འདུ་ཐོག་མར་འཚོགས། ༡༨༡༢ ལོའི་དབྱིན་ཇུ་དང་ཨ་རིའི་དམག་འཁྲུག་བྱུང་དང་། ༡༨༡༤ ལོར་དབྱིན་ཇུའི་དམག་དཔུང་གི་གྲོས་ཚོགས་ཁང་འདི་མེ་བསྲེགས་བཏང་ཡོད་ལ། དེའི་རྗེས་གྲོས་ཚོགས་ཁང་བསྐྱར་གསོ་དང་། རྒྱ་བསྐྱེད་སོགས་འཛུགས་བསྐྲུན་ཐེངས་ཁ་ཤས་བྱས་ནས་བརྗིད་ཉམས་ལྡན་པའི་ད་ལྟའི་ཨ་རིའི་གྲོས་ཚོགས་ཁང་འདི་གྲུབ་པ་རེད།
རྩོམ་ཐུང་འདི་ཀློག་མཁན་གང་ཟག་སུ་རུང་ཨ་རིའི་རྒྱལ་ས་ཝ་ཞིན་ཀྲོན་ལ་ཡུལ་བསྐོར་དུ་ཕེབས་པའི་གོ་སྐབས་བྱུང་ཚེ། ངེས་བར་དུ་ཨ་རིའི་གྲོས་ཚོགས་ཁང་ལ་ལྟ་བསྐོར་དུ་འགྲོ་རྒྱུར་ལམ་སྟོན་བྱེད་འདོད་བྱུང་།

ཨ་རིའི་རྒྱལ་ཡོངས་དུར་ས།

Thursday, April 17th, 2014

ངེད་ནང་མི་ཚང་མ་ཨ་རིའི་རྒྱལ་ཡོངས་དུར་ས་ལ་ལྟ་བསྐོར་དུ་སོང་བ་ཡིན། དུར་ས་ལ་ལྟ་བསྐོར་དུ་སོང་བ་ཡིན་ཞེས་བརྗོད་སྐབས་བོད་པ་མང་པོ་ཞིག་རང་བཞིན་གྱིས་རྣམ་རྟོག་ཟ་ངེས་ཡིན། ཡིན་ནའང་། ཨ་རིར་མཚོན་ན་དུར་ས་འདི་ནི། ཡུལ་བསྐོར་སྤྲོ་འཆམ་པའི་ལྟ་བསྐོར་བྱེད་སའི་གནས་གལ་ཆེན་ཞིག་ཡིན།

image

ཨར་ལན་ཀྲོན་རྒྱལ་ཡོངས་དུར་ས་འདི་ལ་ཨ་རིའི་རྒྱལ་ཡོངས་དུར་ས་ཞེས་འབོད་ལ། དུར་ས་འདི་ནི་རྒྱལ་ས་ཝ་ཞིན་ཀྲོན་དང་། ཝར་རྗེ་ནེ་ཡ་མངའ་སྡེ་གཉིས་བར་ཡོད་པའི་ཕའོ་ཀྲོ་མ་ཁུ་གཙང་པོའི་སྟེང་གི་དྲན་རྟེན་ཟམ་པ་བརྒལ་མ་ཐག་གནས་འདིར་འབྱོར། དུར་ས་འདི་༡༨༦༦ ལོར་གསར་བསྐྲུན་བྱས་པ་དང་། ས་ཁྱོན་ལ་ཨའེ་ག༦༢༤ ཡོད། དུར་ས་འདིའི་ནང་ཨ་རིའི་སྲིད་འཛིན་རྗེ་ཨེ་ཧྥུའུ། ཁེན་ན་ཀྲི་གཙོས་པའི་དམག་མི་དང་། ཉེ་འབྲེལ་ནང་མི་འབུམ་བཞི་ཡི་བེམ་པོ་དུར་འཇུག་བྱས་ཡོད། གནས་འདི་ལ་ལོ་ལྟར་ཡུལ་བསྐོར་བ་ས་ཡ་གསུམ་ལྷག་ལྟ་བསྐོར་དུ་ཡོང་གིན་ཡོད་འདུག

