ཐོལ་བྱུང་དུ་སྨྲས་པ།

འབྲི་མཁན། དཔལ་ལྡན་རྒྱལ། on May 15th, 2009
Summary:

འཛམ་གླིང་ས་ཡི་རྩེ་མོ་རུ།།                      ཇོ་མོ་གླང་མ་བརྗིད་ཉམས་ཆེ།།
གངས་དཀར་ཏེ་སིར་བྱིན་རླབས་ལྡན།།            རྨ་རྒྱལ་སྤོམ་རར་སྐུ་ཡོན་ཆེ།།

གནམ་མཚོ་ཕྱུག་མོ་གཏེར་སྣ་འཛོམས།།          ཁྲི་ཤོར་རྒྱལ་མོ་ཉ་སྲམ་ལྡན།།
རྨ་ཆུ་སྔོན་མོ་ངང་རྒྱུད་རིང༌།།                   འདི་ནི་ཁྱེད་ཀྱི་ཕ་ཡུལ་ཏེ།།
འཛམ་གླིང་རྩེ་མོར་གནས་ཆགས་པའི།།          གངས་ཅན་ལྗོངས་ཞེས་ཡོངས་ཀྱིས་གླེང༌།།

ད་ནི་བདག་གིས་བདག་ལ་ཁྲེལ་མེད་བརྗོད།།       རི་ཆུ་སྟོང་གིས་བར་ལམ་བཅད་ནའང༌།།
གངས་རིའི་ཡུལ་ནི་ཁྱེད་ཀྱི་ཕ་ཡུལ་ཡིན།།          གངས་རི་དཀར་པོའི་བློ་གཏད་གངས་སེང་ཡིན།།
གངས་སེང་མེད་པའི་གངས་རི་སྐྱོ་བས་གཟིར།།

ད་ནི་བདག་གིས་བདག་ལ་བརྗོད།།                ཁྱེད་ཀྱི་ཡབ་མྱེས་དམ་པ་རྣམས།།
སྤྲེལ་སྲིན་བསྡེབས་ནས་བྱུང་བའམ།།                ཡང་ན་འོད་དཀར་ལྷ་ལས་འཆད།།
དེ་མིན་སྤྲ་སེང་བུ་ལས་བྱུང༌།།                     འདི་ནི་ལོ་རྒྱུས་རྒན་པོས་གླེང༌།།
གང་ལྟར་ཁྱེད་ཀྱི་ཡབ་མྱེས་ཀྱིས།།                 ཉི་ཟླ་གཉིས་ཀྱི་བྱིན་རླབས་རྟོགས།།
སྙིང་སྟོབས་གོ་ཆ་ལུས་ལ་གྱོན།།                   ཞུམ་མེད་སྤོབས་པ་སེམས་སུ་བཅིངས།།
བློ་གྲོས་རལ་གྲི་ལག་ཏུ་བཟུང༌།།                  མཐོ་ནས་མཐོ་སར་བརྙེགས་ནས་ནི།།
གོ་ལའི་རྩེ་མོ་གནས་བཅས་ཏེ།།                  རྒྱལ་བའི་རྒྱལ་དར་བསྒྲེངས་པ་ཡིས།།
ཇོ་མོ་གླང་མར་འཛུམ་མདངས་རྒྱས།།          གངས་སེང་དཀར་མོ་འདི་ནས་བྱུང༌།།
ལྷད་མེད་གཞུང་དྲང་རྣམ་དཀར་དགེ།        དཔའ་མཛངས་རྟུལ་ཕོད་ཆེ་བ་ཡི།།
འགྲོ་བ་མི་ཡི་གཤིས་ལྡན་པའི།།                ཁྱེད་ཀྱི་ཡབ་མྱེས་དེ་དག་གིས།།
ས་ཡི་རྩེ་མོ་བདག་གིས་བཟུང༌།།

སྟོན་པ་གཤེན་རབ་མི་བོ་ཆེ།།                  མི་ཡི་ཡུལ་དུ་བྱོན་པ་ན།།
མགོ་ནག་བོད་ཀྱི་སྐྱབས་རྟེན་ས།།             སྟོང་བ་གནམ་མཁའི་དབྱིངས་སུ་བྱས།།
བོད་རྗེ་གཉའ་ཁྲི་བཙན་པོ་མཆོག།           གནམ་ལས་བབས་ཞེས་བོད་པས་སྒྲོགས།།
བཙན་པོ་རྣམས་ཀྱི་བང་སོ་ཡང༌།།            རྨུ་ཐག་བརྒྱུད་དེ་མཁའ་ལ་བརྫངས།།

