April, 2010

...now browsing by month

 

ཞོགས་དུང་གི་བཟའ་ཟླ་དང་། བུ་མོ་གཉིས་ལ་བཅར་འདྲི།

Thursday, April 29th, 2010

རྒྱ་ནག་གཞུང་གིས་འཛིན་བཟུང་བཀག་ཉར་བྱས་ཡོད་པའི་རྩོམ་པ་པོ་ཞོགས་དུང་ངམ། བཀྲ་རྒྱ་ནི་མདོ་སྨད་གཙན་ཚ་ས་ཁུལ་དུ་སྐྱེས་པ་དང༌། སྤྱི་ལོ་༡༩༨༢ལོར་རྨ་ལྷོ་བོད་རིགས་དགེ་ཐོན་སློབ་གྲྭ་ནས་མཐར་ཕྱིན་པའི་རྗེས་གཅན་ཚ་མི་རིགས་སློབ་འབྲིང་དུ་དགེ་རྒན་བྱས་ཡོད་ལ། སྤྱི་ལོ་༡༩༨༦ལོ་ནས་ནུབ་བྱང་སློབ་གྲྭ་ཆེན་མོའི་ནང་བོད་ཡིག་ཆེད་སྦྱོང་བྱས་ཏེ་༡༩༩༠ལོར་དངོས་གཞིའི་སློབ་གཉེར་མཐར་ཕྱིན་ཡོད། དེའི་རྗེས་ཟི་ལིང་གྲོང་ཁྱེར་ནང་ཡོད་པའི་མཚོ་སྔོན་ཞིང་ཆེན་མི་རིགས་དཔེ་བསྐྲུན་ཁང་དུ་བོད་ཡིག་རྩོམ་སྒྲིག་པའི་ལས་ཀ་བྱེད་བཞིན་ཡོད། ཟླ་བ་བཞི་བའི་ཚེས་༢༣་ཉིན་རྒྱ་ནག་གི་ཉེན་རྟོག་པས།  ཁོང་ལ་ རྒྱལ་ཁབ་ཁ་བྲལ་ལ་ངན་སྐུལ་བྱས་པ། ཞེས་པའི་ཉེས་མིང་བཏགས་ནས་འཛིན་བཟུང་བཀག་ཉར་བྱས་ཡོད་པ་རེད།  གནད་དོན་འདིའི་ཐད་ཞོགས་དུང་གི་བཟའ་ཟླ་དང་།  བུ་མོ་གཉིས་ལ་བཅར་འདྲི་བྱས་པར་ཉན་རོགས་ཞུ།

ཞོགས་དུང་གི་བཟའ་ཟླ་དང་།  བུ་མོ་གཉིས་ལ་བཅར་འདྲི།

རྣམ་པ་ཚོས་གནད་དོན་གང་འདྲ་ཞིག་གི་ཐད་བགྲོ་གླེང་བྱེད་འདོད་ཡོད་ན་ང་ལ་འབྲེལ་བ་གནང་རོགས་ཞུ།  
གློག་འཕྲིན།  gyalp@rfa.org
ཁ་པར།  ༢༠༢-༢༧༧-༤༠༩༡