image

དུར་ས་འདིའི་ནང་ལོ་ན་བཅུ་དགུ་ཡིན་པའི་བོད་ཀྱི་བུ་ཞིག་གི་བེམ་པོ་ཡང་སྦས་ཡོད། ཁོང་ནི་ངས་ངོ་ཤེས་པའི་ཡ་རབས་ཀུན་མཐུན་གྱི་བོད་པའི་བུ་ཞིག་ཡིན། ཁོང་ཨེ་རག་གི་དམག་འཁྲུག་ཁྲོད་༢༠༠༥ལོའི་སྤྱི་ཟླ་བཞི་བའི་ཚེས་གཉིས་ཉིན་འདས་གྲོངས་སུ་གྱུར། གནས་ཚུལ་འདིར་གཟིགས། http://projects.militarytimes.com/valor/marine-lance-cpl-tenzin-dengkhim/764517
ཁོང་དུར་ས་འདིར་དུར་སྦས་ཀྱི་མཛད་སྒོ་སྟེང་ང་ཡང་ཞུགས་ཡོད། སྐབས་དེར་ང་མིག་ལས་རང་དབང་མེད་པར་མིག་ཆུ་བཞུར་སོང་། ངས་ཨེ་རག་གི་དམག་འཁྲུག་ལ་ཐོག་དང་པོ་ནས་ངོ་རྒོལ་བྱས་པ་ཡིན། རང་ཉིད་ཀྱིས་མི་འདོད་པ་དང་། ངོ་རྒོལ་བྱེད་བཞིན་པའི་དམག་འཁྲུག་དེའི་ཁྲོད་བོད་པའི་ཕོ་གསར་སྟག་འདྲ་བ་ཞིག་གི་ཚེ་སྲོག་ཤོར་བྱུང་ལ། ཨ་མ་ཞིག་གི་སྙིང་གི་དུམ་བུ་ས་ལ་ཟགས་ཡོད་པ་མ་ཟད། ཨ་ཕ་ཞིག་གིས་རང་གི་བུ་ལ་བཅིངས་པའི་སེམས་ཚོར་མི་མངོན་པའི་དབྱིངས་ལ་ཐིམ་ཡོད་ངེས། དེ་རིང་ངས་བོད་ཀྱི་ཕོ་རྒོད་དེའི་སྐུ་ཕུང་སྦས་ཡོད་པའི་རྡོ་རིང་བཙལ་ཀྱང་རྙེད་མ་བྱུང་། དེ་ནི་དུས་ཐུང་ཞིག་ནང་རྙེད་སྲིད་པ་ཞིག་མ་རེད། བེམ་པོའི་རྡོ་རིང་འབུམ་བཞི་ཡོད་པའི་ཁྲོད་ནས་ངས་ངོ་ཤེས་པའི་བོད་ཀྱི་ཕོ་གསར་དེའི་དུར་སྦས་རྡོ་རིང་ག་ལ་རྙེད། དེ་རིང་ཡང་ངའི་མིག་ནས་མཆི་མ་བཞུར་སོང་།
ཡུལ་བསྐོར་སྣེ་ཤན་པས་ཟེར་ན། དུར་ས་འདིའི་ནང་ཆ་སྙོམས་བྱས་ན། ཉིན་ལྟར་མི་གྲངས་ཉེར་བདུན་དུར་སྦས་བྱེད་བཞིན་ཡོད་པ་རེད་ཟེར། ཨ་རིའི་དམག་ཞབས་ལོ་ཉི་ཤུ་ལྷག་གནང་བའི་གང་ཟག་སུ་ཡིན་གྱི་བཟའ་ཟླ་དང་། ལོ་བཅོ་བརྒྱད་མན་གྱི་བུ་ཕྲུག་འདས་གྲོངས་སུ་གྱུར་བ་ཡིན་ན། ནང་མིའི་དགོས་འདུན་ལྟར་དུར་ས་འདིར་དུར་སྦས་བྱེད་རྒྱུའི་ཐོབ་ཐང་ཡོད་པ་འདྲ།

དུར་ས་འདིའི་དམིགས་ཡུལ་ནི། ཨ་རིའི་མི་མང་གི་ཚབ་བྱས་ནས་རང་ཉིད་ཀྱི་རྒྱལ་ཁབ་ཆེད་ཞབས་འདེགས་ལས་དོན་ཁྲོད་སྐུ་གྲོངས་པའི་དམག་མི་རྣམས་ཀྱི་སྐུ་ཕུང་འདིར་དུར་སྦས་བྱས་ནས། ཁོང་ཚོར་བརྩི་བཀུར་དང་། ཆེ་མཐོང་སྤྲད་ཡོད་པ་རེད།
དུར་ས་འདིའི་ནང་དུར་སྦས་བྱས་ཡོད་པའི་དུར་བྱང་རྡོ་རིང་རེ་རེས། མི་རེ་རེའི་་ལོ་རྒྱུས་བརྗོད་བཞིན་ཡོད་ལ། དུར་ས་འདིའི་ནང་ཡོད་པའི་དུར་བྱང་རྡོ་རིང་འབུམ་བཞི་ཡིས་ཨ་རིའི་ལོ་རྒྱུས་བརྗོད་བཞིན་ཡོད་། ངས་ ལོ་ལྔ་ལྷག་སོན་པའི་བུ་ཆུང་ལ་གནས་འདི་རུ་དམག་འཁྲུག་ཁྲོད་ཤི་ཟིན་པའི་མི་རྣམས་ལ་བརྩི་བཀུར་དང་། ཆེ་མཐོང་སྤྲད་ཀྱི་ཡོད་ཚུལ་སྣང་མེད་ཀྱིས་འགྲེལ་བརྗོད་བྱེད་སྐབས། ངའི་བུ་ཆུང་གིས་ང་ལ་གཟབ་ནན་ངང་། ཨ་ཕ། དམག་འཁྲུག ཤི་ཟིན། ཟེར་བའི་ཚིག་འདི་རྣམས་སྡུག་ཅག་རེད་ཟེར།

