ལྕགས་བྱ་གནམ་ལ་འཕུར།

འབྲི་མཁན། དཔལ་ལྡན་རྒྱལ། on July 6th, 2013

གནས་འདི་ནི་ཨ་རིའི་ནོར་ཐི་ ཁ་རོ་ལེ་ནའི་ ཨོ་ཀྲར་འབེན་ཁ་ཟེར་བའི་མཚོ་གླིང་དེ་རེད་། གནས་འདི་རུ་རོད་ཐི་སྤུན་མཆེད་གཉིས་ཀྱི་རིག་སྟོབས་ལས་གནམ་གྲུ་གསར་བཟོ་ནས་(༡༩༠༣) ཐེངས་དང་པོ་ལྕགས་བྱ་གནམ་ལ་འཕུར་ལ་རེད།  དེ་རིང་ངའི་ནང་མི་དང་གྲོགས་པོ་མང་པོ་ཞིག་གནས་འདིར་སླེབས་ཡོད།

 

image

ལོ་བརྒྱ་ལྷག་གི་སྔོན་ལ།
གནས་འདི་ནི་འདབ་ཆགས་བྱ་ཡི་གཤོག་རྩལ་ངོམས་ས་ཡིན།

ལོ་ངོ་བརྒྱ་ལྷག་གི་སྔོན་ཏེ།

༡༩༠༣ ལོར།

རོད་ཐི་སྤུན་མཆེད་གཉིས་ཀྱི་རིག་སྟོབས་ལས།

གནས་འདི་རུ་ལྕགས་བྱ་ཞིག་གནམ་ལ་འཕུར་བ་ནས་བཟུང་།
འདབ་ཆགས་བྱ་རྣམས་གང་དུ་སོང་བ་མ་ཤེས་ཀྱང་།
གནམ་མཁའ་ལྕགས་བྱ་ཡིས་ཁེངས།

 

ཨ་ཙ་ཙ།

འབྲི་མཁན། དཔལ་ལྡན་རྒྱལ། on June 24th, 2013

གསར་འགོད་པས་གླང་ཆེན་གྱི་སྣ་བཞིན་གང་སར་དྲི་བསྣམས་དུ་སོང་ན།  ཆབ་སྲིད་པས་གླང་ཆེན་གྱི་སྣ་ལ་འབིགས་གཙགས་བྱེད་ཀྱིན་འདུག  ཨ་ཙ་ཙ།

image

གཟབ་གཟབ་མ་བྱས་པ་ཡིན་ན།  ཆབ་སྲིད་པས་ཁོང་ཚོའི་སྣང་ངོར་དྲི་མ་ཞིམ་པོ་ཡིན་བསམ་པ་དེ། ཐབས་བརྒྱ་ཇུས་སྟོང་གིས་གསར་འགོད་པ་དང་།  མི་མང་ལའང་དྲི་མ་ཞིམ་པོ་ཡིན་པ་སྣང་བརྙན་སྤྲོད་ཐབས་བྱེད་པ་མ་ཟད་།   དྲི་མ་ལ་བསྣམ་དུ་ཤོག་ཅེས་མགྲོན་འབོད་ཀྱང་བྱེད་ངེས་ཡིན།  ཡང་ཆབ་སྲིད་པས་དྲི་མ་མི་ཞིམ་པའི་མཐའ་ལ་ལྕགས་དྲས་བསྐོར་ངེས་ཡིན་ལ།  དྲི་མ་དེ་བསྣམས་དུ་འགྲོ་དུས་ཁྱེད་ཀྱི་སྣ་ལ་འབིགས་གཙགས་ཐེབས་ངེས་ཡིན།

