ཕྱི་ཟླ་༧ཚེས་༢༦ཉིན་བཀའ་ཟུར་ཨ་ལགས་འཇིགས་མེད་རིན་པོ་ཆེ་རྡ་རམ་ས་ལ་རུ་དགོངས་པ་རྫོགས་འདུག དམ་པ་ཁོང་གིས་སྐུ་ཚེ་ཧྲིལ་པོར་༸གོང་ས་མཆོག་གི་བཀའ་དགོངས་ལྟར་བོད་མི་མང་ལ་སྲི་ཞུ་ཞུས་ཡོད་པ་རེད། འདས་པའི་ལོ་ཁ་ཤས་རིང༌། ཕྲན་གྱིས་བོད་ཀྱི་འཐབ་རྩོད་སྐོར་ལ། བཀའ་ཟུར་ཨ་ལགས་འཇིགས་མེད་རིན་པོ་ཆེར་འདས་པའི་ལོ་ཁ་ཤས་རིང་བཅར་འདྲི་ཞུས་པ་ཁག་ཕྱོགས་བསྒྲིགས་བྱས་ཡོད་པར་གསན་རོགས
བཀའ་ཟུར་ཨ་ལགས་འཇིགས་མེད་རིན་པོ་ཆེ།
འབྲི་མཁན། དཔལ་ལྡན་རྒྱལ། on July 26th, 2012གསར་འགྱུར།
འབྲི་མཁན། དཔལ་ལྡན་རྒྱལ། on July 24th, 2012༡༽ ཚེས་༡༨ ཉིན་གོང་ས་མཆོག་ཆོས་དང་རིག་གཞུང་། སྐད་ཡིག་སོགས་བོད་དང་གཅིག་མཚུངས་ཡིན་པ། རྒྱ་གར་བྱང་ཕྱོགས་ཀྱི་ལ་དྭགས་ཁུལ་དུ་ཆིབས་བསྒྱུར་གནང་ནས་། ས་གནས་དེར་ཡོད་པའི་ཕོ་བྲང་ཞི་བའི་ཚལ་དུ་སྐུ་ངལ་གསོ་བཞིན་བཞུགས་ཡོད་པ་དང་། ཚེས་༢༦ ཉིན། ལ་དྭགས་རྒྱལ་ས་སླེ་རུ། གོང་ས་མཆོག་གི་ཐེབས་རྩ་ཁང་གིས་འགྲོ་གྲོན་བཏང་ནས་གསར་བསྐྲུན་བྱས་པའི་ ། འཇམ་དབྱངས་སློབ་གྲྭར་ཆིབས་བསྒྱུར་གནང་ནས་སློབ་མ་ཚོས་བཀའ་སློབ་དང་། དྲི་བར་ལན་འདེབས་རྒྱུ་ཡིན་པ་དང་། དེ་ནས་ལ་དྭགས་ཀྱི་རྒྱལ་ས་སླེ་ནས་སྤྱི་ལེ་༤༠༠ ཡི་མཚམས་སུ་ཡོད་པའི་ ཟངས་དཀར་ས་ཁུལ་དུ་ཆིབས་བསྒྱུར་གནང་ནས། མི་མང་ལ་བློ་སྦྱོང་ཚིགས་བརྒྱད་མའི་བཀའ་ཆོས་བཀའ་དབང་གནང་རྒྱུ་སོགས། སྤྱི་ཟླ་བརྒྱད་པའི་ཚེས་༧ བར་གོང་ས་མཆོག་གིས་ལ་དྭགས་དང་། ཟངས་དཀར་ཁུལ་དུ་ཆོས་ཕྱོགས་ཀྱི་མཛད་འཕྲིན་སྐྱོང་རྒྱུ་རེད་འདུག
༢༽ ཚེས་༢༡ དང ་༢༢་ ཉིན་གཉིས་རིང་། ཨ་མེ་རི་ཀའི་གྲོང་ཁྱེར་ནེའུ་ཡོག་ནང་བྱང་ཨ་མེ་རི་ཀའི་ བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་༡༣་པ་དེ་འཚོཌ་འདུག ད་ཐེངས་ཀྱི་ཚོགས་འདུ་འདིར། བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་ལགས་དང་། བྱང་ཨ་རིའི་བོད་མི་མང་གི་སྤྱི་འཐུས་ནོར་བུ་ཚེ་རིང་ལགས། བཀྲིས་རྣམ་རྒྱལ་ལགས། བྱང་ཨ་མེ་རི་ཀའི་སྐུ་ཚབ་དོན་གཅོད བློ་བཟང་སྙན་གྲཌ་ལགས། དེ་བཞིན་ས་གནས་༢༥་ནས བོད་རིགས་སྤྱི་མཐུན་ཚོགས་པའི་སྐུ་ཚབ་འཐུས་མི་༣༥་མཉམ་ཞུགས་གནང་འདུག ཚོགས་ཆེན་ཐོག་ད་ལོའི་ཕྱི་ཟླ་དགུ་པའི་ནང་། དམིགས་བསལ་ཚོགས་ཆེན་ཐེངས་གཉིས་པའི་ཐོག བོད་ཀྱི་བདེན་པའི་འཐབ་རྩོད་དང་། བོད་ནང་གི་ཛ་དྲག་གནས་སྟངས་ཐད་བགྲོ་གླེང་གནང་ཕྱོགས་སྐོར། དེ་བཞིན་བྱང་ཨ་རིའི་ཁྱབ་ཁོངས་སུ་ཡོད་པའི་བོད་དོན་རྒྱབ་སྐྱོར་ཚོགས་པ་ཁག་དང་། བོད་རིགས་སྤྱི་མཐུན་ཚོགས་པ་ཁག་གི་འབྲེལ་ལམ་ཚགས་ཚུད་ཡར་རྒྱས་གཏོང་ཐབས། ཨ་རིའི་མངའ་སྡེ་ཁག་དང་། གྲོང་ཁྱེར་སོ་སོའི་གཞུང་། གྲོས་ཚོགས་ནང་བོད་དོན་རྒྱབ་སྐྱོར་སྔར་ནས་ཤུགས་ཆེན་ཐོབ་ཐབས་ བཅས་ཀྱི་སྐོར་ལ་བགྲོ་གླེང་གྲོས་མོལ་གནང་ཡོད་པ་རེད།
༣༽ བོད་མི་མང་སྤྱི་འཐུས་ལྷན་ཚོགས་ཀྱིས་བོད་དོན་ཆེད། བདེན་པའི་མེ་ལྕེ་སྐོར་བསྐྱོད་ཀྱི་ལས་འགུལ་ཞིག་སྤེལ་བཞིན་ཡོད་པ་ལྟར། ཟླ་ ༧ ཚེས་ ༢༠ ཉིན་ལྷོ་ཕྱོགས་ཁུལ་གྱི་བདེན་པའི་མེ་ལྕེ་སྐོར་བསྐྱོད། སྦེལ་ཀོབ་བོད་མིའི་གཞིས་ཆགས་སུ་འབྱོར་འདུག་ལ། སྐབས་དེར། རྒྱ་གར་ལྷོ་ཕྱོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཡིས་ རྒྱལ་སྤྱིའི་ཁྱོན་ལ་གནས་པའི་བོད་ཀྱི་གྲོགས་པོ་དང་། བོད་དོན་རྒྱབ་སྐྱོར་བ་ཚོས་བོད་དོན་ཆེད། སོ་སོའི་གཞུང་ལ གནོན་ཤུགས་སྤྲོད་དགོས་པའི་འབོད་སྐུལ་གནང་འདུག ཡང་བདེ་སྐྱིད་སླར་གསོ་བོད་མིའི་གཞིས་ཆགས་ཀྱི་འགོ་འཛིན། བྱམས་པ་ཕུན་ཚོགས་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་ནས། ས་གནས་རྒྱ་གར་གྲོང་སྡེ་ཁག་ནང་། བདེན་པའི་མེ་ལྕེ་སྐོར་སྐྱོད་ཀྱི་མཚན་རྟགས་བསྡུ་རུབ་བྱེད་བཞིན་ཡོད་པ་རེད། བདེན་པའི་མེ་ལྕེ་སྐོར་སྐྱོད་དང་། མཚན་རྟགས་བསྡུ་རུབ་ལས་འགུལ་གྱི་དགོས་འདུན་ཁག་ནི། འཛམ་གླིང་མཉམ་འབྲེལ་རྒྱལ་ཚོགས་ཀྱི་བོད་དོན་ཐོག་བཞག་པའི་གྲོས་ཆོད་ཁག སླར་ཡང་རྒྱལ་ཚོགས་ནས་གླེང་སློང་དང་། ལག་བསྟར་མཇུག་གནོན་དགོས་པ། བོད་ནང་ད་ལྟའི་ཛ་དྲག་གི་གནས་སྟངས་རྟོག་ཞིབ་སླད། རང་དབང་ཅན་གྱི་རྒྱལ་སྤྱིའི་སྐུ་ཚབ་ཁག་ཅིག་འཕྲལ་གཏོང་དགོས་པ། བོད་ནང་གི་བོད་མིའི་མངོན་འདོད་ བསྒྲུབ་རྒྱུར་མཉམ་འབྲེལ་རྒྱལ་ཚོགས་ཀྱིས་དམིགས་བསལ་འགན་འཁུར་ལེན་དགོས་པ་བཅས་དགོས་འདུན་དོན་ཚན་གསུམ་བཏོན་འདུག