image

ཨ་རིའི་རྒྱལ་ཡོངས་དུར་ས་ནང་ལྟ་བསྐོར་དུ་འགྲོ་རྒྱུར་རིན་མེད་རེད་འདུག ཡིན་ནའང་རྒྱ་ཁྱོན་ཆེ་བའི་དུར་ས་འདིར་རྐང་ཐང་ལ་བསྐྱོད་དགོས་ན་ཧ་ཅང་དཀའ་ཚེགས་ཆེ། འགྲུལ་བསྐྱལ་རླངས་འཁོར་ལ་བསྡད་ནས་ལྟ་བསྐོར་དུ་བསྐྱོད་ན། མི་རེར་ཨ་སྒོར་དགུ་རེར་རེད་འདུག རྩོམ་ཐུང་འདི་ཀློག་མཁན་གང་ཟག་སུ་རུང་ཨ་རིའི་རྒྱལ་ས་ཝ་ཞིན་ཀྲོན་ལ་ཡུལ་བསྐོར་དུ་ཕེབས་པའི་གོ་སྐབས་བྱུང་ཚེ། ངེས་བར་དུ་ཨ་རིའི་རྒྱལ་ཡོངས་དུར་ས་འདི་ལ་ལྟ་བསྐོར་དུ་འགྲོ་རྒྱུར་ལམ་སྟོན་བྱེད་འདོད་བྱུང་།

ཨ་རིའི་སྲིད་འཛིན་འཇོར་རྗེ་ཝ་ཞིན་ཀྲོན་གྱི་གཞིས་ཀ

Tuesday, April 15th, 2014

ཟླ་བ་བཞི་བའི་ཚེས ༡༣ཉིན། ངའི་བཟའ་ཟླ་དང་། བུ་ཕྲུག་གཉིས། ཚ་བོ་བཅས་ནང་མི་ཚང་མ་ཨ་རིའི་སྲིད་འཛིན་དང་པོ་འཇོར་རྗེ་ཝ་ཞིན་ཀྲོན་གྱི་གཞིས་ཀ མོང་ཐི་ཝར་ནན་ལ་ལྟ་བསྐོར་དུ་སོང་བ་ཡིན། རྒྱལ་ས་ཝ་ཞིན་ཀྲོན་གྱི་ལྷོ་ནུབ་ཕྱོགས་སུ་རླངས་འཁོར་བསྐོར་ནས་སོང་ན་དུས་ཚོད་ཕྱེད་ཀའི་ནང་གནས་དེར་སླེབས་ཐུབ། མོང་ཐེ་ཝར་ནོན་ནི། ཨ་རིའི་སྲིད་འཛིན་དང་པོ་འཇོར་རྗེ་ཝ་ཞིན་ཀྲོན་ ༼༡༧༣༢-༡༧༩༩༽གྱི་གཞིས་ཀ་ཡིན།