གནམ་ས་གོ་འབྱེད་ཀྱི་རྩོམ་པ་པོ་འཛིན་བཟུང༌།

Monday, April 26th, 2010

0000shok-300x19111ཚེས་༢༣ཉིན་རྩོམ་པ་པོ་ཞོགས་དུང་ངམ། བཀྲ་རྒྱ།  རྒྱ་ནག་གི་ཉེན་རྟོགས་པས་འཛིན་བཟུང་བྱས་འདུག ཁོང་གི་བཟའ་ཟླ་ལྷ་མཚོས་ཡིས་ “ཚེས་༡༢་ཉིན་ངེད་ཚང་གི་དཔེ་ཚོང་ཁང(༡+༡དཔེ་ཚོང་ཁང) སྒོ་རྒྱག་དགོས་པའི་བཀའ་རྒྱ་བཏང་བ་དང་འབྲེལ། ངའི་བཟའ་ཟླས་བརྩམས་པའི་དཔེ་དེབ་ཚང་མ་འཁྱེར་སོང༌།” ཞེས་གསར་འགོད་པར་ཁ་པར་བརྒྱུད་ནས་བཤད་བྱུང༌། ཡང་ཁོང་གིས་མུ་མཐུད་དུ། “ཚེས༢༣་ཉིན་ཉེན་རྟོགས་པ་ཁ་ཤས་ཁོང་གི་གཞུང་ལས་ཁང་ལ་སོང་ནས་ཁོང་ཁྲིད་དེ།  དགོང་མོ་ཆུ་ཚོད་༦་ཡས་མས་སུ་ང་ཚོའི་ཁྱིམ་ལ་སླེབས་ནས་བསྔོག་བཤེར་བྱས་རྗེས་ཁོང་ཁྲིད་སོང་།  བོད་རིགས་གཉིས་ཐེ་བའི་ཉེན་རྟོགས་པ་ལྔ་འདུག”ཟེར།

 ཡང་ཁོང་གི་བུ་མོས། “ཉེན་རྟོགས་པས་ངའི་ཨ་ཕ་འཛིན་བཟུང་གི་ཉེན་བརྡའི་ཡི་གེ་ཞིག་བསྟན་བྱུང་། དེའི་ནང་དུ།  རྒྱལ་ཁབ་ཁ་བྲལ་ལ་ངན་སྐུལ་བྱས་པ།” ཞེས་བཀོད་འདུག་ཟེར། ད་ལྟའི་ཆར་ཞོགས་དུང་ངམ། བཀྲ་རྒྱ་ཟི་ལིང་ནས་ཏ་ཐོང་ཕྱོགས་ལ་འགྲོ་སའི་ལམ་ཁར་ཡོད་པའི་བཀག་ཉར་ཁང་ཞིག་ཏེ། རྒྱ་སྐད་དུ་“ཨེར་ཧྲི་ལིག་པུའུ་”ཞེས་པའི་ནང་བཀག་ཉར་བྱས་ཡོད་འདུག ཁོང་གིས་བཟའ་ཟླས། “དེ་རིང་ ཚེས་༢༦་ཉིན་ང་ཚོས་ཟ་མ་འཁྱེར་ནས་ཁོང་ལ་བལྟ་རུ་ཕྱིན་པ་ཡིན། ཁོང་ལ་ཐུག་ཏུ་མི་འཇུག་པ་མ་ཟད༌། སྲུང་དམག་གིས་ཟ་མ་ཡར་ལེན་ཀྱང་བྱས་མ་སོང་།” ཟེར། ཞོགས་དུང་ལགས་ཀྱིས་གནམ་ས་གོ་འབྱེད་གྱི་དེབ་དེ་འགྲེམས་སྤེལ་བྱེད་རྒྱུ་སེམས་ཐག་བཅད་པ་དང་མཉམ་དུ་རྒྱ་ནག་གཞུང་གིས་ཁོང་འཛིན་བཟུང་བྱེད་ངེས་ཡིན་པར་གྲ་སྒྲིག་བྱས་འདུག ཁོང་གིས་བརྩམས་པའི་གནམ་ས་གོ་འབྱེད་ཅེས་པའི་དེབ་དེའི་ནང་དུ།“སྒེར་གཅོད་པའི་སྲིད་ཀྱི་གདུག་རྩུབ་དྲན་པས་འཇིགས་པ་དང་། སྒེར་གཞུང་གང་ཡང་མི་རིགས་རིང་ལུགས་ཐལ་མཐའ་པར་ལྟུང་ཉེན་ལ་དཔགས་པས་འཇིགས་པ་དང་།མི་བུ་སྒེར་གྱི་ཚེ་སྲོག་དང་བདེ་སྡུག་བསམས་པས་འཇིགས་པ་དང་། མ་འོངས་སྔོན་རྟོག་གིས་འཇིགས་པ་བཅས་འཇིགས་པའི་ཚོར་པ་སྣ་བཞི་ཡོད་པ་བྲིས་ཏེ་མཚམས་འདིར་སླེབས་པ་ན། འཇིགས་པའི་ཚོར་པ་གཞན་ཞིག་ཡོད་པ་ནི། རྩོམ་འདི་བཀྲམ་པའི་རྗེས་ལ། ནམ་ཞིག་མི་ཡུལ་གྱི་ཚ་དམྱལ་དང་གྲང་དམྱལ་དུ་སྡོད་ལོས་དགོས་སྙམ་སྟེ་འཇིགས་སྐྲག་ཆེ་མོད། ཁ་ཡི་རྐྱེན་ལས་མགོ་བོ་ཤོར་ནའང་ལམ་འདི་རང་གིས་བདམས་པ་ཡིན་ཕྱིར་རང་འགན་རང་གིས་འཁུར་རྒྱུ་ཡིན་ནོ།།”  ཞེས་བཀོད་འདུག  ཞོགས་དུང་ངམ། བཀྲ་རྒྱ་དགུང་ལོ་༤༨ཡིན་པ་དང༌། མཚོ་སྔོན་མི་རིགས་དཔེ་སྐྲུན་ཁང་དུ་རྩོམ་སྒྲིག་པའི་ལས་ཀ་བྱེད་ཀྱིན་ཡོད་ལ། ཁོང་གིས “དཔྱོད་ཤེས་རྒྱང་འབོད། “དང་། “དོགས་སློང་སྙིང་སྟོབས།” “གནམ་ས་གོ་འབྱེད།” སོགས་དེབ་ཁ་ཤས་བརྩམས་ཡོད་པ་རེད།
རྒྱ་ནག་གཞུང་གིས་འཛིན་བཟུང་བྱས་པའི་རྩོམ་པ་པོ་ཞོགས་དུང་གི་བཟའ་ཟླར་བཅར་འདྲི་བྱས་ཡོད་པར་ཉན་རོགས་ཞུ། shokdung