༤༽གཟའ་སྤེན་པའི་ཉིན་རྒྱ་ནག་གི་རྒྱལ་ས་པེ་ཅིན་དང་། དེའི་ཉེ་འདབས་ཀྱི་གྲོང་ཁྱེར་ཁག་ནང་ལོ་དྲུག་ཅུའི་རིང་བྱུང་མ་མྱོང་པའི་དྲག་ཆར་བབས་ནས། ད་བར་མི་གྲངས་༣༧ འདས་གྲོངས་སུ་གྱུར་ཡོད་པ་དང་། སྲོག་སྐྱོབ་མི་སྣ་ཚུད་པའི་ཉུང་མཐའ་ཡང་མི་གྲངས་ བཅུ་གྲངས་ཞིག་གར་སོང་ཆ་མེད་དུ་འགྱུར་ཡོད་འདུག དྲག་ཆར་གྱིས་གནོད་ཚེ་ཕོག་ཡུལ་ཆེ་ཤོས། ཕང་ཧྲན་ས་གནས་ནས། མི་གྲངས་ཁྲི་ལྔ་ལྷག་གནས་སྤོར་བྱེད་དགོས་བྱུང་འདུག རྒྱ་ནག་གི་གསར་འགྱུར་རྒྱུད་ལམ་ཁག་གིས་ གཞུང་གིས་དྲག་ཆར་གྱི་གནོད་ཚེ་ཕོག་མི་ཚོར། རོགས་རམ་བྱེད་ཀྱིན་ཡོད་པ་སོགས་བཟང་ཕྱོགས་ཀྱི་གནས་ཚུལ་མང་པོ་ཞིག་འདོན་བཞིན་ཡོད་ན་ཡང་། པེ་ཅིན་གྱི་མང་ཚོགས་ཚོས་རྒྱ་ནག་གཞུང་གིས་དྲག་ཆར་གྱི་གནོད་ཚེ་བྱུང་བའི་བརྒྱུད་རིམ་ནང་། མང་ཚོགས་ལ་རོགས་རམ་དང་། ཕན་ཐོགས་པའི་ནུས་པ་གང་ཡང་འདོན་ཐུབ་མེད་པར་སྐྱོན་བརྗོད་ཤུགས་ཆེན་བྱེད་བཞིན་ཡོད་ཅིང་། རྒྱ་ནག་གི་ཝེས་པོ་ཞེས་པའི་དྲ་རྒྱ་གཅིག་པུའི་ཐོག གཟའ་ཟླ་བའི་ཉིན་མི་ས་ཡ་དགུ་ཙམ་གྱིས་བསམ་ཚུལ་བརྗོད་ནས། རྒྱ་ནག་གཞུང་གིས་གྲོང་ཁྱེར་གྱི་འཛུགས་སྐྲུན་ལས་གཞི་ཁྲོད། ཆུ་ལོག་སོགས་ཉེན་སྐྱོབ་ཀྱི་ཆུ་སྐའི་ལས་གཞི་ཡག་པོ་བཟོས་མེད་པར་སྐྱོན་བརྗོད་བྱས་འདུག
བཀའ་བློན་ཁྲི་བ་མཆོག་ལ་བཅར་འདྲི།
འབྲི་མཁན། དཔལ་ལྡན་རྒྱལ། on July 20th, 2012བོད་མིའི་སྒྲིག་འཛུགས་ཀྱི་བཀའ་བློན་ཁྲི་བ་བློ་བཟང་སེང་གེ་ལགས་ལ་བཅར་འདྲི་ཞུས་པར་གསན་རོགས།
གསར་འགྱུར།
འབྲི་མཁན། དཔལ་ལྡན་རྒྱལ། on July 10th, 2012ཟླ་བ་འདིའི་ཚེས་༦ ཉིན་ནི། གོང་ས་སྐྱབས་མགོན་རྒྱལ་བ་རིན་པོ་ཆེ་ དགུང་གྲངས་༧༧་ལ་ཕེབས་པའི་ སྐུའི་འཁྲུངས་སྐར་གྱི་ཉིན་མོ་ཡིན་པས། རྒྱ་གར་རྡ་རམ་ས་ལ་གཙོས་པའི འཛམ་གླིང་གི་ས་ཕྱོགས་གང་སར་བོད་མི་རྣམས་ཀྱིས། སྐུའི་འཁྲུངས་སྐར་རྣམ་པ་འདྲ་མིན་ངང་སྲུང་བརྩི་བྱས་ཡོད་པ་རེད། བཞུགས་སྒར་རྡམརམ་རལ་ས་ལ་རུ་ གོང་ས་མཆོག་དབུ་བཞུགས་ཀྱིས། བཀའ་བློན་ཁྲི་བ་དང་། སྤྱི་འཐུས་ཚོགས་གཙོ། གཙོས་པའི་ལས་བྱེད་རྣམ་པ་དང། མི་མང་སྟོང་ཕྲག་ཁ་ཤས་འཛོམས་ནས་ སྐུ་འཁྲུངས་སྐར་གྱི་སྲུང་བརྩི་བྱས་ཡོད་པ་དང་། སྐབས་དེར། བཀའ་བློན་ཁྲི་བས་ གོང་ས་མཆོག་གི་མཛད་རྗེས་ངོ་སྤྲོད་དང་འབྲེལ་ཁོང་གིས་གསུང་དོན། བཀའ་ཤག་གི་ངོས་ནས་ ྋགོང་ས་མཆོག་གི་དགོངས་གཞི་ལྟར་མང་གཙོ་དང༌། འཚེ་བ་མེད་པ། དབུ་མའི་ལམ་གྱི་སྲིད་བྱུས་ལ་འགྱུར་བ་མེད། དེར་བརྟེན་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་ རྩ་ཁྲིམས་ཀྱི་སྒྲོམ་གཞིའི་འོག་ མིང་དོན་མཚུངས་པའི་རང་སྐྱོང་ཡོང་ཐབས་བྱེད་པའི་ དབུ་མའི་ལམ་གྱི་སྲིད་བྱུས་ལ་པེ་ཅིན་ནས་མོས་མཐུན་བྱེད་དགོས་པར་ནན་བརྗོད་བྱ་རྒྱུ་ཡིན།་ཞེས་གསུངས་ཡོད་པ་དང་། དེ་ནས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྤེན་པ་ཚེ་རིང་ལགས་ཀྱིས། གོང་ས་མཆོག་གི་མཛད་རྗེས་དང་། སྤྱི་འཐུས་ཀྱི་ལས་དོན་ངོ་སྤྲོད་གསུངས་བཤད་གནང་འདུག དེ་བཞིན་བོད་མིའི་སྒྲིག་འཛུགས་ཀྱི་བཀའ་བློན་གསུམ་ ཡོ་རོབ་དང་། ཨེ་ཤ་ཡའི་རྒྱལ་ཁབ་ཁག་ཅིག་གི་ནང་ཕེབས་ནས་བོད་མི་དང་། བོད་དོན་རྒྱབ་སྐྱོར་བ་ཚོ་དང་མཉམ་དུ་ གོང་ས་མཆོག་གི་སྐུའི་འཁྲུངས་སྐར་སྲུང་བརྩི་བྱས་ཡོད་པ་རེད།
རྒྱ་ནག་གཞུང་གིས་བོད་གྱི་ས་ཁུལ་གང་སར། དམག་མི་འབོར་ཆེན་བཀྲམས་ནས་དམ་དྲག་ཤུགས་ཆེན་བྱེད་བཞིན་ཡོད་ནའང་། བོད་ནང་གི་ས་ཁུལ་ཁ་ཤས་སུ་གོང་ས་མཆོག་གི་སྐུའི་འཁྲུངས་སྐར་སྲུང་བརྩི་བྱས་འདུག