IMG_9813 རྒྱལ་ས་ཝ་ཞིན་ཀྲོན་ནས་མེལ་༡༤ མཚམས་སུ་ཝི་རྗེ་ནེ་ཨ་མངའ་སྡེའི་ནང་ཡོད། ཡུལ་ལྗོངས་མཛེས་སྡུག་ལྡན་ཞིང་། ཕའོ་ཀྲོ་མ་ཁུ་གཙང་བོ་ཡང་གཞིས་ཁྱིམ་འདིའི་རྒྱབ་ངོས་སུ་དལ་ལྷོད་ངང་རྒྱུ་བཞིན་པ་དེས་མིའི་སེམས་ལ་རང་བཞིན་གྱིས་ཞི་བདེ་ལྷོད་འཇགས་ཞིག་བསྐྱལ་ཡོང་། གཞིས་ཀ་འདི ༡༦༧༤ ལོ་ནས་སྲིད་འཛིན་དང་པོའི་འཇོར་རྗེ་ཝ་ཞིན་ཀྲོན་གྱི་ཡབ་མྱེས་ལ་བདག་ཡོད་པ་དང་།
༡༧༧༧ལོའི་ཟླ་བ་གསུམ་པའི་ནང་། འཇོར་རྗེ་ཝ་ཞིན་ཀྲོན་སྲིད་འཛིན་ནས་ལས་འཁྱུར་གནང་རྗེས། གཞིས་ཀ་འདིར་ཕེབས་ནས་ས་ཞིང་རྨོ་འདེབས་དང་། སྡོང་འཛུགས་ནགས་བསྐྲུན་གྱི་ལས་ལ་ཞུགས།  ཡིན་ནའང་ཁོང་གཞིས་ཀ་འདིར་གཏན་སྡོད་བྱས་ནས་བག་ཕེབས་ཀྱི་འཚོ་བ་ཞིག་རོལ་འགོ་ཚུགས་ནས་ལོ་གཉིས་ཙམ་གྱི་རྗེས། ༡༧༩༩ལོའི་ཟླ་བ་བཅུ་གཉིས་པའི་ཚེས་༡༤ ཉིན་གཞིས་ཁྱིམ་འདིར་དགོས་པ་རྫོགས་འདུག དེང་སྐབས་གཞིས་ཁྱིམ་འདིར་སྲིད་འཛིན་དང་པོའི་འཇོར་རྗེ་ཝ་ཞིན་ཀྲོན་གྱིས་བེད་སྤྱོད་གནང་བའི་ཆ་ལག་ཆ་ཚང་འགྲེམས་སྟོན་གྱི་ཚུལ་དུ་བཞག་ཡོད། དཔེར་ན། ཁོང་སྲིད་འཛིན་ཆགས་རྗེས་ཐོག་མར་བཞུགས་སའི་རྐུབ་སྟེགས་དང་། སྲིད་འཛིན་དགོངས་པ་རྫོགས་སའི་ཉལ་ཁྲི་སོགས་སྔོན་ལ་ཁོང་བཞུགས་སྐབས་ནང་བཞིན་བཞག་འདུག སྲིད་འཛིན་དང་པོའི་འཇོར་རྗེ་ཝ་ཞིན་ཀྲོན་གྱིས་རང་དབང་གལ་ཆེན་ཡིན་པའི་ཐད་འདི་འདྲ་ཞིག་གསུངས་ཡོད། ༼གལ་ཏེ་སྨྲ་བརྗོད་རང་དབང་འཕྲོག་པ་ཡིན་ན། ལྐུག་འཐོམས་དང་། ངག་བཅད་ཀྱིས་ང་ཚོ་ལུག་ལྟར་དམར་གསོད་བཏང་རྒྱུའི་ལམ་དུ་ཁྲིད་ངེས་རེད།༽ ༼གུ་ཡངས་དང་། རང་དབང་གི་རྩ་བ་ཚུགས་དུས། ཤིང་སྡོང་དེ་མགྱོགས་མྱུར་ངང་འཚར་ལོངས་བྱུང་ངེས་རེད།༽ཞེས་དང་། ཡང་ཁོང་གིས། ༼ཞི་བདེ་སྐྲུན་རྒྱུ་ནི་དགྲ་བོ་ཐུག་འཕྲད་གནང་བར་གྲ་སྒྲིག་ཡག་པོ་ཞིག་བྱེད་རྒྱུའི་ཐབས་ལམ་ལས་ལེགས་པ་ཞིག་མེད།༽ཞེས་གསུངས་ཡོད།Washington
༢༠༠༠ ལོ་ནས་ཨ་རིའི་སྲིད་འཛིན་འཇོར་རྗེ་ཝ་ཞིན་ཀྲོན་གྱི་གཞིས་ཀ་འདི་བོད་ལ་ཡང་འབྲེལ་བ་ཡོད་པ་ཞིག་ཏུ་གྱུར། དེ་ནི་ངའི་སྤུན་ཆུང་ཚེ་རིང་དོན་གྲུབ༢༠༠༠ལོ་ནས་གཞིས་ཁྱིམ་འདི་བདག་གཅེས་བྱེད་མཁན་གྱི་ལས་བྱེད་ཞིག་ཏུ་གྱུར། གྲོགས་པོ་རྣམས་འཛོམས་སྐབས་ང་ཚོས་ཚེ་རིང་དོན་གྲུབ་ལ། ཨ་རིའི་སྲིད་འཛིན་འཇོར་རྗེ་ཝ་ཞིན་ཀྲོན་གྱི་ཕྱག་མཛོད་ཞེས་འབོད་བཞིན་ཡོད།
གནས་འདིར་ཨ་རིའི་རྒྱལ་ནང་གཙོས་པའི་འཛམ་གླིང་གང་ས་ནས་ཡུལ་བསྐོར་སྤྲོ་འཆམ་པ་ས་ཡ་མང་པོ་ཡོང་བཞིན་ཡོད་ལ། མི་གྲངས་ཆེས་མང་དུས་ཉིན་གཅིག་ལ་མི་གྲངས་བདུན་སྟོང་ལྷག་ལྟ་བསྐོར་དུ་ཡོང་ཀྱིན་ཡོད་འདུག ནང་འཛུལ་གྱི་འཛིན་བྱང་ལ་མི་རེར་ཨ་སྒོར་༡༨ རེད་འདུག སྲིད་འཛིན་གྱི་བོད་པའི་ཕྱག་མཛོད་དེ་ངོ་ཤེས་ན་འཛིན་བྱང་ཉོ་མི་དགོས་བར་དམིགས་བསལ་སྐུ་མགྲོན་ཕེབས་སའི་སྒོ་ཆུང་བརྒྱུད་ནས་འགྲོ་ཐུབ།