ཟླ་བ་ཆེ་ཤོས།

འབྲི་མཁན། དཔལ་ལྡན་རྒྱལ། on June 23rd, 2013

གཤམ་གྱི་པར་འདི་ངས་རང་གི་སྡོད་ཁང་གི་སྒེའུ་ཁུང་ནས་བརྒྱབ་པའི་པར་ཡིན། དེ་རིང་གི་ཟླ་བ་འདི་ནི་ལོ་གཅིག་གི་ནང་སའི་གོ་ལ་དང་ཐག་ཉེ་ཤོས་ལ་སླེབས་པའི་ཟླ་བ་ཡིན་པས་ད་ལོའི་ཟླ་བ་ཆེ་ཤོས་དང།   འོད་མདངས་འཚེར་ཤོས་དེ་རེད།

image

རྡེའུ་འབུམ།

འབྲི་མཁན། དཔལ་ལྡན་རྒྱལ། on June 21st, 2013

༼རྡེའུ་འབུམ། བོད་ཀྱི་བུད་མེད་དཀྱུས་མ་ཞིག་གི་མི་ཚེའི་ལོ་རྒྱུས།༽ ཞེས་པའི་དེབ་དེ་ནི། ཀུན་བཟང་སྒྲོལ་མ་ལགས་ཀྱིས་ཞེད་སྣང་དང་། འཛེམས་དོགས་མེད་པར་༡༩༩༠ ནང་བོད་ཀྱི་ཨ་མདོ་ས་ཁུལ་དུ་བུ་མོ་ཆུང་ཆུང་ཞིག་གིས་དཀའ་སྡུག་ཆེ་བའི་འཚོ་བར་གདོང་ལེན་བྱས་པའི་མྱོང་ཚོར་དང་། དེ་ནས་བཙན་བྱོལ་དུ་འབྱོར་ནས་རྒྱ་གར་དུ་སྐྱབས་བཅོལ་བའི་འཚོ་བ་རོལ་བའི་ཉམས་མྱོང་། དེའི་རྗེས་ཨ་རིར་ཕེབས་ཏེ་ལུགས་སྲོལ་དང་། གོམས་གཤིས། སྐད་ཡིག་སོགས་མི་གཅིག་པའི་སྤྱི་ཚོགས་ཞིག་གི་ནང་འཚོ་བ་གསར་བ་འགོ་འཛུགས་བྱས་བའི་བརྒྱུད་རིམ་གསལ་བོར་འཁོད་ཡོད་པ་རེད།

Kunsang dolma

ང་རང་གིས་ཤེས་ཚོད་ལ་ཀུན་བཟང་སྒྲོལ་མ་ལགས་ཀྱིས་བྲིས་པའི་ ༼ རྡེའུ་འབུམ།  བོད་ཀྱི་བུད་མེད་དཀྱུས་མ་ཞིག་གི་མི་ཚེའི་ལོ་རྒྱུས།༽ཞེས་པའི་དེབ་འདི་ནི། བོད་ཀྱི་བུད་མེད་དཀྱུས་མ་ལོ་ཆུང་ཞིག་གིས་མི་ཚེའི་ལོ་རྒྱུས་ཀྱི་དེབ་ཞིག་ཨ་རིའི་ནང་དབྱིན་ཡིག་ཐོག་པར་བསྐྲུན་བྱས་པ་ཐོག་མ་དེ་རེད། ཀུན་བཟང་སྒྲོལ་མ་ལགས་ནི་ལོ་ན་༣༢ ཡིན་པ་དང་། དེང་སྐབས་ཨ་རིའི་ཤར་ཕྱོགས་Maine མངའ་སྡེའི་ནང་གནས་སྡོད་བྱས་ཡོད་ལ།   ཁོང་གི་གཟའ་ཟླ་ཨེ་ཝན་དང་ཁོང་གཉིས་ལ་བུ་མོ་གཉིས་ཡོད་པ་རེད།

༼རྡེའུ་འབུམ། བོད་ཀྱི་བུད་མེད་དཀྱུས་མ་ཞིག་གི་མི་ཚེའི་ལོ་རྒྱུས།༽ ཞེས་པའི་དེབ་དེའི རྩོམ་པ་པོ་ཀུན་བཟང་སྒྲོལ་མ་ལགས་དང་མཉམ་དུ་གླེང་མོལ་བྱས་བར་ཉན་འདོད་ཡོད་ན། 

 སྦྲེལ་ཐག་འདིར་མཐུད་རོགས། 

 

འཕྲུལ་དེབ།

འབྲི་མཁན། དཔལ་ལྡན་རྒྱལ། on June 21st, 2013

image[1]