འདི་གར་གནས་ཚུལ་འབྱོར་བ་ལྟར་ན། བོད་ཤར་ཕྱོགས་རྟ་བོ་ཁུལ་དུ་། ཨ་མྱེས་རྨ་ཆེན་གངས་རིར་མདུན་དུ། བོད་མི་རྣམས་ཀྱིས་ འཁྲུངས་སྐར་ཉིན་བསང་གསོལ་གཟབ་རྒྱས་གཏོང་ སྲོལ་ཡོད་པ། རྒྱ་ནག་དམག་མི་འབོར་ཆེན་ཞིག་ཡོང་ནས་བཀག་འགོག་བྱས་ཡོད་ཀྱང་ དགེ་འདུན་པ་གཙོས་ བོད་མི་ཚོས རྟ་བོ་ཉ་མཚོ་དགོན་པའི་མདུན་དུ་ཡོད་པའི་མཆོད་རྟེན་ཆེན་པོར། ༧གོང་ས་མཆོག་གི་སྐུ་པར་གདན་འདྲེན་ཞུས་ནས་འཁྲུངས་སྐར་སྲུང་བརྩི་ཞུས་འདུག ཡང་ཨ་མདོ་རྨ་ཆུ་ས་ཁུལ་དུ། འབྲོག་པ་མང་པོ་ཞིག་རི་སྒང་ལ་སོང་ནས་ལྷ་བསང་བཏང་ཏེ་གོང་ས་མཆོག་གི་འཁྲུངས་སྐར་སྲུང་བརྩི་བྱས་ཡོད་འདུག བཞུགས་སྒར་རྡ་རམ་ས་ནས་༧གོང་ས་ མཆོག་གི་སྐུའི་འཁྲུངས་སྐར་གྱི་གསུང་བཤད་ནང་། བོད་ནང་གི་བོད་མི་རྣམས་ཀྱི་ལྷག་བསམ་ དད་པ་ དམ་ཚིག་ལ་དམིགས་བསལ་གྱི་བསྔགས་བརྗོད་གནང་འདུག་།
འདམ་གཞུང་རྫོང་དུ་ ན་གཞོན་རང་ལོ་ ༢༢ ཅན་ཞིག་གིས་རང་ལུས་མེར་བསྲེགས་བཏང་སྟེ་རྒྱ་གཞུང་ལ་ངོ་རྒོལ་བྱས་འདུག འདི་གར་གནས་ཚུལ་འབྱོར་བ་ལྟར་ན། ཟླ་འདིའི་ཕྱི་ཚེས་ ༧ ཉིན་ ལྷ་ས་གྲོང་ཁྱེར་འདམ་གཞུང་རྫོང་འདམ་ཆུ་ཁ་གྲོང་བརྡལ། མཆོད་རྟེན་ཁུག་ནས་ཡིན་པའི་ན་གཞོན་རང་ལོ་ ༢༢ ཡིན་པ་ཚེ་དབང་རྡོ་རྗེ་ཡིས་འདམ་གཞུང་རྫོང་ཐོག་ཏུ་ རང་ལུས་མེར་བསྲེགས་བཏང་སྟེ་ རྒྱ་གཞུང་ལ་ངོ་རྒོལ་བྱས་ཡོད་པ་དང་། ངོ་རྒོལ་བྱས་ནས་ཅུང་མ་འགོར་བར། ཉེན་རྟོག་པས་ཁོང་གི་ལུས་སྟེང་གི་མེ་བསད་དེ། རྫོང་སྨན་ཁང་དུ་ཁྲིད་ཡོད་ནའང་ཉིན་དེའི་དགོང་མོ་ཁོང་སྐུ་གྲོངས་ཡོད་འདུག འདི་ག་རླུང་འཕྲིན་ཁང་དེས་འདམ་གཞུང་རྫོང་ཉེན་རྟོག་ལས་ཁུངས་སུ་ཁ་པར་བཏང་སྟེ། གནས་ཚུལ་དྲིས་པར། གནས་ཚུལ་དེ་འདྲ་བྱུང་མེད་། ཞེས་བོིད་མི་ཞིག་གིས་རང་ལུས་མེར་བསྲེགས་བཏང་སྟེ་རྒྱ་གཞུང་ལ་ངོ་རྒོལ་བྱས་ཡོད་པ་ངོས་ལེན་བྱས་མ་སོང་།
བོད་མི་མང་སྤྱི་འཐུས་ལྷན་ཚོགས་ཀྱིས་ མཉམ་འབྲེལ་རྒྱལ་ཚོགས་ལ་ དགོས་འདུན་དོན་ཚན་གསུམ་བཏོན་ནས་ བདེན་པའི་མེ་ལྕེ་སྐོར་བསྐྱོད་ཀྱི་ལས་འགུལ་ཞིག། གོང་ས་མཆོག་གི་སྐུའི་འཁྲུངས་སྐར་དང་བསྟུན་ནས་། རྒྱ་གར་ནང་་བོད་མི་འདུས་སྡོད་བྱེད་སའི་ས་ཁུལ་ལ་དྭགས་དང་། ལྷོ་ཕྱོགས་ཀོ་ཅི། བྱང་ཤར་ཤིས་ལོང་ས་ཁུལ་་གསུམ་ནས་འགོ་འཛུགས་བྱས་ཡོད་པ་རེད། རྒྱལ་ཚོགས་ལ་དགོས་འདུན་དོན་ཚན་གསུམ་བཏོན་ཡོད་ནི། ཕྱི་ལོ་ ༡༩༥༩། དང་། ༡༩༦༡། ༡༩༦༥ སོ་སོར་ འཛམ་གླིང་མཉམ་འབྲེལ་རྒྱལ་ཚོགས་ཀྱིས་ བོད་དོན་ཐོག་བཞག་པའི་ གྲོས་ཆོད་ཁག་སླར་ཡང་རྒྱལ་ཚོགས་ནས་གླེང་སློང་དང་། ལག་བསྟར་མཇུག་གནོན་དགོས་པ།
བོད་ནང་གི་ད་ལྟའི་ཛ་དྲག་གནས་སྟངས་རྟོག་ཞིབ་སླད་ རང་དབང་ཅན་གྱི་རྒྱལ་སྤྱིའི་སྐུ་ཚབ་ཁག་ཅིག་འཕྲལ་གཏོང་དགོས་པ།
བོད་ནང་གི་བོད་མིའི་མངོན་འདོད་བསྒྲུབ་རྒྱུར་ མཉམ་འབྲེལ་རྒྱལ་ཚོགས་ཀྱིས་དམིགས་བསལ་འགན་འཁུར་བཞེས་དགོས་པ། བཅས་ཡིན་པ་རེད།
གོང་གསལ་དགོས་འདུན་དེ་དག་བསྒྲུབ་པའི་སླད་ རྒྱ་གར་གཙོས་རྒྱལ་སྤྱིའི་ས་གནས་ཡུལ་གྲུ་སོ་སོར་ བདེན་པའི་མེ་ལྕེ་སྐོར་བསྐྱོད་ཀྱི་ མཚན་རྟགས་བསྡུ་རུབ་ཀྱིས། ད་ལོའི་ཟླ ༡༢ ཚེས ༡༠ ཉིན་ ཨ་རི་ནིའུ་ཡོག་གྲོང་ཁྱེར་ནང་ཡོད་པའི་། རྒྱལ་ཚོགས་ལས་ཁུངས་དང་། སུད་སི་ཇི་ནི་ཝ་གྲོེང་ཁྱེར་ནང་ཡོད་པའི་ རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས། དེ་བཞིན་རྒྱ་གར་ནང་རྟེན་གཞི་བྱས་པའི་རྒྱལ་ཚོགས་ཀྱི་ཡན་ལག་ལས་ཁུངས་བཅས་ལ་སྙན་ཞུ་ཕུལ་རྒྱུ་རེད་འདུག་
ཨ་རིའི་རང་བཙན་ཉིན་མོ།
འབྲི་མཁན། དཔལ་ལྡན་རྒྱལ། on July 10th, 2012
ཟླ་བ་བདུན་པའི་ཚེས་བཞི་ཉིན་ནི། ཨ་མི་རི་ཀར་དབྱིན་ཇུའི་དབང་འཛིན་འོག་ནས་རང་བཙན་ཐོབ་པའི་ཉིན་མོ་ཡིན་པས། ཉིན་དེར་ཨ་རིའི་རྒྱལ་ཡོངས་སུ་གཞུང་གི་ལས་ཁུངས་ཚང་མ་གུང་གསེང་བཏང་ནས་། རང་བཙན་ཉིན་མོ་སྲུང་བརྩི་བྱེད་བཞིན་ཡོད་པ་རེད།