ལྕགས་བྱ་གནམ་ལ་འཕུར།

Saturday, July 6th, 2013

གནས་འདི་ནི་ཨ་རིའི་ནོར་ཐི་ ཁ་རོ་ལེ་ནའི་ ཨོ་ཀྲར་འབེན་ཁ་ཟེར་བའི་མཚོ་གླིང་དེ་རེད་། གནས་འདི་རུ་རོད་ཐི་སྤུན་མཆེད་གཉིས་ཀྱི་རིག་སྟོབས་ལས་གནམ་གྲུ་གསར་བཟོ་ནས་(༡༩༠༣) ཐེངས་དང་པོ་ལྕགས་བྱ་གནམ་ལ་འཕུར་ལ་རེད།  དེ་རིང་ངའི་ནང་མི་དང་གྲོགས་པོ་མང་པོ་ཞིག་གནས་འདིར་སླེབས་ཡོད།

 

image

ལོ་བརྒྱ་ལྷག་གི་སྔོན་ལ།
གནས་འདི་ནི་འདབ་ཆགས་བྱ་ཡི་གཤོག་རྩལ་ངོམས་ས་ཡིན།

ལོ་ངོ་བརྒྱ་ལྷག་གི་སྔོན་ཏེ།

༡༩༠༣ ལོར།

རོད་ཐི་སྤུན་མཆེད་གཉིས་ཀྱི་རིག་སྟོབས་ལས།

གནས་འདི་རུ་ལྕགས་བྱ་ཞིག་གནམ་ལ་འཕུར་བ་ནས་བཟུང་།
འདབ་ཆགས་བྱ་རྣམས་གང་དུ་སོང་བ་མ་ཤེས་ཀྱང་།
གནམ་མཁའ་ལྕགས་བྱ་ཡིས་ཁེངས།

 

གྲོགས་དམ་པ། ཁྱེད་རང་ཕེབས་སོང་།

Monday, April 8th, 2013

གྲོགས་དམ་པ། བློས་ཐུབ་ཀྱི་གྲོགས་པོ་ལགས།

ཁྱེད་རང་ཕེབས་སོང་། ཁྱེད་རང་དངོས་སུ་ཕེབས་སོང་བའི་གནས་ཚུལ་ཐོས་དུས། ང་རང་ཐའེ་ལན་གྱི་རྒྱལ་ས་སྦེན་ཁོག་གི་རྒྱལ་སྤྱིའི་གནམ་ཐང་ཉེ་འཁྲིས་ཀྱི་མགྲོན་ཁང་ཞིག་ཏུ་ཡོད། གྲོགས་པོ་ལགས། ཁྱེད་རང་ཕེབས་རྒྱུ་ཡིན་པ། ཁྱེད་དང་ངེད་གཉིས་ཀྱིས་སྔོན་མ་ནས་ཤེས་ཡོད་པ་ཁྱེད་ཀྱིས་ཀྱང་མཁྱེན་གསལ་རེད། ཡིན་ནའང་ཁྱེད་ཉིད་དངོས་སུ་ཕེབས་སོང་བའི་གནས་ཚུལ་དེ་མདའ་མོ་བཞིན་ངའི་སྙིང་ལ་ཕོག་བྱུང་། ངས་མིག་གཉིས་བཙུམ་ནས་མ་ཎི་འདོན་སྐབས། སྤྲིན་ནག་མཁྲིགས་པའི་ལུང་ཁུག་དོག་མོ་ཞིག་ནས་ཁྱེད་ཀྱི་སྨིན་མ་མཐུག་པའི་མིག་ཟུང་ལས་ལྷད་མེད་ཀྱི་བརྩེ་མདངས་མངོན་བཞིན་ང་ལ་བལྟས་འདུག ངས་ཁྱེད་ཀྱི་མཚན་ནས་ཐེངས་ཁ་ཤས་བོས་ནའང། ཁྱེད་ཀྱིས་ནམ་རྒྱུན་གྱི་འཛུམ་མདངས་དེ་བསྟན་ནས། ཅི་ཡང་མ་བཤད་པར་སྤྲིན་ནག་མཁྲིགས་པའི་ལུང་ཁུག་དོག་མོ་དེ་བརྒྱུད་ནས་ཕེབས་སོང་། ངས་སེམས་ཁྲལ་དང་བཅས་ཁྱེད་ཀྱི་རྗེས་དེད་ནས་ཡོང་བ་ཡིན། ཅུང་མ་འགོར་བར། སྤྲིན་ནག་མཁྲིགས་པའི་ལུང་ཁུག་དོག་མོ་དེ་ལས་བརྒལ་ནས། མཛེས་སྡུག་ལྡན་པའི་མཐའ་ཡས་པའི་རྩྭ་ཐང་ཞིག་དུ་སླེབས་བྱུང་། ངས་མུ་མཐུད་ནས་ཁྱེད་ལ་བལྟས་བསྡད་པ་ཡིན། ཁྱེད་ཀྱི་ཁ་ཕྱིར་འཁོར་ནས་ངེད་གཉིས་ཀྱི་བཤད་ཚར་མེད་པའི་བོད་ཀྱི་མདུན་ལམ་དང་། སོ་སོའི་མི་ཚེའི་སྐོར་མུ་མཐུད་དུ་གླེང་མོལ་བྱེད་རྒྱུའི་རེ་བ་བྱས་པ་ཡིན། ཡིན་ནའང་ཁྱེད་ཀྱིས་ཁ་ཕྱིར་མ་འཁོར་བར་མུ་མཐུད་དུ་མཐའ་ཡས་པའི་རྩྭ་ཐང་སྟེང་ཕེབས་སོང་། ག་ལེར་ཕེབས་སོང་། ཁྱེད་ཀྱི་གཟུགས་བརྙན་དེ་མེ་ཏོག་སྣ་མང་བཞད་ཅིང་། རི་དྭགས་སེམས་ཅན་བག་ཡངས་ངང་གནས་པའི་རྩྭ་ཐང་དེེར་ཐིམས་ནས་ངའི་མིག་ལམ་ནས་ཡལ་སོང་། ངས་མིག་ཕྱེས་དུས་མིག་ཆུ་རྡོག་རྡོག་ཞིག་མཁུར་ཚོས་བརྒྱུད་ནས་ངའི་མདུན་དུ་ཡོད་པའི IPad སྟེང་ལ་ཟེགས་འདུག