དེང་སྐབས་འཕྲུལ་རིག་ཡར་རྒྱས་འགྲོ་བཞིན་པ་དང་བསྟུན་ནས་མི་རྣམས་ཀྱི་ཉིན་རྒྱུན་གྱི་འཚོ་བ་དང་།  ལས་དོན་བྱེད་ཕྱོགས་ལའང་། འགྱུར་བ་འགྲོ་བཞིན་ཡོད་པ་རེད། དཔེ་ཆ་པར་སྐྲུན་ལ་མཚོན་ན། རྡོ་བརྐོས་དང་།  ཤིང་བརྐོས། ལྕགས་པར། པར་སློག་རྒྱག་པ་སོགས་བརྒྱུད་རིམ་གང་མང་ཞིག་བརྒྱུད་ནས་དེང་སྐབས་༼འཕྲུལ་དེབ༽ཟེར་ཞིག་གློག་ཀླད་ནང་པར་བསྐྲུན་བྱས་ནས། ཆུ་ཚོད་སྐར་ཆ་གཅིག་གི་ནང་དྲ་ལམ་བརྒྱུད་ནས་འཛམ་གླིང་ས་ཕྱོགས་གང་སར་བཀྲམས་ཏེ་མི་སྟོང་ཕྲག་མང་པོས་ལྟ་ཀློག་ཐུབ་ཀྱི་ཡོད་པ་རེད། དེ་རིང་གི་ལེ་ཚན་འདིའི་ནང་དུ་། རྒྱ་གར་ལྷོ་ཕྱོགས་འབྲས་སྤུངས་དགོན་པར་སློ་གཉེར་གནང་བཞིན་པའི་ཞོར་ལ་འཕྲུལ་དེབ་བཟོ་མཁན། མཁྱེན་རབ་རྒྱ་མཚོ་འམ། ཤིས་ཚང་ལྗང་སྨྱུག་ལགས་དང་མཉམ་དུ་གླེང་མོལ་བྱེད་རྒྱུ་ཡིན།
 སྦྲེལ་མཐུད་འདིར་མནོན་རོགས།  

སེམས་ཚོར།

འབྲི་མཁན། དཔལ་ལྡན་རྒྱལ། on May 21st, 2013

གནམ་མཁའི་སྐར་མ་ལ་ལྟ་རྒྱུ་ནི་ང་རང་ཆེས་དགའ་ཤོས་དང་། སེམས་ལྷོད་ལ་འབབ་པའི་དུས་ཡིན། ང་རང་ཆུང་དུས། གནམ་གྱི་སྐར་མ་བལྟས་ནས་དྲན་རིག་རྒོད་པའི་རྟོག་འཆར་གྱིས་སྐར་མ་ལ་བཞོན་ནས་ངའི་མིག་ཆེན་པོ་དེ། སྐར་མ་བཞིན་ཅེར་ནས་འཇིག་རྟེན་མི་ཡུལ་ལ་བལྟས་མྱོང་། དེ་རིང་དགོང་མོ་ངས་གནམ་གྱི་སྐར་མ་ལ་བལྟས་ནས་བྱིས་དུས་ཀྱི་དྲན་སྣང་ཕྱིར་དྲན་བྱེད་སྐབས། སྐར་མདའ་ཞིག་ཤར་ཕྱོགས་ཀྱི་གནམ་མཁའ་ནས་ནུབ་ཕྱོགས་ཀྱི་ས་ལ་ཟེགས་སོང་། དེ་དང་མཉམ་དུ་ང་དང་ཆེས་སེམས་ཐག་ཉེ་བའི་རླབས་ཆེན་གྱི་གང་ཟག་ཅིག་འཇིན་རྟེན་མི་ཡུལ་དང་བྲལ་སོང་། ཁོང་ནི་ངའི་ཕ་རྒན་ཡིན། ཁོང་ནི་དུས་གཏན་དུ་ངའི་སེམས་སུ་འཕྲོ་བཞིན་པའི་སྐར་མ་འོད་ཆེན་དེ་ཡིན།