རྒྱལ་ས་ཝ་ཞིན་ཏོན་དུ།
སྔོན་ཆད་ཨ་མི་རི་ཀའི་གླིང་ཆེན་འདིའི་ནང་། ས་སྐྱེས་རྡོ་སྐྱེས་ཀྱི་གདོད་མིའི་མི་རིགས་གནས་སྡོད་བྱས་ཡོད་ནའང་། ༡༤༩༠ནང་ཡོ་རོབ་ནས་མི་དཀར་པོ། ཨ་མི་རི་ཀི་གླིང་ཆེན་འདིར་ཡོང་ནས་ རིམ་བཞིན་དབང་བསྒྱུར་བྱས་ཏེ། དབྱིན་ཇུའི་རྒྱལ་ཁབ་ཀྱི་དབང་འོག་ཏུ་གནས་ཡོད་པ་དང་། དེ་ནས་ ༡༧༧༥ ལོར། ཨ་རིའི་མི་མང་གིས་དབྱིན་ཇུའི་སྲིད་གཞུང་ལ་༼དཔྱ་ཁྲལ་སྤྲོད་འདོད་མེད་༽ ཞེས་། ཨ་རིའི་གསར་བརྗེ་ལས་འགུལ་འགོ་ཙུགས་ནས་ ཨ་རིའི་མི་མང་གིས་དབྱིན་ཇུའི་དབང་འཛིན་པར་ངོ་རྒོལ་བྱས་ཏེ། ༡༧༧༦ ལོར་ཨ་རིར་རང་བཙན་ཐོབ་ནས་ལོ་དེའི་ཟླ་བ་བདུན་པའི་ཚེས་༤ ཉིན། རང་བཙན་གསལ་བསྒྲགས་བྱས་ཡོད་པ་རེད། དེ་ནས་བཟུང་ཨ་རིའི་མི་མང་གིས། ལོ་ལྟར་ཟླ་བ་བདུན་པའི་ཚེས་༤་ཉིན། རང་བཙན་ཉིན་མོ་སྲུང་བརྩི་བྱེད་བཞིན་ཡོད་པ་རེད། ལྷག་པར་དུ་༡༩༤༡་ལོར་། ཨ་རིའི་གཞུང་གིས། རང་བཙན་ཉིན་མོ་ལོ་ལྟར་ཟླ་བ་བདུན་པའི་ཚེས་ ༤ ཉིན་ ཨ་རིའི་རྒྱལ་ཡོངས་སུ་ གཞུང་གི་ལས་ཁུངས་ཚང་མ་གུང་གསེང་ཡིན་པ་གཏན་འབེབས་བྱས་ཡོད་པ་རེད། ཨ་རིས་རང་བཙན་ཉིན་མོ་སྲུང་བརྩི་བྱེད་སྟངས་ནི། རྒྱལ་ཡོངས་རང་བཞིན་གྱི་མཛད་སྒོ་སོགས་མེད་ནའང་། གཞུང་གི་འགྲོ་སོང་བཏང་ནས་ས་གནས་སོ་སོར་ཤོག་སྦག་རྒྱག་པ་དང་། རོལ་དབྱངས་འདུ་འཛོམས་བྱེད་པ། རྒྱས་སྤྲོས་མ་ཡིན་པར་ནང་མི་དང་། གྲོགས་པོ་རྣམས་ལྷན་འཛོམས་ཀྱིས་རང་བཙན་ཉིན་མོ་སྲུང་བརྩི་བྱེད་སྲོལ་ཡོད་པ་རེད།
གསར་འགྱུར།
འབྲི་མཁན། དཔལ་ལྡན་རྒྱལ། on May 22nd, 2012
དེང་སྐབས་༧གོང་ས་མཆོག་གིས། ཨོ་རོབ་ནང་མཛད་འཕྲིན་བསྐྱང་བཞིན་པ་ལྟར། ཚེས་༡༨་ཉིན་ཨོ་སུ་ཁྲི་རི་ཡའི་གྲོང་ཁྱེར་ Klagen furt ནང་གསར་འགོད་ལྷན་ཚོཌ་ཤིག་ཐོག ༧གོང་ས་མཆོག་གིས། རྒྱ་ནག་མི་མང་ཡོངས་ལ་གནས་ཚུལ་ངོ་མ་ཤེས་རྒྱུའི་ཐོབ་ཐང་ཡོད་ལ། ཁོང་ཚོར་བདེན་རྫུན་དབྱེ་འབྱེད་ཐུབ་པའི་ནུས་པ་ཡོད་པ་རེད། ཡིན་ནའང་། རྒྱ་ནག་གཞུང་གིས་གསར་འགྱུར་བརྒྱུད་ལམ་ཁག་ལ་སྟངས་འཛིན་བྱས་ནས། རྒྱ་ནག་མི་མང་ལ་གནད་དོན་མང་པོ་ཞིག་ཤེས་རྟོགས་བྱེད་ཐབས་མེད་བར་བཟོ་བཞིན་པ་དེ་ནི། མི་ཆོས་དང་མི་མཐུན་པའི་མ་རབས་ཀྱི་སྤྱོད་ཚུལ་ཞིག་རེད་ཞེས་གསུངས་ནས་ རྒྱ་ནག་གཞུང་གིས། གསར་འགྱུར་བརྒྱུད་ལམ་ལ་སྟངས་འཛིན་བྱེད་བཞིན་པར་སྐྱོན་བརྗོད་གནང་འདུག དེ་ནས་ཚེས་༢༠་ཉིན་༧གོང་ས་མཆོག་གིས། ཨོ་སུ་ཁྲི་རི་ཡའི་ཁ་རིན་ཐི་ཡན་མངའ་སྡེ་ ནང་། ཁྱོན་མི་གྲངས་ ༥༠༠༠ བརྒལ་བར་༼བདེ་སྐྱིད་འཚོལ་ཐབས།༽ སྐོར་བཀའ་སློབ་བསྩལ་རྗེས། ཁ་རིན་ཐི་ཡའི་མངའ་སྡེའི་སྤྱི་ཁྱབ་ཀྱིས་༧གོང་ས་མཆོག་ལ་ཆེ་བསྟོད། གསེར་གྱི་གཟེངས་རྟགས་ཞིག་ཕུལ་ཡོད་པ་རེད། ཡང་ཉིན་དེར་༧གོང་ས་གཆོག་གིས། ཨོ་སུ་ཁྲི་རི་ཡའི་ནང་གནས་སྡོད་བོད་མི་ཚོར་། བོད་ཀྱི་སྐད་ཡིག་དང་། རིག་གཞུང་གཅེས་འཛིན་བྱེད་དགོས་པ་སོགས་བླང་དོར་གྱི་བཀའ་སློབ་གནང་འདུག ཕྱི་ཚེས་ ༢༡ ཉིན་༧གོང་ས་མཆོག་གིས། ཨོ་སུ་ཁྲི་རི་ཡའི་གྲོང་ཁྱེར་ Salzburg ནང་། ༼འཛམ་གླིང་ཞི་བདེ་དང་། ཀུན་ཁྱབ་འགན་འཁུར།༽ ཞེས་པའི་བརྗོད་གཞིའི་ཐོག་བཀའ་སློབ་གནང་འདུག
༧གོང་ས་མཆོག་གི་སྐུ་ཕྱྭའི་གནད་དོན་སྐོར་ལ། བོད་མིའི་སྒྲིག་འཛུགས་ཀྱིས་ཚེས་༢༠ ཉིན་གསར་འགོད་གསལ་བསྒྲགས་ཤིག་སྤེལ་ཡོད་པའི་ནང་། ཕྱི་ལོ་ ༢༠༡༠ ཕྱི་ཟླ་ ༦ ནང་བོད་ནས་གནས་ཚུལ་འབྱོར་གསལ་ལྟར་ན། རྒྱ་མིའི་གསང་བའི་ལས་ཁུངས་ཀྱིས་བུད་མེད་ཁག་གཅིག་ལ། དམིགས་བསལ་སྦྱོང་བརྡར་སྤྲད་དེ་༧གོང་ས་༨སྐྱབས་མགོན་ཆེན་པོ་མཆོག་གི་སྐུ་ཕྱྭར་གནོད་འཚེ་བྱ་རྒྱུ་མ་ཟད། སྐུ་སྲུང་བའི་འཕྲུལ་ཆས་ཀྱིས་ཞིབ་བཤེར་བྱེད་སྐབས། ཤེས་ཚོར་དཀའ་བའི་མྱོས་རྫས་དུག་རིགས་ཀྱི་རྫས་སྦྱོར་ ཧ་ཅང་ཡར་ཐོན་ཅན་དེ་འདྲ་བརྒྱུད་༧གོང་ས་མཆོག་གི་སྐུ་ ཕྱྭར། གནོད་འཚེ་བྱ་རྒྱུའི་ཐབས་ལམ་འཚོལ་ཞིབ་བྱེད་བཞིན་ཡོད་པའི་གནས་ཚུལ་འབྱོར། ཞེས་དང་། ཡང་གསལ་བསྒྲགས་དེའི་ནང་། ༧གོང་ས་༧སྐྱབས་མགོན་ཆེན་པོ་མཆོག་གིས། བོད་མིའི་སྤྱི་ཚོགས་དེ་བཞིན་མང་གཙོའི་ལམ་བཟང་ཐོག བཅོས་བསྒྱུར་མཛད་ཐབས་དེར་གོ་སྐབས་བཟུང་སྟེ་བོད་མིའི་སྤྱི་ཚོགས་ཁྲོད་མཁྲེགས་བཟུང་ཅན་རེ་ཟུང་ལ་གདེང་སྤོབས་གསར་པ་བསླེབས་ཏེ་ལངས་ཕྱོགས་མི་མཐུན་པ་བཟུང་ཡོད་པ་ནི། དོལ་རྒྱལ་ཚོགས་པ་ཆགས་ཡོད། ཞེས་བཀོད་འདུག ཡང་སྐབས་དེར་བཀའ་བློན་ཁྲི་ཚབ། པད་མ་ཆོས་འབྱོར་ལགས་ཀྱིས། གོང་ས་མཆོག་གི་སྐུ་ཕྱྭའི་སྐོར་ལ། ཞེད་སྣང་དང་སྔངས་སྐྲག་བྱེད་མི་དགོས་ནའང། བོད་མི་ཚང་མས་གཟབ་གཟབ་བྱ་དགོས་པའི་འབོད་སྐུལ་ཡང་གནང་ཡོད་པ་རེད།
ཕྱི་ཟླ་༤ ཚེས་༢༩ ཉིན་ཁམས་ལི་ཐང་གི་སྒྱུ་རྩལ་བ། ཨ་ཐར་ལ་རྒྱ་གཞུང་གིས་མཚོན་ཆ་ལྐོག་ཉར་བྱས་པའི་ཉེས་མིང་འོག ལོ་གསུམ་གྱི་བཙོན་འཇུག་ཁྲིམས་ཐག་བཅད་ཡོད་འདུག ད་ལོའི་ཕྱི་ཟླ་༢ པའི་ཚེས་༢༧ ཉིན་རྒྱ་ནག་གཞུང་གི་ཉེན་རྟོག་པས་སྒྱུ་རྩལ་བ་ཨ་ཐར་ལགས། རྫོང་ཐོག་གི་ཚོང་ཁང་དུ་བསྡད་ཡོད་པའི་སྐབས། གློ་བུར་དུ་ཁོང་གི་ནང་སྔོག་བཤེར་བྱས་ནས། འཛིན་བཟུང་བཙན་ཁྲིད་བྱས་ཡོད་པ་རེད། སྤྱི་འཐུས་ཨ་ཀྲུག་ཚེ་བརྟན་གྱིས་གནས་ཚུལ་འགྲེལ་བརྗོད་གནང་བ་ལྟར་ན ། ཕྱི་ཟླ་༤ བའི་ཚེས་༢༩ ཉིན་སྒྱུ་རྩལ་བ་ཨ་ཐར་ལགས་སུ་ལི་ཐང་རྫོང་མི་མང་ཁྲིམས་ཁང་གིས། ཁོང་ལ་མཚོན་ཆ་ལྐོག་ཉར་བྱས་ཡོད་པའི་ཉེས་འཛུགས་ཀྱིས་ལོ་གསུམ་གྱི་ཁྲིམས་ཐག་བཅད་ཡོད་འདུག ཁོང་ཡ་རབས་བཟང་སྤྱོད་ལྡན་པའི་མི་ཞིག་ཡིན་པ་དང་། མང་ཚོགས་ཁྲོད་དུས་རྒྱུན་ཁ་ཤགས་སོགས་བཤད་མཁན་ཞིག་ཡིན་པ་ལས། མཚོན་ཆ་ལྐོག་ཉར་སོགས་ཀྱི་ལས་ཀ་རྩ་བ་ནས་བྱེད་མཁན་ཞིག་མིན་ན་ཡང་རྒྱ་གཞུང་གིས་མ་ཉེས་ཁ་གཡོག་གིས། ལོ་གསུམ་གྱི་ཁྲིམས་ཐག་བཅད་ཡོད་པས། ཁོང་གི་ནང་མི་ཚོས་ ་བློ་ཕམ་བྱེད་བཞིན་ཡོད་པ་རེད་ཟེར། དགུང་ལོ་༣༣ ཡིན་པའི། སྒྱུ་རྩལ་བ་ཨ་ཐར་ལགས་ཀྱིས་ཉེ་ཆར་བོད་མི་ཚོར་སྙིང་གཏམ་བཤད་པའི་བརྙན་འཁོར་ཞིག་ཀྱང་བརྒྱུད་ལམ་ཁག་ཏུ་འགྲེམས་སྤེལ་བྱས་ཡོད་འདུག །
བོད་དོན་འཐབ་རྩོད་ཆེད། རྡ་ས་ནས་ལྷ་སའི་བར་ཞི་བའི་གོམ་བགྲོད་བྱེད་མཁན། གླིང་ཚ་ཚེ་བརྟན་རྡོར་རྗེ་ལགས་ཀྱིས་གསང་བའི་ངང་ཨ་མ་དང་སྲིང་མོ་གཉིས། རྒྱ་བལ་ས་མཚམས་ནས་བཞག་ཏེ། བལ་ཡུལ་ནང་ཉིན་གྲངས་བརྒྱད་རིང་། གོམ་བགྲོད་བྱས་རྗེས། ཚེས་༢༡ Kathmadu ནས་ཀི་ལོ་མི་ཊར་༡༥འི་སར་ཡོད་པའི་ Thumpo Rin ས་གནས་སུ་བལ་པོའི་ཉེན་རྟོག་པས་ཚེ་བརྟན་རྡོ་རྗེ་ལགས་འཛིན་བཟུང་བྱས་འདུག ཁོང་འཛིན་བཟུང་མ་བྱས་གོང་བརྙན་འཕྲིན་བརྒྱུད་ནས་སྐད་ཆ་ཡོད་པ་ཞིག་འདི་གར་འབྱོར་བའི་ནང་། ཁོང་གིས་། ངས་ཞི་བའི་གོམ་བགྲོད་དེ་བལ་ཡུལ་དང་། བོད་ཀྱི་ས་མཚམས་ལ་སླེབས་སྐབས་རྒྱ་ནག་གི་དམག་མིས། ང་ལ་ཞི་བའི་གོམ་བགྲོད་བྱེད་ཏུ་མི་འཇུག་པ་ཕལ་ཆེར་གཏན་འཁེལ་བ་རེད། ཡིན་ན་འང་། ངའི་ཞི་བའི་འཐབ་རྩོད་། དུས་དེ་ནས་འགོ་ཚུགས་པ་རེད། གལ་ཏེ་རྒྱ་ནག་གཞུང་གིས་བཙོན་འཇུག་བྱས་པ་ཡིན་ན། བཙོན་ཁང་ནང་འདུག་རྒྱུ་དེ་ངའི་འཐབ་རྩོད་ཀྱི་རྨང་གཞི་ཡིན། ཞེས་གསུངས་འདུག ཡིན་ནའང་། ཁོང་བོད་དང་། བལ་ཡུལ་གྱི་ས་མཚམས་ལ་མ་སླེབས་གོང་བལ་ཡུལ་གྱི་ཉེན་རྟོག་པས་འཛིན་བཟུང་བྱས་ནས་ད་ལྟ་ཆར་གནས་སྟངས་ཤེས་རྟོགས་མེད་པར་གྱུར་འདུག
གྲྭ་མང་ལ་སློབ་གསོའི་ཚབ་ཏུ་རྒྱ་ནག་གཞུང་གི་སྲིད་ཇུས་ལ་སྐྱོན་བརྗོད།
འབྲི་མཁན། དཔལ་ལྡན་རྒྱལ། on May 18th, 2012དེང་སྐབས་རྒྱ་ནག་གཞུང་གིས་བོད་ཀྱི་བླ་མ་དང་། དགེ་བཤེས། དཔོན་པོ་སོགས་ལ་དགོན་པའི་གྲྭ་བ་རྣམས་དང་། མི་མང་ལ་སློབ་གསོ་རྒྱག་ཏུ་འཇུག་པའི་ལས་འགུལ་ཞིག་སྤེལ་བཞིན་ཡོད་པ་ལྟར། ད་ལོའི་སྤྱི་ཟླ་གསུམ་པའི་ནང་ས་གནས་འཐབ་ཕྱོགས་གཅིག་གྱུར་ཁང་དང་། འབྲེལ་ཡོད་ལས་ཁུངས་ཀྱིས་ཨ་མདོ་བླ་བྲང་དགོན་པའི་དགེ་བཤེས་བཀྲ་ཤིས་རྒྱ་མཚོ་ལགས་སུ་དགོན་པའི་གྲྭ་མང་ལ་སློབ་གསོ་རྒྱག་དགོས་པའི་རེ་འདུན་བཏོན་པ་ལྟར། དགེ་བཤེས་བཀྲ་ཤིས་རྒྱ་མཚོ་ལགས་ཀྱིས་གྲྭ་མང་ལ་སློབ་གསོ་རྒྱག་རྒྱུའི་ཚབ་ཏུ། རྒྱ་ནག་གཞུང་གི་སྲིད་ཇུས་ལ་སྐྱོན་བརྗོད་དང་འབྲེལ་སྲིད་གཞུང་ལ་རེ་འདུན་བཏོན་མང་པོ་ཞིག་བཏོན་ཡོད་གནས་ཚུལ་ཕྱོགས་བསྒྲིགས།