image

༡༩༩༥ ལོར་རྡ་ས། ཆབ་བྲག་ལྷ་མོ་སྐྱབས། མགོན་པོ་ཚེ་རིང་། དཔལ་ལྡན་རྒྱལ། རྡོ་རྗེ་ཚེ་བརྟན།

གྲོགས་དམ་པ། བློས་ཐུབ་ཀྱི་གྲོགས་པོ་ལགས།

ལོ་ངོ་ཉེར་ལྔའི་སྔོན་ལ། གནའ་མཁར་ཟི་ལིང་དུ། ངེད་ཚོས་ལོ་ངོ་ཉི་ཤུར་སོན་པའི་གཞོན་ནུའི་སྣང་བ་མཐོན་པའི་ལ་རྒྱ་དང་། སྤོབས་པ་ཆེན་པོས་རང་ཉིད་ཀྱི་བྲང་ཁོག་ཁུ་ཚུར་གྱིས་རྡུང་བཞིན་མི་རིགས་ཀྱི་མདུན་ལམ་གླེང་བ་ངེད་གཉིས་ཀྱིས་ག་ལ་བརྗེད།

ལོ་ངོ་ཉི་ཤུའི་སྔོན་ལ། བཙན་བྱོལ་བའི་ལྟེ་གནས་རྡ་རམ་ས་ལར་ངེད་གཉིས་ཀྱིས་བོད་ཕྲུག་ཁྱིམ་སྡེར་འགྲོ་སའི་ལམ་ཁར་ཡོད་པའི་དུར་ས་དེ་རུ། ཆང་འཐུང་ཞོར་སྙན་ངག་འབྲི་བཞིན་དོན་དངོས་དང་། རྟོག་འཆར་མཉམ་བསྲེས་ངང་འཚོ་བ་བསྐྱལ་བའི་གནས་སྟངས་དེ་ངེད་གཉིས་ཀྱིས་ག་ལ་བརྗེད།

ནུབ་ཕྱོགས་སླེབས་ནས་། རྟོག་འཆར་དང། དོན་དངོས་ཀྱི་དབྱེ་བ་ཕྱེས་ནས། འདས་ཟིན་པའི་འཚོ་བར་གླེང་བཞིན། གཅེས་ཕྲུག་གཉིས་བང་དུ་བཟུང་ནས་འདོད་བློ་ཅུང་་ཚིམས་པའི་འཚོ་བར་རོལ་རྒྱུའི་གོ་སྐབས་ཤིག་བྱུང་བ་ངེད་གཉིས་ཀྱིས་ག་ལ་བརྗེད།

ལྷག་པར་དུ། ༢༠༡༡ ལོའི་སྤྱི་ཟླ་བཅུ་བའི་ནང་། ང་ཚོ་གྲོགས་པོ་ཁ་ཤས་ས་ཐག་རིང་པོ་ནས་ཆེད་མངགས་ཁྱེད་ལ་འཚམ་འདྲིར་ཡོང་བའི་རྗེས་ནས་ད་ལྟའི་བར་གྱི་ལོ་གཅིག་ལྷག་གི་རིང་། ཁ་པར་བརྒྱུད་ནས་བོད་རྒྱའི་འབྲེལ་ལམ་དང་། མི་རིགས་འདིའི་མདུན་ལམ་གླེང་ཞོར། མི་ཚེའི་རིན་ཐང་སྐོར་རྒྱུན་དུ་གླེང་མོལ་བྱས་པ་ངེད་གཉིས་ཀྱིས་ག་ལ་བརྗེད།