ཨ་ཕ་ལགས།

འབྲི་མཁན། དཔལ་ལྡན་རྒྱལ། on May 19th, 2013
imageཨ་ཕ་ལགས།
ཁྱེད་ཀྱི་བྱམས་བརྩེའི་འོད་མདངས་ཀྱིས།
ངེད་མིང་སྲིང་དགུ་ལ་སྟོབས་ཤུགས་སྦྱིན་ཅིང་།
ཁྱེད་ཀྱི་དཀའ་ངལ་ལ་གདོང་ལེན་གནང་ཕོད་པའི་སྙིང་སྟོབས་དེས།
ངེད་མིང་སྲིང་དགུ་ལ་རང་འགན་འཁུར་ལེན་ཐུབ་པའི་སྤོབས་པ་སྦྱིན།
ཨ་ཕ་ལགས།

ཁྱེད་ནི་དུས་གཏན་དུ་ང་ཚོའི་སེམས་ཁོངས་སུ་འབར་བཞིན་པའི་ཚེ་ཐུབ་མཆོད་དེ་ཡིན།

གྲོགས་དམ་པ། ཁྱེད་རང་ཕེབས་སོང་།

འབྲི་མཁན། དཔལ་ལྡན་རྒྱལ། on April 8th, 2013

གྲོགས་དམ་པ། བློས་ཐུབ་ཀྱི་གྲོགས་པོ་ལགས།

ཁྱེད་རང་ཕེབས་སོང་། ཁྱེད་རང་དངོས་སུ་ཕེབས་སོང་བའི་གནས་ཚུལ་ཐོས་དུས། ང་རང་ཐའེ་ལན་གྱི་རྒྱལ་ས་སྦེན་ཁོག་གི་རྒྱལ་སྤྱིའི་གནམ་ཐང་ཉེ་འཁྲིས་ཀྱི་མགྲོན་ཁང་ཞིག་ཏུ་ཡོད། གྲོགས་པོ་ལགས། ཁྱེད་རང་ཕེབས་རྒྱུ་ཡིན་པ། ཁྱེད་དང་ངེད་གཉིས་ཀྱིས་སྔོན་མ་ནས་ཤེས་ཡོད་པ་ཁྱེད་ཀྱིས་ཀྱང་མཁྱེན་གསལ་རེད། ཡིན་ནའང་ཁྱེད་ཉིད་དངོས་སུ་ཕེབས་སོང་བའི་གནས་ཚུལ་དེ་མདའ་མོ་བཞིན་ངའི་སྙིང་ལ་ཕོག་བྱུང་། ངས་མིག་གཉིས་བཙུམ་ནས་མ་ཎི་འདོན་སྐབས། སྤྲིན་ནག་མཁྲིགས་པའི་ལུང་ཁུག་དོག་མོ་ཞིག་ནས་ཁྱེད་ཀྱི་སྨིན་མ་མཐུག་པའི་མིག་ཟུང་ལས་ལྷད་མེད་ཀྱི་བརྩེ་མདངས་མངོན་བཞིན་ང་ལ་བལྟས་འདུག ངས་ཁྱེད་ཀྱི་མཚན་ནས་ཐེངས་ཁ་ཤས་བོས་ནའང། ཁྱེད་ཀྱིས་ནམ་རྒྱུན་གྱི་འཛུམ་མདངས་དེ་བསྟན་ནས། ཅི་ཡང་མ་བཤད་པར་སྤྲིན་ནག་མཁྲིགས་པའི་ལུང་ཁུག་དོག་མོ་དེ་བརྒྱུད་ནས་ཕེབས་སོང་། ངས་སེམས་ཁྲལ་དང་བཅས་ཁྱེད་ཀྱི་རྗེས་དེད་ནས་ཡོང་བ་ཡིན། ཅུང་མ་འགོར་བར། སྤྲིན་ནག་མཁྲིགས་པའི་ལུང་ཁུག་དོག་མོ་དེ་ལས་བརྒལ་ནས། མཛེས་སྡུག་ལྡན་པའི་མཐའ་ཡས་པའི་རྩྭ་ཐང་ཞིག་དུ་སླེབས་བྱུང་། ངས་མུ་མཐུད་ནས་ཁྱེད་ལ་བལྟས་བསྡད་པ་ཡིན། ཁྱེད་ཀྱི་ཁ་ཕྱིར་འཁོར་ནས་ངེད་གཉིས་ཀྱི་བཤད་ཚར་མེད་པའི་བོད་ཀྱི་མདུན་ལམ་དང་། སོ་སོའི་མི་ཚེའི་སྐོར་མུ་མཐུད་དུ་གླེང་མོལ་བྱེད་རྒྱུའི་རེ་བ་བྱས་པ་ཡིན། ཡིན་ནའང་ཁྱེད་ཀྱིས་ཁ་ཕྱིར་མ་འཁོར་བར་མུ་མཐུད་དུ་མཐའ་ཡས་པའི་རྩྭ་ཐང་སྟེང་ཕེབས་སོང་། ག་ལེར་ཕེབས་སོང་། ཁྱེད་ཀྱི་གཟུགས་བརྙན་དེ་མེ་ཏོག་སྣ་མང་བཞད་ཅིང་། རི་དྭགས་སེམས་ཅན་བག་ཡངས་ངང་གནས་པའི་རྩྭ་ཐང་དེེར་ཐིམས་ནས་ངའི་མིག་ལམ་ནས་ཡལ་སོང་། ངས་མིག་ཕྱེས་དུས་མིག་ཆུ་རྡོག་རྡོག་ཞིག་མཁུར་ཚོས་བརྒྱུད་ནས་ངའི་མདུན་དུ་ཡོད་པའི IPad སྟེང་ལ་ཟེགས་འདུག