གནོད་འཚེ་དང་གོ་སྐབས། གོང་ས་མཆོག་ས་ཡོམ་གནོད་ཁུལ་དུ་ཆིབས་བསྒྱུར་གནང་ཐུབ་བམ།

Friday, April 23rd, 2010

གོང་ས་མཆོག་ས་ཡོམ་གྱི་གནོད་འཚེ་ཕོག་ཡུལ་ལ་ཆིབས་བསྒྱུར་གནང་ནས་འདས་པོ་བསྔོ་སྨོན་དང་། གསོན་པོ་སེམས་གསོ་གནང་རྒྱུ་ནི། གནོད་ཁུལ་མི་མང་གི་རེ་འདོད་ཡིན་ལ། གོང་ས་མཆོག་གི་ཐུགས་འདོད་ཡང་ཡིན། ཡིན་ནའང་རེ་འདོད་དེ་ལེགས་འགྲུབ་ཡོང་མིན་ཕྱོགས་གཉིས་ཀར་ནུས་པ་གང་ཡང་མེད་པར་རྒྱ་ནག་གཞུང་གི་ལག་ཏུ་ཡོད།
ས་གཡོ་ཐེངས་གཅིག་གི་མི་སྟོང་ཕྲག་མང་པོའི་ཚེ་སྲོག་འཕྲོག་པ་དང༌། མི་ཁྲི་ཕྲག་མང་པོར་བློ་ཡིད་འདས་པའི་འཇིགས་སྣང་སྤྲད་བྱུང་ལ། མི་འབུམ་ཕྲག་མང་པོའི་སེམས་རྒྱུད་ལ་བྱམས་དང་སྙིང་རྗེ་སྐྱེས་རུ་བཅུག་སོང༌། img_2588
ས་ཡོམ་གྱི་གོད་ཆག་བྱུང་མ་ཐག་ས་གནས་མི་མང་གིས་འཐུས་ཚབ་ཀྱིས་རྒྱ་ནག་གི་སྲིད་འཛིན་ཧུའུ་ཅིན་ཐའོ་དང་། སྲིད་བློན་ཝུན་ཅ་པའོ་གཉིས་ཀྱི་མཚན་ཐོག་ཏུ་ཡི་གེ་ཞིག་བྲིས་ནས།  གོང་ས་མཆོག་གནོད་ཁུལ་ལ་ཕེབས་སུ་འཇུག་དགོས་པའི་རེ་སྐུལ་ཞུས་འདུག་ལ། གནོད་ཁུལ་དུའང་མི་མང་གིས་ཀྱང་ས་འོག་ནས་མི་རོ་བསྔོག་བཞིན། “རྒྱལ་བ་བསྟན་རྒྱ་མཚོ།”ཞེས་མཚན་ནས་འབོད་བཞིན། གོང་ས་མཆོག་ལ་གསོལ་འདེབས་དང༌། མི་མང་གི་སྡུག་བསྔལ་སེལ་ཐུབ་རྒྱུར་རེ་བ་བཅིངས་ཡོད། གོང་ས་མཆོག་གིས་ཀྱང་ཚེས་༡༧་ཉིན་གསར་འགོད་ལྷན་ཚོགས་ཞིག་ཐོག་ “མཆོག་གསུམ་རྒྱལ་བ་རྒྱ་མཚོར་གསོལ་འདེབས་སྨོན་ལམ་བྱ་རྒྱུ་ཙམ་ལས། ས་ཁད་ཀྱིས་འགྱངས་པས་དངོས་སུ་རོགས་ཕན་བྱ་ཐབས་དབེན།” ཞེས་ཐུགས་ཕམ་དང་མཉམ་དུ་གནོད་ཁུལ་ལ་ཕེབས་ཐུབ་རྒྱུ་ཐུགས་རེ་གནང་ཡོད། གོང་ས་མཆོག་གིས་“། ངོས་རང་ངོ་བསྐྱོད་ཀྱིས་མང་ཚོགས་ཀྱི་རེ་འདོད་བསྐངས་ཏེ་སེམས་གསོ་བྱ་རྒྱུའི་འདུན་པ་ཤིན་ཏུ་ཆེ།”གསུངས་ཡོད།