གསར་འགྱུར།
འབྲི་མཁན། དཔལ་ལྡན་རྒྱལ། on May 15th, 2012ཚེས་༡༤་ཉིན་དབྱིན་ཇུའི་སན་ཐི་པའོ། ཞེས་པའི་ལྷ་ཁང་ཆེན་མོའི་ནང་ གོང་ས་མཆོག་ལ་Templeton ཞེས་པའི་ཆེ་བསྟོད་ཀྱི་གཟེངས་རྟགས་ཕུལ་ཡོད་པ་དང། སྐབས་དེར། Templeton ཐེབས་རྩ་ཁང་གི་འགན་འཛིན་གྱིས། གོང་ས་ཏཱ་ལའི་བླ་མ་མཆོག་གིས་ད་བར་། འགྲོ་བ་མིའི་བདེ་རྩར་དམིགས་ནས་མཛད་རྗེས་བཞག་ཡོད་པར། ཆེ་བསྟོད་ཀྱི་ཚུལ་དུ་གཟེངས་རྟགས་འདི་ཕུལ་ཡོད་པའི་སྐོར་ངོ་སྤྲོད་གནང་བ་དང་། དེ་ནས་༧གོང་ས་༧སྐྱབས་མགོན་ཆེན་པོ་མཆོག་གིས། ཐོག་མར་གཟེངས་རྟགས་འདི་གནང་བར་ཐུགས་རྗེ་ཆེ་ཞུས་པ་དང་འབྲེལ། འཛམ་གླིང་ནང་གི་དཀའ་རྙོག་རྣམས། ཞི་བའི་གྲོས་མོལ་གྱི་ལམ་ནས་ སེལ་ཐབས་བྱེད་དགོས་པའི་སྐོར་གསུངས་འདུག ད་ཐེངས་གཟེངས་རྟགས་འདི་ལ། ཨ་སྒོར་ས་ཡ་གཅིག་དང་། འབུམ་བརྒྱད་ཙམ་ཡོད་པ་ཚང་མ། ཞལ་འདེབས་སུ་གནང་འདུག དབྱིན་ཡུལ་ནང་རྟེན་གཞི་བྱས་ཡོད་པའི་། བྱིས་པ་སྲུང་སྐྱོབ་ཐེབས་རྩ་ཁང་ལ། ཨ་སྒོར་ས་ཡ་གཅིག་དང་། ཕྱེད་ཀ་གནང་ཡོད་པ་དང། ཨ་སྒོར་འབུམ་གཉིས སེམས་དང་སྲོག་ཅེས་པའི་ཚན་རིག་དང་། ནང་ཆོས་ལ་ཞིབ་འཇུག་བྱེད་མཁན་གྱི་ཚོགས་པ་དེ་ལ་གནང་འདུག དེའི་འཕྲོས་སྒོར་མོ་རྣམས་ རྒྱ་གར་ནང་གི་བོད་ཀྱི་ དགོན་པ་ཁག་ནང་དེང་དུས་ ཚན་རིག་གི་སློབ་གཉེར་གནང་ཆེད་ ཞལ་འདེབས་གསོལ་རས་གནང་འདུག
ཡང་ཉིན་དེར་གོང་ས་མཆོག དབྱིན་ཇིའི་སྲིད་བློན་ David Cameron དང་། སྲིད་གཞོན་པ Nic Clegg གཉིས་ལ་མཇལ་འཕྲད་གནང་འདུག
གནས་ཚུལ་ཡོང་ཁུངས་ལྟར་ན། མཇལ་འཕྲད་སྐབས་། དབྱིན་ཇུའི་དབུ་ཁྲིད་རྣམ་གཉིས་ཀྱིས། བོད་ནང་གི་གནས་སྟངས་ལ་སེམས་ཚབས་ཡོད་སྐོར་གསུངས་ཡོད་པ་དང་། ཡང་གོང་ས་མཆོག་གིས། དབྱིན་ཡུལ་ནང་འཕྲལ་སེལ་གྱི་དཔལ་འབྱོར་གྱི་དཀའ་ངལ་ཡོད་ནའང་། རང་ཉིད་གྱི་རྩ་བའི་ལངས་ཕྱོགས་འཛིན་དགོས་པའི་སློབ་སྟོན་གནང་འདུག དབུ་ཁྲིད་རྣམས་མཇལ་འཕྲད་གནང་བའི་རྗེས། རྒྱ་ནག་ཕྱི་སྲིད་ལྷན་ཁང་གིས་གསལ་བསྒྲགས་ཤིག་སྤེལ་ཏེ། དེ་ནི་རྒྱ་ནག་གི་ནང་སྲིད་ལ་ཐེ་ཇུས་དང། རྒྱ་ནག་མི་དམངས་ལ་དམའ་འབེབས་བྱས་པ་ཡིན་པས། རྒྱ་ནག་དང་། དབྱིན་ཇིའི་འབྲེལ་ལམ་ལ་འགལ་ཟླ་བཟོས་པ་རེད་ཅེས་བཀོད་ཡོད། འོན་ཀྱང་དབྱིན་ཇིའི་ཕྱོགས་ནས་། སྲིད་བློན་David Cameron ་མི་སུ་དང་མཇལ་འཕྲད་གནང་མིན་ ཁོང་ལ་རང་དབང་རེད། ཅེས་ལན་འདེབས་བྱས་འདུག
ད་ལོའི་སུམ་ཅུའི་དུས་དྲན་ཉིན། གླིང་ཚ་ཚེ་བརྟན་རྡོ་རྗེ་མ་བུ་གསུམ་གྱིས་རྡ་ས་ནས་ལྷ་ས་བར། ཞི་བའི་གོམ་བགྲོད་འཐབ་རྩོད་འགོ་འཛུགས་ནས། ཟླ་གཉིས་ལྷག་གི་རྗེས། ཟླ་འདིའི་ཕྱི་ཚེས་ ༡༠ ཉིན་རྒྱ་གར་དང་། བལ་ཡུལ་མཐའ་མཚམས་སུ་བསླེབས་སྐབས། བལ་ཡུལ་དམག་མིས་ཁོང་ཚོ་བཀག་འགོག་བྱས་ཡོད་པ་མ་ཟད། མ་བུ་གསུམ་པོར་རྡུང་རྡེག་བཏང་སྟེ་ ཨ་མ་ལྡོམ་པོ་སྐྱིད་ལ་རྨས་སྐྱོན་བཟོས་ཡོད་པ་རེད། གནས་ཚུལ་ཡོངས་ཁུངས་ལྟར་ན། ཕྱི་ཚེས་ ༡༤ ཉིན་གྷོ་ར་པུར་ས་གནས་ནས ཞོགས་པའི་དུས་ཚོད་གཉིས་བའི་སྟེང་། གླིང་ཚ་ཚེ་བརྟན་རྡོ་རྗེ་ལགས་ཀྱིས། ཁོང་གི་ཨ་མ་དང་། སྲིང་མོ་གཉིས་ལ་ཤེས་སུ་མ་འཇུག་བར་ཁོང་གཅིག་པོ་གོམ་བགྲོད་འགོ་འཛུགས་བྱས་ནས། ད་ལྟའི་ཆར་གནས་ཆེན་ལིམ་བུ་ནེ། བརྒལ་ནས་བལ་ཡུལ་གྱི་རྒྱལ་ས་ཀན་ཀྲི་མན་ཏུའུ་ཕྱོགས་སུ་ གོམ་བགྲོད་བྱེད་བཞིན་ཡོད་པའི་སྐོར། གླིང་ཚ་ཚེ་བརྟན་རྡོ་རྗེ་ལགས་ཀྱིས་ལྡི་ལིར་ཡོད་པའི་ མདོ་སྨད་ས་གནས་རྒྱུན་ལས་ལ ཁ་པར་བཏང་ནས་འགྲེལ་བརྗོད་བྱས་འདུག ཡང་ཁོང་གིས་ཨ་མ་དང་སྲུང་མོ་གཉིས་ལ ལྟ་རྟོག་གནང་རྒྱུའི་རེ་སྐུལ་ཀྱང་ཞུས་འདུག ད་ལྟའི་ཆར ཨ་མ་ལྡོམ་པོ་སྐྱིད་དང་ སྲིང་མོ་ལྷ་མོ་སྐྱིད་གཉིས་ལ་རྒྱ་གར་གྱི་རྒྱལ་ས་ལྡི་ལི་ཡོང་རྒྱུའི་གྲ་སྒྲིག་བྱེད་བཞིན་ཡོད་འདུག