དེ་ནས་སྲོང་བཙན་སྒམ་པོ་ཞེས།།            སྔོན་མེད་རྒྱལ་བོ་བོད་དུ་བྱོན།།
དམ་པའི་ཆོས་ཀྱི་དབུ་བརྙེས་ཞེས།།          སངས་རྒྱས་ཆོས་ལུགས་པ་ཡིས་གསུངས།།
བསྟོད་པ་ཧ་ཅང་ཐལ་དྲགས་སམ།།         དམིགས་ཡུལ་གཞན་ཞིག་ཡོད་དམ་ཅི།།
མགོ་བོ་གཅིག་གི་རྟགས་མ་སྦྱིན།།           སྤྱིར་ན་མི་ལ་མགོ་གཉིས་ཞེས།།
ལྟས་ངན་རིགས་སུ་བོད་པས་བརྩི།།          སྲོང་བཙན་སྒམ་པོ་དབུ་གཉིས་ཞེས།།
དད་པ་བྱེད་སའི་གནས་སུ་བརྩི།།            སྲོང་བཙན་སྒམ་པོ་ཆོས་ཀྱི་རྒྱལ།།
རྒྱ་བཟའ་བལ་བཟའ་ལྕམ་སྐུ་རྣམས།།         སྐུ་ཕུང་ཇོ་བོའི་ཐུགས་ལ་བརྫངས།།
མི་ཡི་རང་བཞིན་ཡོངས་འགལ་ཡང༌།།       སོ་སྐྱེས་སྐྱེ་བོའི་སྤྱོད་ཡུལ་མིན།།
ཞེས་པས་འགྲེལ་བ་ཡོངས་སུ་བརྒྱབས།།         གང་ལྟར་རྒྱལ་བོའི་མཛད་རྗེས་ནི།།
གངས་ཅན་བོད་ཀྱི་ཁྱོན་ལས་ཆེ།།             དེ་ལས་ཁྲི་སྲོང་ལྡེ་བཙན་ཞེས།།
ཁ་བའི་ཡུལ་དུ་བྱོན་པ་ན།།                   གདོང་དམར་བོད་ཀྱི་དམག་དཔུང་གི།།
གྲགས་པསདབྱར་སྐྱེས་ཡང་འཁུམས།།          ལོ་ངོ་སྟོང་ལ་བརྗིད་ཆེ བའི༌།།
རྒྱ་ནག་རྒྱལ་ས་ཞིས་ཨན་དུ།།                སྐྱ་དམག་རྨུག་སྒྲས་བརྡུང་བ་ན།།

རྒྱ་ནག་གོང་མ་ཁྲི་ལས་ཕབ།།                 ཝ་ཡི་མཇུག་མ་མགོ་གྱོན་ཏེ།།

རྒྱལ་ས་བསྐྱུར་ནས་གཞན་དུ་བྲོས།།            རྟག་བརྟན་མི་འགྱུར་རྡོ་རིང་ངོས།།

རྒྱ་བོད་བར་ལ་སྤྱི་ཆིངས་བཀོད།།           རྒྱ་ཡི་ཡུལ་དུ་རྒྱ་མི་སྐྱིད།།
བོད་ཀྱི་ཡུལ་དུ་བོད་མི་སྐྱིད།།             སྟག་སྒྲ་ཀླུ་གོང་དཔའ་དར་ལ།།

ཐིག་ལེ་ཅན་གྱི་སྟག་པགས་སྤྱིན།།              ཁྲི་སྲོང་ལྡེ་བཙན་དབང་ཐང་རྒྱས།།
སློབ་དཔོན་པད་མས་བསྟན་པ་དར།།            ཁ་བ་རི་བའི་མི་རྣམས་ཀྱིས།།