ཁུངས་ལྡན་གནས་ཚུལ་ལྟར་ན།  གོང་ས་མཆོག་གི་ངོས་ནས་རྒྱ་ནག་གཞུང་ལ་ཐད་ཀར་འབྲེལ་བ་གནང་ནས་ཁོང་གནོད་ཁུལ་ཏུ་ཕེབས་ཐུབ་རྒྱུར་རེ་སྐུལ་གནང་ཡོད་པ་རེད།
ཚེས་༢༠་ཉིན་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཅང་ཡི་ལ་པེ་ཅིན་དུ། གསར་འགོད་པ་ཞིག་གིས་གོང་ས་ཏ་ལའི་བླ་མ་གནོད་ཁུལ་ལ་ཕེབས་འདུན་ཡོད་པའི་ཐད་དྲི་བ་འདྲི་སྐབས། “ང་ཚོས་ས་གནས་ཀྱི་ཆོས་ལུགས་དང༌།  གོམས་སྲོལ་ལ་བརྩི་བཀུར་བྱེད་རྒྱུ་མ་ཟད། ད་ལྟའི་ཆར་གནོད་ཁུལ་དུ་ཆོས་ཕྱོགས་ཀྱི་ཆོ་ག་ཕྱག་ལེན་བྱེད་བཞིན་ཡོད།”ཟེར་ཙམ་ལས། དྲི་བར་ཐད་ཀར་ལན་འདེབས་གང་ཡང་བྱས་མི་འདུག་ལ། གོང་ས་མཆོག་ལ་སྐྱོན་བརྗོད་དང༌། དམའ་འབེབས་ཀྱང་ཞུས་མེད། བྱེད་སྟངས་འདིར་བལྟས་ན། རྒྱ་ནག་གཞུང་གིས་ད་ཐེངས་ས་ཡོམ་གོད་ཆག་ལ་རོགས་སྐྱོར་བྱེད་མཁན་གྲྭ་བཙུན་གཙོས་པའི་བོད་མི་སྟོང་ཕྲག་མང་པོ་སྐྱེ་རྒུ་མདོར་འཛོམས་ནས་བརྩེ་སེམས་གཞི་གཅིག་ཏུ་འཁྱིལ་ཡོད་པའི་སྟོབས་ཤུགས། རྒྱ་རྒོལ་སྟོབས་ཤུགས་སུ་མི་འགྱུར་བ་གཙོར་བཟུང་ནས་བྱས་ལས་ཀ་བྱེད་བཞིན་ཡོད་པ་རེད།
གོང་ས་མཆོག་གནོད་ཁུལ་ཏུ་ཕེབས་ཐུབ་རྒྱུ་ས་གནས་མི་མང་རེ་བ་ཡིན་ནའང༌། རྒྱ་ནག་གཞུང་ལ་མཚོན་ན།  བོད་ཀྱི་མདུན་ལམ་ཐག་གཅོད་བྱེད་མིན་གྱི་གནད་འགག་ཅན་གྱི་གནད་དོན་ཞིག་ཡིན།
རྒྱ་ནག་གཞུང་གིས་འདས་པའི་ལོ་ཁ་ཤས་རིང་བོད་ཐོག་ལག་བསྟར་བྱེད་བཞིན་པའི་སྲིད་ཇུས་ལ་བལྟས་ན། ད་ཐེངས་ཡང་“བོད་རེ་བསཕོངས། རྒྱ་དོགས་པས་ཕོངས།”ཅེས་པ་བཞིན་གནོད་ཁུལ་མི་མང་གཙོས་པའི་བོད་མི་མང་གི་རེ་འདོད་འགྲུབ་ཐུབ་མིན་བློ་དོགས་བྱེད་འོས་པ་ཞིག་ཡིན།