image

༡༩༩༥ ལོར་རྡ་ས། ཆབ་བྲག་ལྷ་མོ་སྐྱབས། མགོན་པོ་ཚེ་རིང་། དཔལ་ལྡན་རྒྱལ། རྡོ་རྗེ་ཚེ་བརྟན།

གྲོགས་དམ་པ། བློས་ཐུབ་ཀྱི་གྲོགས་པོ་ལགས།

ལོ་ངོ་ཉེར་ལྔའི་སྔོན་ལ། གནའ་མཁར་ཟི་ལིང་དུ། ངེད་ཚོས་ལོ་ངོ་ཉི་ཤུར་སོན་པའི་གཞོན་ནུའི་སྣང་བ་མཐོན་པའི་ལ་རྒྱ་དང་། སྤོབས་པ་ཆེན་པོས་རང་ཉིད་ཀྱི་བྲང་ཁོག་ཁུ་ཚུར་གྱིས་རྡུང་བཞིན་མི་རིགས་ཀྱི་མདུན་ལམ་གླེང་བ་ངེད་གཉིས་ཀྱིས་ག་ལ་བརྗེད།

ལོ་ངོ་ཉི་ཤུའི་སྔོན་ལ། བཙན་བྱོལ་བའི་ལྟེ་གནས་རྡ་རམ་ས་ལར་ངེད་གཉིས་ཀྱིས་བོད་ཕྲུག་ཁྱིམ་སྡེར་འགྲོ་སའི་ལམ་ཁར་ཡོད་པའི་དུར་ས་དེ་རུ། ཆང་འཐུང་ཞོར་སྙན་ངག་འབྲི་བཞིན་དོན་དངོས་དང་། རྟོག་འཆར་མཉམ་བསྲེས་ངང་འཚོ་བ་བསྐྱལ་བའི་གནས་སྟངས་དེ་ངེད་གཉིས་ཀྱིས་ག་ལ་བརྗེད།

ནུབ་ཕྱོགས་སླེབས་ནས་། རྟོག་འཆར་དང། དོན་དངོས་ཀྱི་དབྱེ་བ་ཕྱེས་ནས། འདས་ཟིན་པའི་འཚོ་བར་གླེང་བཞིན། གཅེས་ཕྲུག་གཉིས་བང་དུ་བཟུང་ནས་འདོད་བློ་ཅུང་་ཚིམས་པའི་འཚོ་བར་རོལ་རྒྱུའི་གོ་སྐབས་ཤིག་བྱུང་བ་ངེད་གཉིས་ཀྱིས་ག་ལ་བརྗེད།