སྐྱེས་བར་མགོ་རྔ་ཡོད་ཀྱང་། འཆི་བར་་མགོ་རྔ་མེད་ཅེས་པ་ལྡོག་ཐབས་ཡོད་ན། ཁྱེད་ཉིད་དི་ལྟར་ཕེབས་དོན་མེད། ང་དུས་བརྟན་དུ་ཁྱེད་དང་མཉམ་དུ་ཡོད། གྲོགས་པོ་ལགས། ངའི་མི་ཚེ་ནང་ཁྱེད་ལྟ་བུའི་གྲོགས་པོ་ཞིག་ཡོད་པ་ངའི་བསོད་ནམས་དང་བདེ་སྐྱིད་ཡིན་ལགས།

ཁྱེད་ཀྱི་གྲོགས་པོ་དཔལ་ལྡན་རྒྱལ་གྱིས།

ཨ་རིའི་རང་བཙན་ཉིན་མོ།

Tuesday, July 10th, 2012

ཟླ་བ་བདུན་པའི་ཚེས་བཞི་ཉིན་ནི།  ཨ་མི་རི་ཀར་དབྱིན་ཇུའི་དབང་འཛིན་འོག་ནས་རང་བཙན་ཐོབ་པའི་ཉིན་མོ་ཡིན་པས།   ཉིན་དེར་ཨ་རིའི་རྒྱལ་ཡོངས་སུ་གཞུང་གི་ལས་ཁུངས་ཚང་མ་གུང་གསེང་བཏང་ནས་།     རང་བཙན་ཉིན་མོ་སྲུང་བརྩི་བྱེད་བཞིན་ཡོད་པ་རེད།

རྒྱལ་ས་ཝ་ཞིན་ཏོན་དུ།

རྒྱལ་ས་ཝ་ཞིན་ཏོན་དུ།

སྔོན་ཆད་ཨ་མི་རི་ཀའི་གླིང་ཆེན་འདིའི་ནང་།   ས་སྐྱེས་རྡོ་སྐྱེས་ཀྱི་གདོད་མིའི་མི་རིགས་གནས་སྡོད་བྱས་ཡོད་ནའང་།   ༡༤༩༠ནང་ཡོ་རོབ་ནས་མི་དཀར་པོ། ཨ་མི་རི་ཀི་གླིང་ཆེན་འདིར་ཡོང་ནས་  རིམ་བཞིན་དབང་བསྒྱུར་བྱས་ཏེ།   དབྱིན་ཇུའི་རྒྱལ་ཁབ་ཀྱི་དབང་འོག་ཏུ་གནས་ཡོད་པ་དང་།   དེ་ནས་ ༡༧༧༥ ལོར། ཨ་རིའི་མི་མང་གིས་དབྱིན་ཇུའི་སྲིད་གཞུང་ལ་༼དཔྱ་ཁྲལ་སྤྲོད་འདོད་མེད་༽ ཞེས་།  ཨ་རིའི་གསར་བརྗེ་ལས་འགུལ་འགོ་ཙུགས་ནས་   ཨ་རིའི་མི་མང་གིས་དབྱིན་ཇུའི་དབང་འཛིན་པར་ངོ་རྒོལ་བྱས་ཏེ།   ༡༧༧༦ ལོར་ཨ་རིར་རང་བཙན་ཐོབ་ནས་ལོ་དེའི་ཟླ་བ་བདུན་པའི་ཚེས་༤ ཉིན།  རང་བཙན་གསལ་བསྒྲགས་བྱས་ཡོད་པ་རེད།    དེ་ནས་བཟུང་ཨ་རིའི་མི་མང་གིས།  ལོ་ལྟར་ཟླ་བ་བདུན་པའི་ཚེས་༤་ཉིན།   རང་བཙན་ཉིན་མོ་སྲུང་བརྩི་བྱེད་བཞིན་ཡོད་པ་རེད།   ལྷག་པར་དུ་༡༩༤༡་ལོར་།    ཨ་རིའི་གཞུང་གིས།  རང་བཙན་ཉིན་མོ་ལོ་ལྟར་ཟླ་བ་བདུན་པའི་ཚེས་ ༤ ཉིན་ ཨ་རིའི་རྒྱལ་ཡོངས་སུ་  གཞུང་གི་ལས་ཁུངས་ཚང་མ་གུང་གསེང་ཡིན་པ་གཏན་འབེབས་བྱས་ཡོད་པ་རེད།   ཨ་རིས་རང་བཙན་ཉིན་མོ་སྲུང་བརྩི་བྱེད་སྟངས་ནི།  རྒྱལ་ཡོངས་རང་བཞིན་གྱི་མཛད་སྒོ་སོགས་མེད་ནའང་།   གཞུང་གི་འགྲོ་སོང་བཏང་ནས་ས་གནས་སོ་སོར་ཤོག་སྦག་རྒྱག་པ་དང་།  རོལ་དབྱངས་འདུ་འཛོམས་བྱེད་པ།  རྒྱས་སྤྲོས་མ་ཡིན་པར་ནང་མི་དང་།  གྲོགས་པོ་རྣམས་ལྷན་འཛོམས་ཀྱིས་རང་བཙན་ཉིན་མོ་སྲུང་བརྩི་བྱེད་སྲོལ་ཡོད་པ་རེད།