ཟླ་འདིའི་ཕྱི་ཚེས་ ༧ ཡས་མས་ཤིག་ལ། མདོ་སྨད་ཀན་ལྷོ་ཁུལ་ཀླུ་ཆུ་རྫོང་ ཟམ་ཚ་རོང་དུ་ཡོད་པའི་སྒེར་བཙུགས་སློབ་གྲྭ་ ༼གངས་ལྗོངས་ཤེས་རིག་ཞི་བདེ་ འོད་དཀར་གླིང་། ཞེས་པའི་དྭ་ཕྲུག་སློབ་གྲྭ་དེ། རྒྱ་གཞུང་གིས་སྒོ་བརྒྱབ་འདུག བོད་ནས་འདི་གར་གནས་ཚུལ་བཏང་འབྱོར་བ་ལྟར་ན། སློབ་གྲ་སྒོ་བརྒྱབ་པ་དང་མཉམ་དུ་ སློབ་གྲྭའི་དགེ་རྒན་རང་ལོ་ ༣༣ ཡིན་པའི་སངས་རྒྱས་དོན་གྲུབ་དང་། རང་ལོ་ ༢༨ ཡིན་པའི་འཇམ་དབྱངས་གཉིས་གར་སོང་ཆ་མེད་དུ་གྱུར་འདུག ས་གནས་མི་མང་གིས་ཁོང་གཉིས་རྒྱ་ནག་ཉེན་རྟོག་པས འཛིན་བཟུང་བྱས་པར་དོགས་པ་བྱེད་ཀྱིན་ཡོད་པ་རེད།
རྒྱ་ནག་གཞུང་གིས་སློབ་གྲྭ་དེ་སྒོ་རྒྱག་དོན་གཙོ་བོ་ནི། སློབ་གྲྭའི་འཁྲིད་གཞི་གཙོ་བོ་བོད་ཡིག་ཡིན་པ་དང་། བོད་ཀྱི་རིག་གནས་སྤྱི་དང་། ལྷག་པར་བོད་སྐད་གཙང་མ་བཤད་རྒྱུར། ཤུགས་རྒྱག་གི་ཡོད་པ་མ་ཟད། འཛིན་རིམ་འཕར་བྱེད་ཀྱི་རྒྱུགས་གཞི་ཡང་བོད་ཡིག་གཙོ་བོར་བཟུང་ཡོད་སྟབས། སྲིད་གཞུང་གིས་མ་འདོད་པ་ཡིན་ཚུལ་བརྗོད་ཀྱིན་ཡོད་འདུག ཡང་འགའ་རེ་ཡིས་སློབ་གྲྭའི་སློབ་གཙོ་ ཨ་བཙུན་བརྩོན་འགྲུས་རྒྱ་མཚོ་ཡིས་སློབ་གྲྭ་དེར་ སློབ་གླུ་ཞིག་བརྩམས་ཡོད་པ་དེའི་ནང་། ཁ་བྲལ་ལ་ངན་སྐུལ་བྱས་ཡོད་པའི་ཆབ་སྲིད་ཀྱི་གནད་དོན་ཆེན་པོ་ཡོད་ཚུལ་ཉེས་འཛུགས་བྱས་ཡོད་པ་རེད་ཟེར།
གོང་ས་མཆོག་གིས་རྒྱ་ནག་གི་དབང་འཛིན་པ་ཚོར། རང་ལུས་མེ་སྲེག་གི་འབྱུང་རྐྱེན་ལ་ཞིབ་འཇུག་བྱེད་དགོས་པའི་རེ་སྐུལ་གནང་འདུག
འབྲི་མཁན། དཔལ་ལྡན་རྒྱལ། on April 19th, 2012སྤྱི་ཟླ་བཞི་བའི་ཚེས་༡༦ཉིན། གོང་ས་མཆོག་གིས་ཨ་རིའི་མཚོ་གླིང་མངའ་སྡེ་ཧ་ཝ་ཡེ་རུ་གསར་འགོད་ལྷན་ཚོགས་ཞིག་ཐོག་དྲི་བར་ལན་འདེབས་གནང་བ་གཤམ་གསལ།
དྲི་བ།
ཉེ་ལམ་བོད་མི་སུམ་ཅུ་ལྷག་གིས་རང་ལུས་མེ་བསྲེགས་བཏང་ནས། རྒྱ་ནག་དབང་འཛིན་པར་ངོ་རྒོལ་བྱས་ཡོད་པ་རེད། ཁོང་རྣམ་པས་དེ་འདྲའི་འཚེ་བའི་ལས་དོན་སྤེལ་དོན་ག་རེ་ཡིན་ནམ། ང་ཚོར་ཤེས་རྟོགས་ཆེད་གསུང་རོགས་ཞུ།
གོང་ས་མཆོག་གིས།
དེ་ནི་ཧ་ཅང་ཡིད་སྐྱོ་བའི་དོན་དག་ཅིག་རེད། ང་ཚོས་ཡིད་སྐྱོ་བའི་དོན་དག་འདིའི་འབྱུང་རྐྱེན་ལ་ལྟ་དགོས། དེ་ནི་འདས་པའི་མི་ལོ་ལྔ་ཅུ་འམ། དྲུག་ཅུའི་རིང་ལ་མྱངས་བའི་དཀའ་ཚེགས་ཆེ་བའི་ཉམས་མྱོང་དང་། པན་ཆེན་སྐུ་ཕྲེང་གོང་མ་དགོངས་པ་མ་རྫོགས་པའི་ཉིན་ཁ་ཤས་སྔོན་ལ། ཁོང་གིས་རྒྱ་ནག་གུང་ཁྲན་ཏང་བོད་ནང་ཡོང་ནས་དགེ་མཚན་ལྡན་པའི་ཡར་རྒྱས་བཏང་ཡོད་པ་རེད། ཡིན་ནའང་། བོད་ནང་གཏོར་སྐྱོན་བཏང་བ་དང་། དཀའ་སྡུག་བཟོས་བར་བསྡུར་ཐབས་མེད་པ་ཞིག་རེད། ཞེས་༡༩༨༩ ལོར་ཡོངས་ཁྱབ་ཀྱིས་གསུངས་ཡོད་པ་རེད། དེ་ནས་གནས་སྟངས་ཇེ་སྡུག་ཇེ་ཞན་དུ་ཕྱིན་པ་རེད། བོད་མིས་མི་འདོད་པའི་རྣམ་འགྱུར་བསྟན་པར་བཙན་གནོན་བྱས་པ་རེད། དེ་ནས་སྤྱི་ལོ་ཆིག་སྟོང་དགུ་ཅུའི་ནང་ལ། གུང་ཁྲན་ཏང་གི་དྲུང་ཆེ་ཞིག་གིས་བོད་ལྗོངས་སློབ་གྲ་ཆེན་མོའི་ནང་། བོད་ཀྱི་སྲོལ་རྒྱུན་རིག་གནས་ཀྱི་བསླབ་གཞི་མེད་པར་བཟོས་ནས། རྒྱ་ཡིག་ནང་ཡོད་པའི་བསླབ་དེབ་བོད་ཡིག་ནང་བསྒྱུར་ནས་བསླབ་ཡོད་པ་རེད། སྐབས་དེར་མི་མང་པོ་ཞིག་གིས་བོད་རང་སྐྱོང་ལྗོངས་ནང་དུ། བསྐྱར་དུ་རིག་གནས་གསར་བརྗེ་འབྱུང་བཞིན་འདུག་ཞེས་སྐྱོན་བརྗོད་བྱས་ཡོད། དེ་ནི་༢༠༠༨་ལོའི་བོད་ནང་དཀའ་རྙོག་གི་འབྱུང་རྐྱེན་རེད། སྐབས་དེར་དྲག་གནོན་བྱས་ནས་བོད་མི་བརྒྱ་ཕྲག་མང་པོ་དམར་གསོད་དང་། གར་སོང་ཆ་མེད་དུ་གྱུར་བ་རེད།