ཁ་བ་ཅན་ལ་ཁ་ལོ་བསྒྱུར།།                    སངས་རྒྱས་ཆོས་དང་བོན་པོའི་ཆོས།།
སེང་འབྲུག་ཁ་སྤྲོད་གཡུལ་ངོརཞུགས།།         བན་ཆོས་ལྟ་བའི་སྤྱན་འདོན་ཏེ།།
བོང་བུར་བསྐྱོན་ནས་ས་མཐར་སྤྱུགས།།          ཁ་མང་མི་ཡི་ལྕེ་སྣེ་བཅད།།

སངས་རྒྱས་བསྟན་པའི་མེ་ལྕེ་འབར།།           ནག་པོ་བོན་གྱི་བསྟན་པ་ཞེས།།
སོ་བའི་མདོག་གིས་ཡོངས་སུ་བྱུགས།།          དཀར་པོ་སངས་རྒྱས་བསྟན་པ་ཞེས།།

རྒྱལ་བའི་རྒྱལ་མཚན་དེ་ནས་བསྒྲེངས།།

འུ་དུམ་བཙན་པོའི་ཐུགས་ལ་ཕོག།                ནག་པོ་བདུད་ཀྱིས་སྐུལ་བ་འམ།།
དཀར་པོ་ལྷ་ཡི་ལུང་བསྟན་ནམ།།                 འུ་དུམ་བཙན་པོ་་ཁྲོས་པ་ན།།
སངས་རྒྱས་བསྟན་པ་དགྲ་རུ་བཟུང༌།།              དམ་ཆོས་བྱེ་མའི་ཀློང་དུ་སྤས།།
ལྷ་ལུང་དཔལ་གྱིས་མདའ་རྩེ་དེ །།                རྒྱལ་པོའི་སྙིང་གི་དཀྱིལ་དུ་འཕངས།།
ཁ་རུ་ཞེ་སྡང་མེ་སྟག་མཆེད།།                    མགོ་རུ་ཁྲོས་པའི་ར་ཡང་སྐྱེས།།
མི་ལུས་གླང་གི་མགོ་ཅན་ཞེས།།                 སངས་རྒྱས་ཆོས་ལུགས་མཁན་ཚོས་གསུངས།།
གླང་དར་བདུད་ཀྱི་སྤྲུལ་བ་ཞེས།།                གངས་ཅན་བོད་ལ་ཡོངས་སུ་གྲགས།།

བཙན་པོ་སྙིང་ལ་མདའ་ཕོག་པས།།                བོད་ཀྱི་རྒྱལ་ཁམས་སིལ་བུར་ཐོར །།
ནང་འཁྲུག་མུ་གེ་རྟག་པར་བྱུང༌།།                བུ་སྤུན་བར་ལ་གྲི་རྩེ་གཏད།།
ལུང་བ་རེ་ལ་རྒྱལ་ཕྲན་རེ།།                       བོད་ཁམས་རྫ་མ་ཆགས་པ་བཞིན།།
ཆགས་རོ་རེ་ལ་བདག་པོ་རེ།།                     བོད་ཀྱི་རྒྱལ་རྒྱུད་འདི་ནས་ཆད།།



2 Comments so far ↓

  1. འབའ་ལུ་གུ says:

    རྨ་བྱའི་སྒྲོ་ཐུལ་ལེགས་པ་འདི་། སྣ་ཚོགས་མཚོན་གྱིས་བྱུག་པ་མིན། སྙན་པ་ངག་གི་བ་དན་ལ། དབྱང་ཅན་ལྷ་ཡིས་ཤིས་པ་འཁྱིལ།

  2. རྡོ་འདི་མི་ཡིས་མི་ཟ་ཞིང་།།
    ཟོས་ཀྱང་ཟོ་ཡིས་མི་ཆོད་པས།།
    སེམས་པ་ངལ་བའི་སུག་རྗེས་ལ།།
    ཁ་དོག་ནག་པོ་འཁྱིལ་བ་མཐོང་།།

    རང་ཉིད་སྐྱོ་ཞིང་དུབ་པ་ཡིས།།
    རྐང་པ་ཐེམ་པར་མ་བརྒལ་ཀྱང་།།
    ཡང་དང་འོར་དུ་ཤོར་བ་ནི།།
    རྔན་པ་བརྩེགས་པའི་སེམས་པ་རེད།

བསམ་ཚུལ་འབྲི་རོགས།





*