ལྷག་པར་དུ། ༢༠༡༡ ལོའི་སྤྱི་ཟླ་བཅུ་བའི་ནང་། ང་ཚོ་གྲོགས་པོ་ཁ་ཤས་ས་ཐག་རིང་པོ་ནས་ཆེད་མངགས་ཁྱེད་ལ་འཚམ་འདྲིར་ཡོང་བའི་རྗེས་ནས་ད་ལྟའི་བར་གྱི་ལོ་གཅིག་ལྷག་གི་རིང་། ཁ་པར་བརྒྱུད་ནས་བོད་རྒྱའི་འབྲེལ་ལམ་དང་། མི་རིགས་འདིའི་མདུན་ལམ་གླེང་ཞོར། མི་ཚེའི་རིན་ཐང་སྐོར་རྒྱུན་དུ་གླེང་མོལ་བྱས་པ་ངེད་གཉིས་ཀྱིས་ག་ལ་བརྗེད།

སྐྱེས་བར་མགོ་རྔ་ཡོད་ཀྱང་། འཆི་བར་་མགོ་རྔ་མེད་ཅེས་པ་ལྡོག་ཐབས་ཡོད་ན། ཁྱེད་ཉིད་དི་ལྟར་ཕེབས་དོན་མེད། ང་དུས་བརྟན་དུ་ཁྱེད་དང་མཉམ་དུ་ཡོད། གྲོགས་པོ་ལགས། ངའི་མི་ཚེ་ནང་ཁྱེད་ལྟ་བུའི་གྲོགས་པོ་ཞིག་ཡོད་པ་ངའི་བསོད་ནམས་དང་བདེ་སྐྱིད་ཡིན་ལགས།

ཁྱེད་ཀྱི་གྲོགས་པོ་དཔལ་ལྡན་རྒྱལ་གྱིས།

ད་འདི་ལྟར་ག་ཚོད་ཅིག་འགྲོ་རྒྱུ་ཡིན་ནམ།

འབྲི་མཁན། དཔལ་ལྡན་རྒྱལ། on March 25th, 2013

ཁ་སང་སྤྱི་ཟླ་གསུམ་པའི་ཚེས་༢༤ཉིན། མི་གཅིག་དང་། དེ་རིང་ཚེས་༢༥ཉིན་མི་ཞིག་གིས་ཨ་མདོ་ས་ཁུལ་དུ་རང་ལུས་མེར་བསྲེགས་བཏང་འདུག   ཁོང་ཚོས་”བོད་ལ་རང་དབང་དགོས། ༧གོང་ས་མཆོག་བོད་ལ་ཕེབས་སུ་འཇུག་དགོས། “ཟེར།  རྒྱ་ནག་གཞུང་གིས་ཁོང་ཚོས་དགོས་འདུན་ལ་དགེ་མཚན་ལྡན་པའི་ཡ་ལན་ཞིག་སྤྲོད་ངེས་ཡིན་ནམ། བོད་མིའི་སྒྲིག་འཛུགས་ཀྱིས། “རྒྱ་ནག་གཞུང་གིས་བོད་ནང་ལག་བསྟར་བྱེད་བཞིན་པའི་དྲག་གནོན་གྱི་སྲིད་ཇུས་མཚམས་འཇོག་བྱས་པ་ཡིན་ན། བོད་མིས་རང་ལུས་མེར་སྲེག་མཚམས་འཇོག་ངེས་རེད།”ཟེར།རྒྱ་ནག་གཞུང་གིས་བོད་ནང་དྲག་གནོན་གྱི་སྲིད་ཇུས་མཚམས་འཇོག་བྱེད་རྒྱུ་ཚབ་ཏུ་དེ་བས་ལྡོག་ཏེ།  སྡུག་ཕྱོགས་ཀྱི་ཡ་ལན་སྤྲོད་བཞིན་འདུག ད་མུ་མཐུད་དུ་སྲེག་རྒྱུ་ཡིན་ནམ། ཉེ་ཆར་ང་རང་རང་ལུས་མེ་བསྲེགས་ནས་འདས་གྲོངས་སུ་གྱུར་བའི་མི་སྣ་ཅིག་གི་ཨ་མར་ཐུག་བྱུང་། ཁོ་མོས་ང་ལ་འཐམ་ནས་ངུས་བྱུང་། སྐར་མ་ཁ་ཤས་རིང་ལ་ངུས་བྱུང་། “ཁྱོད་ཐོན་དང་ངམ།” ཟེར་བ་ཙམ་ལས་ཚིག་གཅིག་ཀྱང་ཁ་ནས་ཐོན་མ་བྱུང་། ངས་ཀྱང་ཁོ་མོར་འཐམ་རྗེས་ལག་གཉིས་ཀྱིས་འགྲམ་པ་བསྐྱོར་ནས། “ད་མ་ངུ།” ཟེར་བ་ཙམ་ལས་ཚིག་གཅིག་ཀྱང་ཁ་ནས་ཐོན་མ་སོང་།  མིག་ལས་མིག་ཆུ་ཡང་ཐོན་མ་བྱུང་།  ངས་ཁོང་མོའི་མིག་ཆུ་འདྲེས་པའི་མིག་མདངས་ལས། སྐྱོ་སྡུག་དང་། སེམས་ཁྲལ།  ཞེད་སྣང་། ཐེ་ཚོམ  མགོ་འཐོམ་ཡོད་པའི་སྣང་བརྙན་མཐོང་བྱུང་།