སྐབས་དེར་བོད་ཀྱི་དགོན་སྡེ་ཁག་གི་ནང་རྒྱལ་གཅེས་ཆོས་གཅེས་ཟེར་བའི་ལས་འགུལ་སྤེལ་ནས། གྲ་བཙུན་མང་པོ་འཛིན་བཟུང་དང་། དགོན་པ་ནས་ཕྱིར་ཕུད་པ་དང་། ཁ་ཤས་གར་སོང་ཆ་མེད་དུ་གྱུར་བ་རེད། རྩ་བའི་ཆ་ནས་བོད་མི་རྣམས་འཚེ་མེད་ཞི་བར་ཡིད་ཆེས་བྱེད་མཁན་ཡིན་པས་གཞན་གསོད་རྒྱུའི་བསམ་པ་མེད་པར། དེ་འདྲའི་བྱེད་ཐབས་ལ་བརྟེན་ནས་རྣམ་འགྱུར་བསྟན་ཡོད་པ་དེ་ཧ་ཅང་ཡིད་སྐྱོ་བ་ཞིག་རེད། དེ་འདྲའི་དོན་རྐྱེན་ཁ་ཤས་བྱུང་མ་ཐག ངས་བཤད་ཡོད། རྒྱ་ནག་གི་དབང་འཛིན་པ་ཚོས། དོན་དག་འདིའི་འབྱུང་རྐྱེན་ལ་ཞིབ་འཇུག་བྱེད་དགོས། ངའི་བསམ་པར། ས་གནས་ཀྱི་དབང་འཛིན་པ་ཚོས་མེ་མདའ་ལ་དད་གུས་བྱེད་བའིན་ཡོས་རེད། སྟབས་མ་ལེགས་པ་ཞིག་ལ་ལྟ་བ་མཁྲེགས་འཛིན་བྱེད་མཁན་ཚོས་། མའོ་ཙེ་ཏུང་གིས་མེ་མདའི་ཁ་ནས་སྲིད་དབང་ཐོབ་ཟེར་བ་དེ་ལ། ད་དུང་ཡང་ཡིད་ཆེས་བྱེད་ཀྱིན་ཡོད། དེ་ནི་རྒྱལ་ནང་དམག་འཁྲུག་དང་། ཉི་ཧོང་གི་དམག་འཁྲུག་སྐབས་གཅིག་བྱས་ན། རྒྱུ་མཚན་ཡོད་སྲིད་པ་རེད། ཡིན་ནའང་འདས་བའི་ལོ་དྲུག་ཅུའི་རིང་བསམ་བློ་གཏོང་སྟབས་དེ་ནི་དོན་དངོས་དང་མི་མཐུན་པ་ཞིག་རེད། རྒྱ་ནག་ནང་དུའང་དཀའ་ངལ་མང་པོ་འཕྲད་ནས་ངོ་རྒོལ་བྱེད་བཞིན་ཡོད་པ་རེད། ཡིན་ནའང་། རྒྱ་ནག་གི་ངོ་རྒོལ་བ་ཚོར་གུ་ཡངས་ཡོད་པ་དང་། བོད་དང་ཞིན་ཅང་ནང་མཁྲེགས་འཛིན་བྱེད་ཀྱིན་ཡོད་པ་རེད། འདས་བའི་ལོ་གཉིས་རིང་། རྒྱ་ནག་གི་སྲིད་བློན་ཝན་ཅ་པའོ་ཡིས་རྒྱ་ནག་ནང་ཆབ་སྲིད་ལ་འགྱུར་བ་གཏོང་དགོས་པ་ཐེངས་མང་བཤད་ཡོད་པ་རེད། ཐ་ན་ཁོང་གིས་རྒྱ་ནག་ནང་ནུབ་ཕྱོགས་ཀྱི་དམངས་གཙོ་ལམ་ལུགས་གྱི་རྣམ་པ་དགོས་ངེས་ཡིན་ཚུལ་་བཤད་ཡོད་། ནམ་རྒྱུན་རྒྱ་ནག་གི་འགོ་ཁྲིད་ཚོས། ནུབ་ཕྱོགས་ཀྱི་དམངས་གཙོ་ལམ་ལུགས་ཀྱི་རྣམ་པ་དེ་ཨེ་ཞེ་ཡའི་ནང་འཚམ་པོ་མིན་ཚུལ་བཤད་ཀྱིན་ཡོད་པ་རེད།
དེ་ནི་རྫུན་གཏམ་རེད། མི་གྲངས་ཆེས་མང་ཤོས་ཡིན་པའི་རྒྱ་གར་ནང ་། ནུབ་ཕྱོགས་གྱི་དམངས་གཙོ་ལམ་ལུགས་གྱི་རྣམ་པ་ལག་བསྟར་བྱེད་བཞིན་ཡོད།
དེ་ནས་ཉི་ཧོང་དང་། ལྷོ་ཀོ་རི་ཡ། ཐའེ་ཝན་སོགས་ཀྱི་ནང་དམངས་གཙོ་ལམ་ལུགས་ལག་བསྟར་བྱེད་བཞིན་ཡོད་པ་རེད། རྒྱ་ནག་གི་སྲིད་བློན་ཝན་ཅ་པའོ་ཡིས་རྒྱ་ནག་རྒྱལ་ཡོངས་མི་མང་འཐུས་མིའི་ཚོགས་ཆེན་སྐབས། གཞུང་འབྲེལ་གསར་འགོད་ལྷན་ཚོགས་ཤིག་གི་ཐོག རྒྱ་ནག་ནག་ཆབ་སྲིད་བཅོས་བསྒྱུར་བྱེད་དགོས། གལ་ཏེ་བཅོས་བསྒྱུར་མ་བྱས་བ་ཡིན་ན། རྒྱ་ནག་ནང་རིག་གནས་གསར་བརྗེ་བསྐྱར་ལངས་ཡོང་བའི་ཉེན་བརྡ་བཏང་ཡོད་པ་རེད། དེ་ནས་ཉིན་གཅིག་གི་རྗེས་སུ། ལྟ་བ་མཁྲེགས་འཛིན་པ་། ཁྲོང་ཆིན་གྲོང་ཁྱེར་གྱི་དྲུང་ཆེ་གནས་དབྱུང་བཏང་བ་རེད། རྒྱ་ནག་གི་འགོ་ཁྲིད་མང་ཤོས་ཀྱིས་བཅོས་བསྒྱུར་བྱེད་རྒྱུར་བསམ་བློ་གཏོང་བཞིན་ཡོད་པ་དེ་ནི་རེ་བ་ཞིག་རེད།
ཤིང་བཟའ་རིན་པོ་ཆེ་ལ་བཅར་འདྲི།
འབྲི་མཁན། དཔལ་ལྡན་རྒྱལ། on March 29th, 2012
བོད་ཀྱི་གཞོན་ནུ་ལྷན་ཚོགས་ཀྱིས་གོ་སྒྲིག་བྱས་ནས། ད་ལོའི་བོད་ཀྱི་ལོ་སར་ཚེས་ ༡ ཉིན་ཏེ། སྤྱི་ཟླ་གཉིས་པའི་ཚེས ༢༢ ཉིན་ནས་འགོ་འཛུགས་བྱས་ནས། ཨ་རིའི་ནིག་ཡོག་གྲོང་ཁྱེར་ནང་ཡོད་པའི་། མཉམ་འབྲེལ་རྒྱལ་ཚོགས་ཀྱི་མདུན་དུ་བོད་མི་གསུམ་གྱིས་། མཉམ་འབྲེལ་རྒྱལ་ཚོགས་ལ་། བོད་ནང་གི་ད་ལྟའི་ཛ་དྲག་གནས་སྟངས་ལ་རྒྱུས་ལོན་ཆེད། ཞིབ་འཇུག་ཚོགས་ཆུང་འཕྲལ་དུ་བོད་ནང་ལ་གཏོང་དགོས་པ་སོགས། དགོས་འདུན་དོན་ཚན་ལྔ་བཏོན་ནས་། དུས་ངེས་མེད་རིང་ཟས་བཅད་ངོ་རྒོལ་བྱས་ཡོད་པ་རེད། ད་ཐེངས་ཀྱི་ཟས་བཅད་ངོ་རྒོལ་གྱི་ལས་འགུལ་ཁྲོད་ཞུགས་མཁན་བོད་མི་གསུམ་ནི། ཨ་མདོ་མགོ་ལོག་ར་རྒྱ་དགོན་པའི་དགོན་བདག་ ཤིང་བཟའ་རིན་པོ་ཆེ་དང་། ཨ་རིའི་ནང་གཏན་སྡོད་བྱེད་མཁན། རྡོ་རྗེ་རྒྱལ་པོ་ལགས། རྒྱ་གར་ཧ་བྷ་པོ་ས་གནས་ནས་ཡིན་པའི་ ཡེ་ཤེས་བསྟན་འཛིན་ལགས་བཅས་རེད། ཁོང་གསུམ་གྱིས་རྒྱལ་ཚོགས་མདུན་དུ་ཟས་བཅད་ངོ་རྒོལ་བྱས་ནས། ཉིན་གྲངས་སུམ་ཅུ་འགོར་བའི་ཉིན་མོ་སྟེ། སྤྱི་ཟླ་གསུམ་པའི་ཚེས་༢༣་ཉིན། མཉམ་འབྲེལ་རྒྱལ་ཚོགས་གྱི། སྤྱི་ཁྱབ་དྲུང་ཆེའི་སྐུ་ཚབ། དངོས་སུ་ ཟས་བཅད་ངོ་རྒོལ་བྱེད་མཁན་ཚོར་། མཇལ་འཕྲད་གནང་ནས་། མཉམ་འབྲེལ་རྒྱལ་ཚོགས་ཀྱི་ངོས་ནས། ཁོང་རྣམ་པའི་དགོས་འདུན་རྣམས། སྒྲུབ་ཐུབ་རྒྱུར་འབད་བརྩོན་བྱེད་རྒྱུ་ཡིན་པ་ཁས་ལེན་བྱས་རྗེས། ད་ཐེངས་ཀྱི་ཟས་བཅད་ངོ་རྒོལ་མཚམས་འཇོག་བྱས་ཡོད་པ་རེད།