རྒྱ་ནག་གཞུང་ཡིད་ཆེས་ཡོད་ཀྱང་མེད་ཀྱང༌། “གོང་ས་མཆོག་ནི་རྒྱལ་ཁབ་ཁ་བྲལ་དང༌། བོད་ཀྱི་སྤྱི་ཚོགས་བདེ་འཇགས་ལ་གནོད་སྐྱོན་བཟོ་མཁན་ཞིག་རེད།”ཅེས་པ་ནི། ཁོང་ཚོས་གོང་ས་མཆོག་ལ་འཛིན་པའི་སྲིད་ཇུས་རེད། དེ་བས་གོང་ས་མཆོག་གནོད་ཁུལ་ལ་ཕེབས་སུ་བཅུག་མིན་རྒྱ་ནག་གཞུང་ལ་མཚོན་ན། མ་འོངས་པར་གོང་ས་མཆོག་དང་། བོད་ཐོག་འཛིན་པའི་སྲིད་ཇུས་ལ་འགྱུར་བ་གཏོང་མིན་གྱི་གནད་དོན་ཡིན། གལ་ཏེ་རྒྱ་ནག་གཞུང་ལ་གོང་ས་མཆོག་དང༌། བོད་ཀྱི་གནད་དོན་ཐོག་འཛིན་པའི་སྲིད་ཇུས་ལ་འགྱུར་བ་གཏོང་འདོད་ཡོད་ན།
ད་ཐེངས་གོང་ས་མཆོག་ས་ཡོམ་གྱི་གནོད་འཚེ་ཕོག་ཡུལ་དུ་ཆིབས་བསྒྱུར་གནང་དུ་བཅུག་ནས་འདས་པོར་བསྔོ་སྨོན་དང་། གསོན་པོར་སེམས་གསོ་གནང་ནས་བོད་མི་མང་གི་སྐབས་ཐོག་གི་སེམས་སྡུག་བསྔལ་སེལ་རྒྱུ་དང་། མ་འོངས་བོད་ཀྱི་གནད་དོན་ཐག་གཅོད་བྱེད་རྒྱུའི་སྲིད་ཇུས་ལ་འགྱུར་བ་གཏོང་བའི་གོ་སྐབས་ཡག་ཤོས་ཞིག་ཡིན།dscf85381
གལ་ཏེ་རྒྱ་གཞུང་གིས་སྡུག་བསྔལ་དང༌། མྱ་ངན་ཁྲོད་ཡོད་པའི་བོད་མི་མང་གི་འཕྲལ་གྱི་གདུང་སེམས་སེལ་རྒྱུ་དང་། ཕུགས་སུ་བོད་དོན་ཐག་གཅོད་བྱེད་རྒྱུའི་འདོད་པ་ཡོད་ཚེ།  བོད་ཀྱི་སྲོལ་རྒྱུན་ལུགས་སྲོལ་ལྟར། ས་ཡོམ་གྱི་་གོད་ཆག་ཁྲོད་འདས་གྲོངས་སུ་གྱུར་བ་རྣམས་ཀྱི་བདུན་ཚིགས་བདུན་པ་སྟེ། དགོང་ཞག་བཞི་ཅུ་ཞེ་དགུ་ཚང་པའི་ཉིན་མོ་ནི། བོད་ཟླ་བཞི་བའི་ཚེས་༢༠་དང་སྤྱི་ཟླ་དྲུག་པའི་ཚེས་༢་ལ་འཁེལ་ཡོད། ཉིན་དེར་གནོད་འཚེ་ཕོག་ཡུལ་ཏུ་གོང་ས་མཆོག་གིས་འདས་པོར་བསྔོ་སྨོན་དང་། གསོན་པོར་སེམས་གསོ་གནང་རྒྱུའི་གོ་སྐབས་སྤྲད་ནས་བོད་ཀྱི་གནད་དོན་ནམ། བོད་མིའི་འཐབ་རྩོད་ལ་སྣང་ཆུང་མི་བྱེད་པར་བསྐྱར་ཞིབ་ཀྱིས།་ལྷག་བསམ་རྣམ་དག་གིས་བོད་དོན་ཐག་གཅོད་ཀྱི་ལམ་སུ་ཞུགས་རྒྱུ་གོ་སྐབས་ལེགས་ཤོས་དེ་ཡིན།