བློ་བཟང་རམས་པ།

Tuesday, June 7th, 2011
བློ་བཟང་རམས་པ།

བློ་བཟང་རམས་པ།

ཚེས་༥སྟེ། རེས་གཟའ་ཉི་མའི་ཉིན་ཝ་ཤིན་ཏུང་གྲོང་ཁྱེར་སྲང་ལམ་ ༡༨ སྟེང་། ལོ་ན་གཉིས་དང་ཕྱེད་ཀར་སོན་པའི་བུ་ཆུང་ཉི་ཟླ་དང་། ངེད་གཉིས་དཔེ་དེབ་རྙིང་བ་བཙོང་སའི་ཚོང་ཁང་ཞིག་ཏུ་སོང་བ་ན།  ༼ལྷ་ས་ནས་ཕེབས་པའི་སྨན་པ།༽  བློ་བཟང་རམས་པས་བརྩམས་ཞེས་པའི་དེབ་རྙིང་ཞིག་མཐོང་།  དེབ་འདིས་ངའི་ཡིད་ཀྱི་དྲན་པ་ལོ་བཅུ་བཞི་ཡར་སྔོན་དུ་ཕྱིར་འཁྲིད་བྱས་སོང༌། དེ་ནི་༡༩༩༤་ལོའི་དབྱར་ཁའི་ཉིན་ཞིག་ལོན་དོན་གྲོང་ཁྱེར་ནང་དུ་དགོང་དྲོ་གསོལ་ཚིགས་ཞིག་གི་སྐབས་སུ།   ལོ་ན་བཞི་བཅུ་ཡས་མས་ལ་སོན་པའི་དབྱིན་ཇུའི་བུད་མེད་ཞིག་གིས།  “ངས་བློ་བཟང་རམས་པས་བརྩམས་པའི་སྦྱན་མིག་གསུམ་པ་དང༌། ལྷ་ས་ནས་ཕེབས་པའི་སྨན་པ་ཅེས་པའི་བོད་སྐོར་གྱི་དེབ་གཉིས་བཀླགས་མྱོང་།  བོད་ནི་མཛེས་སྡུག་ཡིད་ཏུ་འོང་བའི་གནས་ཞིག་རེད། ཡིན་ནའང་བོད་མི་ཞིག་ལ་མཇལ་བ་ཐོག་དང་པོ་ཡིན་པས་ཧ་ཅང་དགའ་བོ་བྱུང་།”  ཟེར། 

dr1  དེ་ནི་ངའི་བློ་བཟང་རམས་པ་ཞེས་པའི་མིང་འདི་གོ་བ་ཐོག་མ་ཡིན།  དེ་ནས་ངས་བློ་བཟང་རམས་པའི་སྐོར་ལ་ཉམས་འཇོག་བྱས་པ་ཡིན། ཁོང་ནི་དབྱིན་ཇུ་བ་ཞིག་ཡིན་པ་ལས་བོད་པ་མ་རེད། ཁོང་གི་དབྱིན་ཇུའི་མིང་ལ་Cyril Henry Hoskin (8 April 1910 – 25 January 1981)ཟེར་བ་དང་།   བོད་ལ་ཕེབས་མྱོང་མེད་ནའང་། བོད་པའི་གྲྭ་བ་ཞིག་ལ་བརྫུས་ནས་བོད་ནང་གི་གནས་སྟངས་སྐོར་གྱི་དེབ་ཁ་ཤས་བརྩམས་འདུག དེབ་དེ་དག་གིས་སྤྱི་ལོ་༥༠་དང་༦༠་ནང་འཛམ་གླིང་དང་ཁེར་ཆད་དུ་གནས་པའི་བོད་གྱི་རྣམ་པ།    གསང་བ་ལྐོག་གྱུར་ལྟ་བུའི་འཛམ་གླིང་མི་མང་དཀྱུས་མ་ཚོར་ངོ་སྤྲོད་བྱས་འདུག
དེ་རིང་དཔེ་དེབ་རྙིང་བ་བཙོང་ས་དེ་རུ  ༼ལྷ་ས་ནས་ཕེབས་པའི་སྨན་པ།༽  བློ་བཟང་རམས་པས་བརྩམས་ཞེས་པའི་དེབ་དེ་ངས་བསམ་བློ་ཅི་ཡང་གཏོང་མ་དགོས་བར་རང་བཞིན་གྱིས་ཉོས་ཡོང་བ་ཡིན།