ཤི་བའི་རྣམ་ཤེས་དང་། གསོན་པོའི་བླ་སྲོག་འཁོར་བའི་གནས་འདིར་ངེད་ཕ་བུ་གཉིས་ཀྱང་གསོན་པོར་སླེབས་སོང་།

ཤི་བའི་རྣམ་ཤེས་དང་། གསོན་པོའི་བླ་སྲོག་འཁོར་བའི་གནས་འདིར་ངེད་ཕ་བུ་གཉིས་ཀྱང་གསོན་པོར་སླེབས་སོང་།

ད་ཅི་ཞིག་བྱེད་དགོས་སམ། ང་ཞེད་སྣང་འདུག  རང་ལུས་མེ་སྲེག་གི་ཚ་རླབས་འདི་ཤུགས་ཆེ་རུ་འགྲོ་རྒྱུ་ཡིན་ནམ། ད་འདི་ལྟར་ག་ཚོད་ཅིག་འགྲོ་རྒྱུ་ཡིན་ནམ།

མེ་ལྕེའི་ཀློང་དུ་༧རྒྱལ་བའི་མཚན་ནས་འབོད།།

ས་ལ་འགྱེལ་ཁར་མི་རིགས་རང་དབང་འབོད།།
ཚེ་སྲོག་མེ་ལ་འཐིམས་པའི་རྣམ་ཤེས་ཀྱིས།།

མི་མངོན་དབྱིངས་ནས་བོད་ལ་ཅེར་ནས་འདུག།

བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་ལ་བཅར་འདྲི།

འབྲི་མཁན། དཔལ་ལྡན་རྒྱལ། on January 7th, 2013

བོད་ཀྱི་གཞོན་ནུ་ལྷན་ཚོགས་ནི། བཙན་བྱོལ་བོད་མིའི་སྤྱི་ཚོགས་ཁྲོད་། གཞུང་འབྲེལ་མ་ཡིན་པའི་ཚོགས་པ་ཆེ་ཤོས་དེ་ཡིན་ལ།   བོད་ཀྱི་གཞོན་ནུ་ལྷན་ཚོགས་ཀྱིས་བོད་རང་བཙན་ཡིན་པའི་ཆབ་སྲིད་ཀྱི་ལྟ་བ་བཟུང་ཏེ། བོད་རང་བཙན་ཆེད་འཐབ་རྩོད་བྱེད་བཞིན་ཡོད་པ་རེད།
འདས་པའི་ཟླ་བ་གཅིག་ལྷག་གི་རིང་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་དོན་གྲུབ་ལྷ་དར་ལགས་དང་།  དྲུང་ཆེ་ཆོས་སྐྱིད་ལགས་རྣམ་གཉིས་བྱང་ཨ་རིའི་ནང་ཕེབས་ནས་ལས་དོན་སྤེལ་ཡོད་པ་རེད།   བོད་ཀྱི་གཞོན་ནུ་ལྷན་ཚོགས་ཀྱི་། ཚོགས་གཞོན་དོན་གྲུབ་ལྷ་དར་ཨ་རིའི་ནང་ཡོད་པའི་སྐབས་འདིར་ཨེ་ཤའི་རང་དབང་རླུང་འཕྲིན་ཁང་གིས་བཅར་འདྲི་ཞུས་བར་གཟིགས་རོགས།