ས་ཡོམ་གྱི་གོད་ཆག

Friday, April 16th, 2010

ཁམས་སྐྱེ་རྒུ་མདོ་རུ་ཟླ་བ་བཞི་བའི་ཆེས་༡༤ ཉིན་གྱི་ཞོགས་པར།རང་བྱུང་ས་ཡོམ་བྱུང་བའི་གནོད་འཚེའི་ཁྲོད་ཚེ་སྲོག་ཤོར་བ་རྣམས་ལ་བསྔོ་བ་སྨོན་ལམ་དང༌། 

yushul

དཀའ་ངལ་ཁྲོད་གནས་ཡོད་པའི་མི་མང་ཡོངས་ལ་གདུང་སེམས་མཉམ་སྐྱེས་ཡོད། དཀའ་ངལ་ཁྲོད་གནས་པའི་མི་མང་ཚོར་སྐབས་ཐོག་ཙམ་མ་ཡིན་རོགས་རམ་རྒྱུན་གནས་ཐུབ་རྒྱུར་ཚང་མའི་འབད་བརྩོན་བྱེད་རྒྱུ་རེ་སྐུལ་ཞུ་གི་ཡོད།

ས་ཡོམ་ཁྲོད་གྲོངས་པའི་གཅེས་ཕྲུག་ཚོ་ལ།

ཨ་མའི་སྙིང་གི་གཅེས་ཕྲུག་ཚོ།
དྭངས་གཙང་གི་སེམས་པ།
ལྷད་མེད་ཀྱི་འཛུམ་མདངས་མཉམ་དུ་བཞུད་སོང༌།
ངའི་ཡོད་ཚད་ནས་ཡོད་ཚད་ཁྱེད་ཅག་དང་མཉམ་དུ་ཡོད།
ཨ་མའི་གཅེས་ཕྲུག་ཚོ།
ས་གཞི་འདི་ཅི་ལྟར་ཁྲོས་བ་དང་།   ཅི་ཞིག་གི་ཆེད་དུ་ཁྲོས་བ་ངས་མི་ཤེས།
སྙིང་རྗེ་མེད་པའི་ཁོང་ཁྲོ་དེས་ཡོད་ཚད་སྟོང་སེང་ངེར་བཏང༌།

ཨ་མའི་གཅེས་ཕྲུག་ཚོ།
ང་ཡང་ཁྱེད་ཅག་ལ་འགྲོགས་ནས་འགྲོ་བསམ་མོད།
ང་འཚོ་དགོས།
ཁྱེད་ཅག་གི་ཆེད་དུ་འཚོ་དགོས།
ངས་ལོ་ལྟར།
དབྱར་ཁའི་སྤངས་གཤོངས་ནས་མེ་ཏོག་བཏུས་ཏེ་ཁྱེད་ཅག་ལ་ཕུལ་དགོས་ལ།
འབྲི་མོའི་འོ་མ་བཞོས་ནས་ཁྱེད་ཅག་ལ་མཆོད་དགོས།
ཨ་མའི་གཅེས་ཕྲུག་ཚོ།
ས་གཞི་འདི་ཅི་ལྟར་ཁྲོས་བ་དང་།   ཅི་ཞིག་གི་ཆེད་དུ་ཁྲོས་བ་ངས་མི་ཤེས།
སྙིང་རྗེ་མེད་པའི་ཁོང་ཁྲོ་དེས་ཡོད་ཚད་སྟོང་སེང་ངེར་བཏང་བྱུང༌།

གནམ་ས་གོ་འབྱེད།

Tuesday, April 13th, 2010

ཞོགས་དུང་ལགས་ཀྱིས་བརྩམས་པའི་་{གནམ་ས་གོ་འབྱེད་}ཅེས་པའི་དེབ་དེ་བཀླགས་ཟིན་པ་ཡིན། ཁོང་གིས་རང་ཉིད་བློས་བཏང་གི་སྙིང་སྟོབས་འདིས་ཤེས་ཡོན་ཅན་གཞན་རྣམས་ལ་བློ་ཁོག་གསར་བ་ཞིག་སྤྲོད་ཐུབ་པའི་རེ་བ་ཡོད། དེབ་འདིའི་སྐོར་ལ་མང་པོ་གོ་ཐོས་བྱུང་བ་དང༌།   བསམ་པའི་རེ་སྒུག་ནང་བཞིན་ས་བྱི་ཞི་རྒོལ་ཆེན་མོའི་སྐོར་ལ་འདོད་བློ་ཁེངས་པ་ཞིག་མ་བྱུང༌། གང་ལྟར་དེབ་འདི་འདྲ་ཞིག་བརྩམས་པར་ཁོང་ལ་ཐུགས་རྗེ་ཆེ་ཞུ་གི་ཡོད་།
 
ཁོང་གིས་དེབ་འདིའི་ནང་དུ་ས་བྱི་ཞི་བའི་གསར་བརྗེ་ཆེན་མོ་ནས་འགོ་བཙུགས་ཏེ། ཨ་རིའི་རྩོམ་པ་པོ་ Hennry David Thoreau ཡིས་མཛད་པའི་།  “Cilvil disobedience”  སྤྱི་འབངས་ཀྱི་མི་རྟོན་པ།   “Resistance to civil government”  རྒྱལ་འབངས་སྲིད་གཞུང་ལ་རྒོལ་གཏམ་གཏོང་བ། ཞེས་པའི་བསམ་བློ་ལྟ་བ་འགྲེལ་བརྗོད་དང༌།  དེ་བཞིན་སེམས་དཔའ་ཆེན་མོ་གན་ངྷིའི་ཡི།  Mohandas Karamchand Gandhi    མཚེ་མེད་ཞི་བའི་ལྟ་སྤྱོད་སྐོར་འགྲེལ་བརྗོད་བྱས་འདུག་  གཤམ་དུ་དེབ་ཆ་ཚང་བཀོད་ཡོད་པར་གཟིགས་རོགས་ཞུ།

  
shokགནམ་ས་གོ་འབྱེད།
ཞོགས་དུང་།
——ས་བྱི་ཞི་བའི་གསར་བརྗེ་ལ་བྲིས་པ།
བདེ་སྐྱིད་ནི་རང་དབང་གི་འབྲས་བུ་ཡིན་ལ། རང་དབང་ནི་དཔའ་སྤོབས་ཀྱི་འབྲས་བུ་ཡིན་ནོ།། 
——གནའ་བོའི་ཀེ་རི་སེའི་དམངས་གཙོའི་ཆབ་སྲིད་མཁན་ཕེ་རི་ཁི་ལེས།
 
2008ལོའི་བོད་ཀྱི་ཞི་བའི་གསར་བརྗེ་འདིར་དབང་སྒྱུར་པས“3•14དོན་རྐྱེན”དང་། “ལྷ་སའི་དོན་རྐྱེན” “ལྷ་སའི3•14དོན་རྐྱེན” “3•14ལྷ་སའི་ཟིང་ཆ” “ལྷ་སའི3•14རྡུང་གཅོག་འཕྲོག་སྲེག་དོན་རྐྱེན”སོགས་བཏགས་འདུག་པ་དང་། བོད་ཀྱི་གསར་ལམ་ཁག་དང་རྩོམ་པ་པོའི་ཁྲོད་དུ། “ཞི་རྒོལ་ལས་འགུལ་ཆེན་མོ”དང“ས་བྱི་ཞི་རྒོལ་ཆེན་མོ” “ཞི་བའི་འོས་ལངས” “སྒེར་ལངས” “སྡེབ་ལངས”ཞེས་སོགས་བཏགས་མིང་གང་མང་འདུག་མོད། ཁོ་བོས་མིང་དེ་ལྟར་འདོགས་དོན་ནི། དབང་སྒྱུར་པའི་བཏགས་མིང་རྣམས་ཁྱབ་ཆུང་བ་དང་། ངོས་བཟུང་མེད་པ། ཕྱོགས་རེ་བའི་སྐྱོན་འདུག་ཅིང་། ཕལ་ཆེ་བ་ཕྱོགས་རིས་འཐེན་འཁྱེར་དང་གླེང་ཕྱོགས་ངན་དམོད་ཀྱིས་བཏགས་ཕྱིར། བཏགས་མིང་དོན་ལ་མི་གནས་པས་དབྱུགས། བོད་མིས་བཏགས་པ་ལྟར་ན། ཞི་བའི་གསར་བརྗེ་འདིར“རྩ་འཛུགས་ཡོད་པ་དང་། དམིགས་ཡུལ་ཡོད་པའི”དོན་ཅན་གྱི་ལས་འགུལ་གྱི་ཁྱད་ཆོས་མེད་པ་དང་། “གཉའ་གནོན་པ་ལ་ངོ་རྒོལ”བྱས་པ་ཙམ་མ་ཡིན་པར་གྱེན་ལོག་གི་ཁྱད་ཆོས་འདུག་པ་དང་། “ལོག་སྤྱོད་དབང་སྒྱུར་ལ་རྒོལ་ཕྱིར་ཐུན་མོང་གིས་དྲག་པོས་སྦྱོར་བ་བརྩམས”པའི་དོན་ཅན་གྱི་འོས་ལངས་མ་ཡིན་པར་ཞི་བའི་ཁྱད་ཆོས་འདུག་ཕྱིར། བཏགས་མིང་དེ་རྣམས་ཀྱང་དོར། ཁོ་བོས་དུས་ས་བྱི་དང་རྣམ་པ་ཞི་བ། ངོ་བོ་གསར་བརྗེ་སྟེ། “རང་བྱུང་ཁམས་བཅོས་སྒྱུར་དང་སྤྱི་ཚོགས་བཅོས་སྒྱུར་ཁྲོད་གསར་བཅོས་ཆེན་པོ་བྱས་པ”དང་། “སྤྱི་ཚོགས་ལམ་ལུགས་རྙིང་པ་གཏོར་ཏེ་སྤྱི་ཚོགས་ལམ་ལུགས་གསར་པ་གཞི་ཚུགས་པར་བྱེད་པ་དང་། སྤྱི་ཚོགས་མདུན་སྐྱོད་འཕེལ་རྒྱས་གཏོང་བ་ཡིན”ཞེས་པའི་ཐ་སྙད་ཀྱི་མཚན་ཉིད་ལྟར་དང་། བོད་ཀྱི་གདགས་སྟངས་ལྟར་དང་། རྒྱལ་སྤྱིའི་ཡོངས་གྲགས་ཁྱབ་སྤྱོད་ཀྱི་བརྗོད་པ་དང་ཡང་བསྟུན་ཏེ“ས་བྱི་ཞི་བའི་གསར་བརྗེ”ཞེས་བཏགས་པ་ཡིན། རྩོམ་ཡིག་ཆ་ཚང་ལ་གཟིགས་རོགས། »